BANGLADESH-A PIANG NAUSEN PUTAR CHU

Bangladesh, Magura district chhunga thingtlang khaw pakhat Bhulbharia khuaah, loneimi nupa rethei bakberh tak pakhat chuan tun Chawlhni chawhnu lam khán naute hmélhmáng danglam tak an hring nawlha, an mipa naute pianghlim chu putar kum 80 bawr vel mi hmel pu niin, tar zur tawh ang maiin a chal leh hmai vunte chu a chuar chhia a, a mitkhur a zau kek kawk hle a, a taksa chu a pan thlir thler hle bawk.

.

He naute lainatawm tak hian pianpui natna vang tak mai, khawvel puma nau piang maktaduai 4 zela pakhat chauhin an vei țhin, upat chakna 'Progeria' chu a pian chhuah pui ve hlauh a ni. He natna veitute chu mi pangngai aiin a let 8 lawihin an upa chak zawk niin mithiamte'n an sawi.

.

A khaw mi thingtlang nu mawl leh pa mawl háwkdák ták ták te chu nau piang danglam en tur hian damdawi in an pan khawm ruih ruih a, hmuhnawm thlir takin an thlira, naute nu leh pa Biswajit Patro-a leh Parul Patro-i te chuan țha taka lo dawngsawngin phâl takin an lo entir zel a, an fapa thar chu zahpui lovin an chhuang hle zawk a ni. An nupa hian fanu pakhat an nei tawh a, an duhthusam tak fapa an han hring leh chiah chu an hlim takmeuha, naute dang anglo takin a hmelhmang danglam mahse an engto teh lua lo. Naute pa Biswajit-a chuan "kan fanu Aparna-i'n a nu a chhuna, ani hian kei min chhun ve thung anih hi" tiin a hlim hle a. "Ka fapa hi a danglam avang hian ka hlimlo lova, lungchhiatna ka nei heklo" a ti bawk.

.

Naute putea chuan tihian a lo sawi ve bawka, "Kan naute a lan upatna chhan chu a pa a chhuna, a pa pawh hi a kum zat aia upa daihin a lang a ni. A dam khua seiin hrisel taka a țhanlen ka beisei tlat a ni" a ti.

.

Doctorte chuan tuna tan rih chuan a nu nen an hriselna a țhat thawkhat thu an sawi a, mahse nakin zelah treatment pek a ngai angem? tih erawh a sawi lawk theih loh thu an sawi.

.

Progeria natna veite hi a hlimchhawnah chuan nau hrisel pangngai ang takin an langa, mahse kum khat a vei hnuah a symtoms a rawn langchhuak țan țhin a, an țhang chak lovin an rihzawng pawh a sang chaklo hle. Rang takin an upa thuai thuai a, kum reilote-ah kum 50 miin an natna neih ang țhin ho, ruh natna, thisen natna, lung natna etc an nei chho a, stroke leh lungphu chawl(heart attack) in an thi tlangpui. Kum 13 an dam pel ngai meuh lova, dampel mibik tlemte erawh sawi tur an awm zeuh zeuh thung. He natna hian rilru lam a nghawng tellova, naupang dang ang thovin an rilru a hriselin a chak țha a ni.

.
                       Source: Indiatoday