KA BANG DAWN LO - Mark Zuckerberg

Facebook chu buaina chhumpuiin a chim buai mek laiin Mark Zuckerberg chuan ban mai a tum loh thu a sawi a, Facebook ang company lian kaihruai tur hian amah ngei hi a la țha ber rih nia a hriat thu a sawi.

Facebook chuan press conference kovin an harsatna chi hrang hrang an sawifiah a, Facebook buaina hi chin fel ngal duak duak chi a ni lo, Zukerberg chuan a ti.

‘Khawvela thil la awm ngai lo Facebook ang han siam takah chuan kan beisei loh thil tam tak tak pawh a lo thleng thei a ni tih hi kan pawm tlan a ngai a, kan thil tih sual atangin kan insiam țha mek a, mipui pawh hian kan chungah riina an nghah chhoh zel ka beisei a ni,’ a ti bawk.

Zuckerberg hi Facebook CEO a ni a, an company board chairman a ni bawk a, hemi chungchangah hian inthlak tumna te a awm em? tih  an zawt a, ani chuan, ka hriat chinah chuan chutiang sawihona kan la nei lo, a ti.

#deleteFacebook campaign chungchang an zawt a, Zuckerberg chuan hei hi thil ța lo tak a ni a, mahse nghawng țha lo a nei tam vak lo a ni, a ti.

Scott Stringer, head of New York City's pension fund chuan Zuckerberg hi a company hotu a nihna atang hian a insaseng tur a ni,  Facebook hi a hmangtu mi billion 2 lai an awm a, a hmang tute ngaih an tițha tawh lo va, an thunun zawh loh thil a lo thleng ta a ni, a ti a, Facebook hmangtute rinkai leh tur leh bung thar siam leh tur hian Mr Zuckerberg hi a ban ngei a ngai a ni, a ti.

He press conference-ah hian Zuckerberg chuan, Facebook hian mite hnenah remchanna leh hmanraw țangkai tak a pe a, chu hmanraw tangkai hman thiam chu a hmangtute  mawhphurhna a ni, a ti.

He press conference-ah hian Mark Zuckerberg chuan press mite zawhna chi hrang hrang darkar khat deuh thaw a chhang a, Facebook hian a hmangtute hriatpui lohvin mi mtd 50 personal date a tiput ru nia an puh chu, mi mtd 87 lai an nih zawk an rin thu an sawi lang bawk a ni.

TIM COOK Vs MARK ZUKERBERG

Apple CEO Tim Cooka’n Zuckerberg a sawiselna, “ Sum siam duh vangin Zukerberg hian Facebook hmangtute privacy a rūn” tih leh Facebook hmangtute hian pawisa a hman man pawisa an chawi loh avangin Facebook siamtute hian a hmangtute an ngaihsak tawk lo,’ nia a puhna chu Zuckerberg chuan thu dik ang tak si, thu dik ziktluak ni si lo, a ni a ti.

KHAWBUNG A LA TI TA DEUH DEUH!

Hetianga Facebook an mualpho mek lai hian Facebook executive Andrew Bosworth thuziak ‘Facebook hmangtute zingah inrikrapna leh fiafiaka chetna avangin mi lo thi pawh ni se, Facebook avanga mi an inpawh (‘connect’) phahna a nih phawt chuan kan pawisa lo ang” tih lam hawi zawnga nikum 2016-a a ziak chuan khawvel mipui a barakhaih hle bawk a. Hnar hnuaiah phatna a bo lo tih ang ziazangin he thu ziaktu Facebook Executive Andrew Bosworth chuan, ka rilru tak tak ni lovin mi rilru chawhthawhna provocative atan ka ziak mai mai a ni, a ti  a,  Mark Zuckernerg pawhin Andrew Bosworth hi mi turu tak a ni a, ka chhuang em em a, he thu a  ziak hi kei chuan a tir atangin ka pawm lo hulhual a, ani hian mi rilru chawhthawh nan thu dangdai tak tak hi a ziak fo va, the means justify the ends@ The ends justify the means tih ngaihdan hi kei chuan ka pawm ve ngai lo a ni, a ti.

ZUKERBERG Vs. JEFF BEZOS

Mr Zuckerberg chuan Amazon chief executive Jeff Bezos-a’n a sawiselna chu a chhang bawk a. Facebook chungchangah thutlukna pawimawh hi keima siam vek a ni a, sum siamna lam fakna lamah hi chuan ka ngaihtuahna ka seng vak lem lo a ni, a ti.

Jeff  Bezos thusawi, “ Company thenkhat chuan sum siam nan tha tam tak an thawh laiin company thenkhat hi chuan an thilsiam hmangtute hnen atanga sum la lo turin tha tam tak an seng bawk a ni, "There are companies that work hard to charge you more, and there are companies that work hard to charge you less." a tih  hi chu a sawi dik thlawtin ka hria a ni, a ti.

SAKAWLH ANG A NI

UN human rights investigator pakhat chuan Facebook hi sakawlh ang mai a lo ni ta a, Rohingya raltlan chungchangah hian Facebook kaltlangin inhuatna thu an thehdarh nasa lutuk tia a puh chungchang pawh Mr Zuckerberg chuan chhangin khatiang message kha kan vil ngun tawh a, tun chinah chuan a awm tawh loh kan beisei, a ti.

US HOUSE COMMERCE COMMITTEE HMAAH

April ni 11 hian Facebook's founder, Mark Zuckerberg chu US House Commerce Committee hmaah a ding dawn a, an chapchar dawn a, TV-ah LIVE in kan en theih ngei pawh beisei ila.

Hetih lai hian Facebook boss Mark Zuckerberg chuan UK Department for Culture Media and Sport select committee hmaa ding tura a ngenna chu a hnawl fithla hlauh va, a aiawh Mr Cox a ding thung dawn a ni.

Mr Collins, the chairman of the Department for Culture Media and Sport select committee chuan Facebool hmangtute chanchin a ruk a rala hmansual a nih chungchangah thu zawh tur tam takkan nei a, chute chunga Mark Zuckerberg-a’n committee hmaa inlan a tum lo hi hriatthiam harsa kan ti a, inngaihtuah nawn leh se a țha hle ang, a ti.

TECHNOLOGY CHU SUM SIAMNA HMANRUA MAI?

India ram țhalaite hnamrilru anneih theihna tura nasa taka tha leh zung lo thawhtu Swami Vivekananda te ngaihdanah kha chuan khawtlang lam Sap-h hian technology hian min run a, chu technology chuan sum an siam a, khaw chhak mi rilru thianghlim tak tak rilru hi an tichingpen vek a, matirialsiam leh consumerism-ah min hruai lut a, sum ngainatna bawihah min hruai lut ta a ni, an lo ti thin reng a. 

A dikna chen a awm a, amah Pu Vawmphunga’n van boruak hmang tangkai thiam apiang an dingchang ang a tih ang khan boruak kaltlangin signal hian kan nitin nun a țha zawng leh a chhe zawngin min run darkar tin ta mai chu a ni a. Kan hriat loh hlanin Google leh Facebook leh WhatsApp sal (slave)ah kan insiam ta reng mai chu a ni a. Kan la him lo zui bawk a ni.  Facebook hian sum ringawt a ngaih tuah a, an invenghim zo ta lo va, an mual pho ta chu a ni a. Facebook siamtute hriat phak bak leh suangtuah phak bakin miin an lo hmang khawlo ta a ni.

TUIPUI RAL THIL THLENG LEH KEIMAHNI

He thil hi tuipui ral thil a ni a, keimahni nunah eng tin nge kan ‘relate’ ang a, eng tin nge kan thil sawi mek chu kan nunah kan seng luh (relevant )tak ang le?  Sum tak tak aiin hmingțhat hi thlan zawk tur a ni a. Tangka leh rangkachak aiin duhsakna a ngainatawm. Mi hausa leh mi rethei an awm za a, an vaia siamtu chu LALPA a ni.

                  PIC : MARK ZUKERBERG