BAWNGKAWN PENGTHUAM ZAUHNA TUR RAM !!

( The Story So Far )

Bawngkawn kawng pengthuam zauhna tur ram chungchang sawihlawh tak mai hi sawidan hrang hrang a tam a. Thil hrechianglo a lo sawive chiam chiam tawk lah bo lo !!! A hnuai ami hi tuma hnial rualloh-a thil awmdan leh nihdan dik tak chu a ni e.

1. 2004 : Bawngkawn kawng pengthuam zauhna turin Pi Lalthai w/o Lalrinmawia (LRM) ram Chaltlang Lily veng huamchhunga awm chu Sorkar in kum 2004 khan a neitute a be tan.

2. 2005 : Ram neitu Pi Lalthai chuan a ram LSC No.10312/01/631 of 2002 chu kum 2005 khan Sorkar hnenah a hlan.

3. 2005 : Ram bigha 0.08 (Square meter 133.04) a zau, kawngpui zauhna tur atan Pi Lalthai hian a hlan vangin Sorkar in PMGSY kawnglaih cheng nuai 297.84 man (Tuivai lui kam ami) chu pek nia sawi a ni.

4. 2005 : Kawngpui zauhna tura mimal in Sorkar kuta a hlan LSC No.10312/01/631 of 2002 chu MNF Gen. Headquarters president hminga Land lease siam a ni ta daih a. A No. chu 117 of 2005 a ni.

MNF General Headquarters President hminga he land lease siam a nih hian Certificate of Land Lease ah terms and condition felfai tak siam a ni a. Chuta point pawimawh deuh deuh te chu:

(a) Kum 25 atan ( kum 2030, September ni 11 thleng) he land lease hi siam a ni a, a tawp hunah tihnun (renew) theih a ni ang.

(b) Ram chu a pumpui emaw, a then lai emaw hralh, midang kuta pek/hlan phal a ni lo.

(c) Ram chu hman tangkai anih loh chuan a neitu in Sorkar hnenah a hlan/pe tur a ni.

5. 2015 : MNF General Headquarters president hminga land lease dah No. 117 of 2005 chu kum 2015 khan Dr.Don Sapremmawia Halliday s/o H.Sapthangliana Halliday chuan Lalrodingi d/o R.Lalthangliana of Mission veng hnenah Rs.1,50,00,000/- in a hralh.

6. 2015 : Hemi kum tawp lam hian he ram leitu Lalrodingi chuan ram hralhtu Don Sapremsanga hnenah ram man cheng nuai 150 hi a pe/hlan.

7. 2016 : Kum 2016, March ni 15 ah khan Don Sapremsanga hian a ram hralh lehkha pawimawh vel chu ram leitu Lalrodingi hnenah a pe/hlan.

8. 2016-17 : Mizoram Sorkar UD&PA department chuan Bawngkawn kawng pengthuam zauh turin hma a la. Hetah hian helai ram Sorkar (MNF sorkar) MNF party leh mimal thenkhatin an lo tih kual dan hriatchhuah a ni.

9. 2017 : Sorkar in Bawngkawn kawng pengthuam zauh a tum vangin, MNF General Headquarters president hminga Land lease siam, Terms and Conditions, Land Revenue & Settlement department record chu ram leitu Lalrodingi hian a hreve chauh.

10. 2017 : Sorkar in helai ram hi kawngpui tih zauh nan hman a tum tih thawm a hriat vangin Don Sapremsanga Halliday hnen atanga ram leitu Lalrodingi chuan a ram lei chu holam taka chàn a hlauh vangin a ram leina man zat cheng nuai 150 compensation pe turin April, 2017 khan Sorkar hnenah dilna a thehlut.

11. 2017 : Helai ram chungchang hun rei tak thil inthup tlat, mi thenkhat leh political party pakhatin an zep tlat chu Mizoram mipuiin an hre ta vek. Chumi thil inthup tlat thinah chuan dan bawhchhiatna tam tak awma hriat anih anih vangin chhuichiang turin Pu Lalthanmawia, Zemabawk chuan ni 11.Sept.2017 khan Bawngkawn Police Station ah FIR a theh lut.

12. March, 2018 : A tir atanga kawng pengthuam zauhna tur ram, Lalrodingi' n cheng nuai 150 a Don Sapremsanga Halliday (Pu R.Tlanghmingthanga makpa) hnen atanga a lei chu Sorkar in cheng nuai 150 pe in a laklet sak leh.

13. March, 2018 : Kawngpui pengthuam zauhna tur ram pass sorkar kuta a luh leh tak vangin Sorkar in pengthuam zauhna tur hna a tan nghal.

THIL MAK MIZORAM MIPUITE HRIAT NGEI NGEI TUR AWMTE CHU :

1. Sorkar thil tih dan, mi thenkhat leh political party pakhatin an zep tlat, kum 10 hnu a mipui ten an hriatchhuah hi Mizoram ah a vawikhat thlenna a ni.

2. Mimalin kawng zauh nana Sorkar hnena ram an hlan political party president hminga Land lease siam tak daih mai hi Mizoram ah a vawikhat thlenna a ni.

3. Land lease siam laia Terms & Conditions a inziak midang hnena hralhpek/hlan phalloh tih nisi Dr.Don Sapremsanga Halliday in a hralh daih mai hi thil mak tak a ni. Dan bawhchhiatna lian tak niin a lang bawk.

4. Sorkar hian a mamawh mimal thil, bungrua emaw ram ani emaw hnathawh tur (contract/supply) nena a thleng hi dan in a phal em? Hetiang thil hi a lo thleng tawh thin em?

5. Land lease siam laia Terms & Conditions ah hian ram hi hman tangkai anih loh chuan sorkar kutah hlan tur tih a ni a. Nimahsela helai ram hi Sorkar hnena a luh hnu leh MNF president kuta kum sawm chuang a awm in hman tangkai a ni miahlo a, MNF president hian engatinge Sorkar hnenah/kutah a hlan loh ?

6. MNF president hminga land lease siam hi MNF president kuta awm tura ngaih anih laiin engvangin nge MNF Vice President Pu R.Tlanghmingthanga makpa nia hriat Dr. Don Sapremsanga Halliday kutah hian a awm daih theih?

7. He thil diklo tak nia lang hi Mizoram mipui ten kan hriatchhuah vek hnu hian MNF party hi mihur hauh an sawi ang maiin engmah sawi lovin a ngawi tlat mai a. Hei hian he thil chanchinbu a kan lo hmuh hi thudik niin a nemnghet a. MNF party hian engmah sawi tur an neilo tihna a ni thei em? Dikloh na kan neilo, intih hmingchhiatna a ni tiin Court ah an kal ngam dawn em?

8. MNF sorkar khan hetianga thil diklo tak anga lang, thup tlat ngai ang chi hi thildang tih an nei nual em? Mipuite hian hriat chhuah leh hmuhchhuah tur dang engzat nge kan la neih ang?