Kohhran leh Khawtlanga inhmang lo kan duh !

By Lalremliana Pachuau

Aizawl lama Pvt Company lam chuan hnathawk tur an lak dawnin kohhran leh khawtlanga mi inhmang lo an duh thu an sawi lang ta hial a. Lungleiah pawh dawr nghakah tiang mi an duh loh thu an sawi ta bawk hi a mak lem lo.

Mizote hian sakhuanna hi kan han kalsualpui nasa khawp a. Ofis lama hnathawk tura hlawh neia sawrkarin a rawih ni si kha, kohhran thiltih vangin a hna chawl zutin a bo fo a. Pathian rawng bawlna emaw kan la han ti zui a.

Ţhalai ni si kha a hnathawhna lamin kohhran ţhalai thiltihna lama a penkual sek avangin rawih hleih theih a ni mang lo a. Hei hi Zorama rawngbawl dan kan tih pakhat niin min kalsualtir nasa êm êm a. Kan harh har ngawt a ni.

Pathian rawngbawl dan dik zawk chu a eizawnna hna rinawm tak leh dik taka thawh mai kha a ni tih hi kan nunpui duh mang hlawm tlat si lova ni. Upa Officer, hnathawh hun chhûnga chhuak sekte hian an biak Pathian an phatsan tihna daih a nih hi.

Kan eizawnnain a tawrh dawn ai chuan kohhranah inhman dan tawk thiam hi a hun ta. Zaipawl member ni chunga nitin pisa kai emaw dawr nghah emaw hi a Pathian thu lem lo. Nang aia awlthawng zawk khan hla chu zir mai se. Nang erawhin rinawm leh fel taka awmin tih kha sa lovin i hnathawhna hmunah nunpui mai zawk rawh.

YMA OB ni chunga sawrkar hna thawh hi a inrem lem lo. Bang mai la, i hunawlah YMA member i nihna lantirin i hnathawhna hmunah YMA takin tlawmngai zawk mai rawh. Kohhran ţhalaia inhmang duh i nih chuan i thawh awm tawk a vâng tawh hle ang.

Tun hma anga inhriatthiamna thûk tak awm ţhin kha hman theih a ni tawh lo. Aizawl hi 24/7 sumdawnna panin chak takin a kal fua fua tawh a. Chutih laiin kohhran leh ţhalai prawkremin kiam lam a pan thei chuang lo. Eizawngtu ni chunga kohhran leh ţhalaia inhman kawp hi a rem lo tial tial dawn tawh tlat a ni.

Ei kan zawnna leh hnathawhna hmuna rinawm leh fel taka Pathian thu anga awm kha Pathian rawngbawlna ropui tak a ni ve tho tih hi hriat tur a ni. Kohhran leh biak in pawnah hian i dinhmun leh nihna ang angah rinawm leh fel taka awm a, hman huna inkhawm a, fellowship kal a, zai a huna zaia Pathian rawng kan bawl hun a ni ta.

A hnathawhna khawih buai zawnga kohhrana inhmang miin a nihna bansan ngam kan tam hunah a thawhpui mite'n a nunah eitur an hmu tial tial zawk tawh ang a. Hnung lamah kawka innuih tet tet pawh a kiam sawt tawh bawk ngei ang. Hawh u, Pathian ang takin, lemchang der kual vel tawh lo hian i harh tak tak tawh teh ang u.