THEIHAI THATNA TE

1. Theihai tam lai tak a ni bawk a, khaw'nge, Gilead Thinghnai(Hriselna lamtluang) Lehkhabu-a Theihai ţhatnate lo share teh ang. Taksa tan a ţha si a, a tlawm bawk a. Kan rama theihaite hi, rannung thahna hlo leh preservatives hmanga sawngbawl loh a ni tlangpui bawk a. A hun lai chuan ei ţiah ţiah mai tur a ni. 

Theihai hi thei zawng zawng lalpa, King of fruits ti-a hriat a ni a. Taksa tana ţhatna a ngah êm avanga phuah a ni. Theihai hi cancer veng theia ngaih a ni a, taksa rihna tihhniam nan theihai a ţangkai a. 

Theihai hian thisena thlum awm tur zât a thunun thei a, Theihai hian chaw pai ţawih a pui a, vun a tifai thei a. 

Theihai no khat (225 mg) hian...

195 calories, Antioxidants leh natna dotu khawl tichak thei vitamin C za a sawmsarih paruk (76 %) vel, Antioxidants leh mit tana ţha vitamin A zaa sawmhnih panga (25 %) vel, Hormone tih chhuah puitu leh lung natna veng thei vitamin B 6 leh a vitamin B dangte zaa sawmpakhat (11 %) vel, Probiotic fiber zaa pakua (9 %) vel,Enzymes hrang hrang puitu leh thisen siam chhuah puitu copper zaa pariat (8 %) vel, Taksaa sodium tam lutuk tur vengtu leh lung hriselna atana ţha potassium (7 %) leh magnesium (4 %) vel... a pai a. 

Theihai hian antioxidants - quercetin, isoquercitrin, astragalin, fisetin, gallic acid leh methylgallat a pai a. Hengte hian rilpui, hnute, thisen leh mipa chi bâwm cancer a veng theia ngaih a ni a. Theihai hian vitamin C, pectin leh dietary fiber a pai avangin thisena cholesterol awm zât a tihniam theia ngaih a ni a. 

Theihai tharlâm hian potassium a pai tam a, lung hnathawh puiin blood pressure a vawng dik theia ngaih a ni a.Theihai hian hmaia vun kaw hnawhtu bawlhhlawh thianfaiin hmai a tilang fai a. Vun chi hrang hrangah hnawih mai theih a ni a. 

Theihai zai lêp a, hmaia hnawih a, minute 10 aţanga minute 15 hnua hmai phih fai leh mai tur a ni. Theihai hian tartaric acid leh malic acid pai tamin citric acid tlem a pai a. Hei hian taksaa alkali dah ţhat zât a vawng a. Theihai hian vitamins bakah dietary fiber leh taksa mamawh min tipuar rei thei chi a pai tam a. Hei hian chaw pai ţawih a pui bakah taksa rihna tihhniam nan a ţangkai a. 

Theihai hnah tlem chhum a, zankhuaa daha a tûk zinga a tui in ţhin hian thisena insulin awm zât tur a vawng dik theia ngaih a ni a. Theihai hian iron pai tamin calcium a pai bawk a. Hei hian thisen tlakchhamna a veng thei a, thisen tlachham tan a ţha a. Hmeichhe nau pai leh thi hul tan iron, calcium, vitamin leh minerals lâk luhna ţha tak a ni a. 

Theihai hian kala lungte insiam tur a veng theia ngaih a ni a. Tin, chips hrang hrang zingah theihai aţanga siam chips ei tam ila a hrisel zawk a. Zâna tui luma theihai hnah 10 aţanga 15 vel chiah a, chhin phui a, a tûk zinga in ţhin hi pum tan a ţha a.Theihai hian vitamin A a pai tam a. Theihai zailêp no khat hian vitamin A kan mamawh zât zaa sawmhnih panga (25 %) min pe thei a. 

Theihai hian khaw hmuh a tifiah thei a, mit ro leh zâna thil hmuh theih lohna a veng thei a. Theihai hian protein tikeh sawm thei enzymes a pai a, chaw pai ţawih puiin ril a tihrisel a. Theihai hian vitamin A, vitamin C leh carotenoids a pai tam a. Hei hian kan taksain natna a do lêt theihna khawl a tichak a. 

Theihai densawm, khawizu lehbawnghnute chawhpawlh hi body scrub-na ţha tak a ni a, vun a tinêmin vun a tinalh thei a. Theihai hian protein chi khat glutamic acid a pai a. Rilru sawrbing theihna leh thil hriatreng theihna a tichak thei a ni. Theihai leh thil eng pawh, vawi khata ei ţeuh loh tur a ni a. 

Theihai ei tam lutuk hian kua a tiţha lo thei a.Zunthlum natna nei chuan theihai hmin leh thlum ei tam loh tur a ni a. Theihai hnai hi huat (allergic) theih a ni a. Vun thak leh bawl a thlen thei a. 

Theihai up hmin nan carbide hman fo a ni a. Hei hi hriselna atan a hlauhawm thei a, lei fimkhur tur a ni. Phai aţanga lo lut theihai aiin Mizorama kan thar chhuah ngei hi a hrisel zawk a, thlan zel tur a ni.