BANK ACCOUNT ATANGA PAWISA RUK TUMA INBUMNA ATANA HIMNA

September20.2018.

Mizoram police chuan tunlaia phone call hmanga inbumna a hluar hle thu sawiin bank account atangin pawisa tam tak ruk chhuah a ni tawh tih an sawi a. Heng inbumna laka him theih nan a hnuaia mi hi zawm turin mipui an ngen:

1. Phone kaltlangin, mi i hriat ngai hlohin i BANK ACCOUNT NUMBER emaw, ATM card emaw a thi dawn tih an rawn hrilh che a nih chuan awih suh.

2. Phone kaltlangin mi tu pawhin i ATM Card rawng eng chi kha a rawng pawl chi-ah thlak a ngai tia ATM Card number pawh dik thlapa rawn sawiin, i phone-ah confirmation code a rawn thleng ang a, chu chu min rawn hrilh rawh an tih che chuan hrilh ngai suh ang che.

3. State Bank of India emaw, bank dang emawa i account hawnna bank atanga rawn call che ni awma insawi an awm chuan i ATM card number emaw, PIN emaw, a hnung lama inziak emaw, Password emaw pawh hrilh lo vang che. Bank reng reng hian an customer-te phone-in an be ngai lo tih hre reng ang che.

4. I hriat lohin i bank account number emaw, ATM card number emaw an dil che a nih chuan hrilh suh.

5. I mobile phone-ah SMS-in One time password (OTP) number a lo thleng a nih chuan tumah hrilh suh.

6. Hetiang phone call emaw, message emaw kan dawn chuan inbumna a ni tih hriain chhan duh loh emaw, engmah hrilh loh mai tur a ni.

7. SMS emaw, email emaw hmanga Lottery emaw, Hna (Job offer) emaw, Thilthlawnpek (Gift) emaw i dawng a nih chuan inbumna a ni tih hria la. Pawisa engmah thawn ngai suh ang che.

8. Facebook emaw, Whatsapp leh social network dang emaw atanga i hmelhriat ram dang miin thilthlawnpek rawn pek che a tum a nih chuan inbum tumna a ni tih hriain hnar zel ang che.

A rawn thawn lui che ni anga a insawi a nih phei chuan inbumna a ni tih hre nghal la, sum engmah a tlanchhuahna turin pe suh ang che.

Bank account hi amahin a thi ngawt thei lo va, a thi (dormant) a nih pawhin account-ah pawisa dah luh emaw, lakchhuah emawin a nung leh nghal mai thei a ni.

Bank account chung chang ah buaina i nei emaw hriat chian duh i nei a nih chuan account i neihna bank-ah nangmah ngei kalin thu i zawtfiah thin dawn nia.