INDIA RAM TAN A BAWNGHNUTE HNIANGHNAR TAKA AWM TIT TU CHU

- Familia Fanai Lalṭansanga

Vawiin hi ka mi ngaihsan em em, India ram bawnghnute tihnianghnartu , father of white revolution an tih hial , Dr. Verghese Kurien piancham a ni a. Verghese Kurien hi fak tlak, chawimawi tlak pa ropui tak chu a lo ngei e.

Kan hriat theih dan awlsamberah chuan AMUL (Anand Milk Federation Union Limited), NDDB leh Institute of Rural Management Anand dinchhuaktu a ni a, India ram hi bawng pathian hial Hindu ram a nih angin bawng hi a tam em em ringawt mai a, chutichung chuan bawnghnute in tur leh ei tur ram dang atang chawkluh a ngai fo thin a.

Mak tak maiin America ram Michigan State University atanga Master of Science in Metallurgical Engineering (Distinction) zirchhuak Kurien hian Gujarat Co-operative Milk Marketing Federation (GCMMF)-a chairman a nihna atangin AMUL hi a rawn dinchho ta a, bawnghnute dehchhuah tam lamah America ram chu 1998 kum atang khan India hian a khum thei ta tlat mai a nih chu! Mak tak a ni. A hmalak dan a that em avangin Prime minister LalBadur Shastri khan 1965 kum khan National Dairy Development board dinin chutah chuan Dr. Kurien hi chairman-ah a dah a, cooperative movement hmangin India ram khaw chengker ber thlengin bawng leh lawi vulh leh a hnute lakkhawm dan a tichhuak ta a, Keini Mizoram ang ram kilkhawr berah pawh Anand pattern bawng vulh leh bawnghnute lakkhawm atangin bawnghnute kan lo hniarhnar ve phah ta a ni.

A chawimawina dawn hi ziak ta mai ila, a ropuizia a lang chiang ber mai awm e.

1999 Padma Vibhushan[ by Government of India

1993 International Person of the Year Award by World Dairy Expo

1991 Distinguished Alumni Award by Michigan State University

1989 World Food PrizeWorld Food Prize,by USA

1986 Wateler Peace Prize Award by Carnegie Foundation, the Netherlands

1986 Krishi Ratna Award by Government of India

1966 Padma Bhushan by Government of India

1965 Padma Shri by Government of India

1963 Ramon Magsaysay Award by Ramon Magsaysay Award Foundation

Vawiin hi Dr.Verghese Kurien (1921-2012) piancham vawi 94-na a niin a damchhung khan India leh khawvel ram hrang hranga University te chuan degree 15 lai an hlan bawk a ni.

Mizoram hi hnim hring tamna ram a nih angin hawina lam apiang mai hi bawng chaw hlir bawng chaw hlir a ni mai a, Tuipang atanga Vairengte inkar National High Way kawngsir tawn tawna luang leh hnim hring zozaite hi bawngpui kaltlangin bawnghnute-ah, sumah chantir theih a ni a,a nachang kan hre lo nge thingtlangah pachhia kan la tam em em mai zawng a nih hi!

1994 kum Mizo leh vai intihbuai lai khan kan bawnghnute lakna Nepali pa mangang khan a bawngpui 4 min leitir a, tawngtaina dil chu sawi loh, mumang lam pawha ka la man ngai loh leh ka lo tum ngai reng reng loh bawngpu ka lo ni ta a. Lehkhabu ka chhiar nasa a,ka inzir nasa bawk a, kan bawngpui Rangi leh Hangi kha an lo tha kher bawk a, kum 1 leh a chanve hnu-ah 1996 kum khan Gypsy ka lei thei ta der mai a, kan fapa naupang ke pan reng, anti-biotic inchiu ngai reng thin kha nitin bawnghnute no khat a in ziah avangin a dam ta hlauh bawk a. Kei hritlang benvawn nei, engemaw hleka vawm bei thlawp anga hritlang hnap tui reng kha zing khuantevik atanga ka chet tam tak avangin ka hritlang benvawn chu lak bo ang huaiin a dam ta viah bawk a. 

Vetty Department lamain min tuipui bawk a, Biogas te min siamsak avangin bawngek mai ni lo, bawngzun thlengin kan hmang tangkai thei ta a, huan thlai thar lam tak tak kan ei reng thei ta bawk a, tunthleng hian zunthlum leh thisen sang an tih hi Ki a nei em tih pawh ka la hre lo reng reng mai a. Bawng atanga chhuak reng rengah hian a tangkai lo awm chhun chu a bu ri chauh hi a ni an tih hi a dikzia a taka hmutu ka lo ni ve tawh a, Nepali@gorkhali kan tihte ai hian Mizote hian bawng vulh pawh kan lo thiam zawk hle a ni tih pawh hmuchhuak ve-in ka inhre bawk a ni.

Dr.Verghese Kurien hnathawh avangin India ram hmeichhia a maka maka tamin bawng vulh atanga sum hnar an lo nei ta pawh hi ‘Mission’-a chhiartlak a ni mai lo em ni? ka ti ta hial a ni.

Blog min share sak la minlo subcribes ve dawnnia. Enjoy.