HMEICHHE IAS NAUPANG BER

28.5.2020 Indian hmeichhe IAS naupang ber chu Hyderabad-a chêng Smita Sabharwal a ni. Smita chhuahna bul chu West Bengal state-a Darjeeling a ni. A pa chu Col. P. K. Das a ni a; a nû chu Purabi Das a ni. Col. P. K. Das hi sipai officer a nih avàngin India ram hmun hrang hrangah an awm kual tawh a.

 Smita chuan Class IX aṭangin Hyderabad-ah lehkha a zir a; Class XII chu St. Ann’s Merredpally, Hyderabad aṭangin a pass a. Class XII (ICSE Board)-ah pass-in an páwlah chuan pakhatna a ni. Hyderabad-a St. Francis Degree College for Women aṭangin Commerce-ah graduate a ni.

 IAS ni tùra a inbuatsaihnaah a thawk rim hle. Ni khatah dârkâr 6 vél lehkha a zir a; dârkâr khat a infiam ṭhin. Chanchinbu leh magazines ngun takin a chhiar ṭhin bawk. A Optional papers ah Anthropology leh Public Administration a hmang. A vawi khat Civil Services Examination (CSE) beihnaah Prelims-ah a fail ve khauh tlat! CSE a beih vawi hnihna 2000-ah erawh chuan All India Ranking (AIR)-ah 4-na a ni ta thung; chu chauh chu ni loin Indian hmeichhe zíngah IAS naupang ber a ni bawk.

 Smita Sabharwal-i chu a lan dànah chuan mi changkâng tak hmél a pu lo. Hna thawk nasa mi a ni a; hlawhtlinna tam tak a nei tawh. India rama hmeichhe IAS naupang ber a ni mai lo a; Telengana Chief Minister office-a hmeichhe IAS thawk hmasa ber a ni.

 Smita Sabharwal hi a hmingah ‘People Officer’ (Mipui Officer) an vuah hial tawh. A hna thawh ṭhat avàngin làwmman tam tak a dawng tawh. ‘The Youngest Entrepreneurs in India’ tih a hlawh tawh bawk. Kurnool leh Hyderabad-ah Joint Collector-in a awm tawh a. Kum 2011-ah Karimnagar-ah District Collector hna a thawk a; chutah chuan hrisèlna leh zirna kawngah hna ṭha tak a thawk a. A hna thawh ṭhat avàngin ‘Prime Minister’s Award’ a dawng nghe nghe a ni.

 Smita Sabharwal’s Achievements / Awards:

 (1) Indian Express Devi Award – 2015, for Innovation and Dynamism.

 (2) e-India (e-Health Category) Government Digital Initiative – 2013.

 (3) Chief Minister’s Award for the Best District in the 21 Point Flagship Programme in 2011–12.

 (4) Chief Minister’s Award for the Best District in the 20 Point Flagship Programme in 2012–13.

 (5) Recipient of “Platinum Award” worth ^ 10.00 Lacs under District Category sponsored by Information Technology & Communication Department for the best e-Governance initiatives taken up at the district for the year 2012–13.

 (6) Nominated for ‘Prime Minister’s Award’ under the individual category for excellence in public administration in best district initiative “Ammalalana” programme in erstwhile united Government of Andhra Pradesh.

 Mi fate hi chuan tih tak zeta an tum chu an ti hlawhtling nge nge ṭhin. Keini Mizote hian kan hnam chhan chhuah nân theih tàwpa kan beih a ngai tak zet a ni. IAS, IPS leh Central Services-ah tam tak lût ila, India ram states hrang hrangah sawrkar policy maker kan ni ang a; Central sawrkarah pawh chutiang tho chu kan ni ang.

 Mizo fate hi India ramah kan inzâr pharh nasa ve ta hle; chûngho tân chuan Mizo Officer awm apiangte kha mi ṭangkai tak an ni zêl ang. Tûna Covid- 19 hripui léng boruakah pawh India ram hmun hrang hranga Mizo officers awmte chu an ṭangkai teh asin. Ka hriat ve chhunah mai pawh—Chennai-ah R. Lalvèna IAS leh Grace Lalrindiki Pachuau IAS, Hyderabad-ah Dr. Franklin Laltinkhuma IAS, Jharkhand-ah Lalbiaktluanga Khiangte IAS, West Bengal (Siliguri)-ah Joseph Lalrinsailova (IPoS). Mi dang an awmna ka hriat mai lohte pawh an awm mai mai bík hauh lo ang; kei awm hmuna ṭhu ringawt hian mi dang hna thawh ṭhat ka hre kim thei lo hi pawi ka ti hle.

(Revd CHṬ—28.5.2020)

Blog min share sak la, min lo subcribes ve dawnnia enjoy.