MAK LEH DANGDAI LAWRKHAWM

Thil mak tak tak lawr khawm leh dawn ang hmiang. 

@@. Rûlin chhungkua tibuai nasa:

Idaho hmuna Chhungkaw pakhat, Bena leh a nupui Amber leh an fate 2 chu rulin a tibuai hle mai. An awmna hi hmun fal deuh reih rawih a ni a. Thlasik lai a ni kher bawk a, khua a vawt hle. He In an luah zan aṭang hian a khat tawkin rul an rawn lut reng mai a. A changin chhuatah an lo awm a, skirting karah te, bangah te an lo awm reng ṭhin. Khuma an lo awm nawlh chang te pawh a awm. Nitin rul thah loh an nei lo tih theih a ni. Ṭumkhat phei chu an kawtzawlah an lo tleng mur mur mai a, a ṭhen an that a, a ṭhen an tleng bo leh bawk. Heng rûl te hi an lian lem lo va, feet 2 vela sei an ni tlangpui. Chutianga rulin an luhchilh reng mai chu mak an ti hle a. An luah aṭanga thla 3 na ah an insawn leh ta nge nge a ni. Rul an that hnem hman viau niin an sawi.

A hnua mithiamten an rin dan chuan Bena te In awmna hi Rulin hmun lum zawk an pan khawm emaw inthlahchhawn nan hman an duh vang a nih an ring ta ber a ni.

..

@@. *Varak vangin Traffc Jam:

Kum 2013 Aug. 15 (vawiin ang chiah) khan England rama Surrey hmuna Highway A3 chu motor veivak an tam lai takin Varak rual kawng kan turin an tibuai mauh mai. 

Varak rual 50 chuang zet mai chu an kal muang si, a ṭhen an let leh, a ṭhen lah kawng kan ta mai lo chuan kawng dung an zawh ve bawk. Police duty ten Varak Chaw rang taka leiin kawngsirah chaw chah hmangin an hruai chhuak thei ta chauh a ni.

..

@@. *Inchhanhimna mak tak chu:

British Columbia hmuna Goldstream Provincial Park ah Lydia Bigras leh a a ṭhiante chu uite kum 4 a upa hruaiin an leng kual a..Cedar kung lian tak hnuaia an ṭhut lai chuan an uite chu an lokalna lamah thil hmuh nei niawm takin a tlan kir ta daih mai a. An uite koh kir tuma an kalsawn aṭanga Seconds 30 velah an ṭhutna bula Cedar kung lian tak chu a tlu dawp mai. An ṭhut lai kha la nise chuan a vaw hliam nual ang a, nunna chan pawh an awm maithei a ni. Ui kha a tlan kir danah Cedar tlu tur hre lawk chi a ni si lo, hmun hla tak ena tlan kir a ni si a. An ui hruai an vanneihpui ta a ni ber mai.

..

 @@. *Dolphin ṭangkai:

England rama Devon tuipui kamah Lucy Watkins leh a pu chu Lawngin an inkar kual vel a. Chutih lai chuan Dolphin lian zet mai hi a rawn lang nawlh mai a. A hnu reilote ah a bo leh nghal. An inkar kir dawn lai tak chuan Dolphin chu rawn lang lehin Sangha kg 5 vel zet mai a rawn pu a, an lawngleng chhuatah chuan a rawn dah tawp a, a bibo leh nghal daih. Chu Dolphin fing tak chuan Sangha lian ṭha tak a rawn present a lo ni reng mai.

..

@@. *Ka Pa Piancham pual:

Vawiin Dt.15.8.2019 hi Ka pa C.Lallungmuana piancham vawi 80 na a ni a. Mi pa te tluk lo mahse kan chhungkaw tan chuan khawvela pa ropui ber leh innghahna a ni reng. Sawrkarah hna hniamte thawkin 1999 khan a pension tawh a. Pathian zarah a hriselna a ṭha angreng a. Vawiin thlengin Thlai kumhlun kan dahna Huan a la fang reng peih a ni. Ka nu nen hian 1963 ah an Innei a. Ka nu pawh Pathian zarah a hriselna a la ṭha ve hram hram zel e.

Ka pa Birthday puala Post siam ngei ka duh si a. Chuvangin tun ṭuma ka post buatsaih hi ka Pa Piancham pual ni rawh se.

..

@@. *Ui fing leh hmantlak tak chu:

USA Georgia State a Suwanee hmuna cheng chhungkaw pakhata an fanu kum 7 a upa Meghan Weingarth chuan Peanut allergy a nei tlat mai a. Peanut a ei apianga a buai ziah avangin peanut telna chi eitur reng reng lakah an fimkhur hle. An fimkhur sen loh avanga a lo ei tel palh pawh a awm fo. Mahse an Ui vulh LilyBelle chuan a lo hrethiam ve tlat. Meghan eitur apiang chu lo hnim vein peanut kaihhnawih a tel leh tel loh a lo check hmasa ta ṭhin a ni. Uluk tawkin a hnim kual a, peanut telna chu a hai chhuak mai ṭhin. An uiin a eitur a check ṭhin aṭang chuan allergy vanga buaina a nei ngai ta lo a ni.

..

 @@. *Awle in dang chat rei:

New Zeland pa pakhat Ryan Blair chu Tuipui ah Lawnga inkarin thliarkar a va thleng a. Chu thliarkar aṭanga a kir leh tur chu vaukamah Awle lian zet hian a lo chang khur mai a. Khawmualah a kir leh a, lawnga inkar a tum apiangin Awle chuan a lo hmu hman ziah a, a rawn pan hruau hruau zel. A buai hle a ni. Km 4 vel zeta hla inkar kai tur chuan Awle in a rawn tibuai hman dawn chiang si a, chutianga hun a hman tak reng avang chuan khuain a thim hnan ta hial a ni. Tihngaihna dang awm ta hek lo, Chhanchhuaktu tur zawngin êng a chhuah ta ringawt a. A êng chhuah chu hmuin Lawng lian zawk hmangin an rawn chhanchhuak ta a ni.

..

@@. *Mitdel chhuanawm:

Texas State a Emory khuaa cheng kum 15 a upa Charlotte Brown chu mit khinghnih del a ni a. Pole Vault inelna ah a tel ve tlat lawi si.

Naupang te a nih lai aṭanga inzir chho zel a ni a. Tlan dan tur, mau tlawn hmanga invawrh hun tur leh a zuan san tur lam chu Coach ten an hrilh mai ṭhin a. Inelna ah erawh lo hrilh theih a nih loh avangin a tlan thui zawng, zuan ṭanna tura pên ngai zat te chu aman a chhiar ta mai ṭhin a ni. An zuan khum tur san lam erawh an puang ṭhin.

Kum 2013 khan State Championship ah a tel ve ta a. Hemi ṭum hian Feet 11.6 zeta sang a zuan khum ve a ni. Mitvar tam zawkin kan tih theih loh chu he tleirawl khaw hmu thei lo hian a ti thei chiang mai.

..

@@. *Fa nei thei upa ber:

India chhim lam Sonipat khuaa cheng putar Ramajit Raghav chuan kum 2012 khan kum 96 a upa niin chi a la thlah thei / peih tlat.

Kum 2000 khan kum 84 a upa niin kum 44 mi Sahkuntala nen an innei a. Kum 2010 khan an fa pakhatna piangin hetih lai hian Ramajit chu kum 94 a upa a ni tawh. An fa u zawk a pian aṭanga kum 2 na 2012 khan an fa pahnihna a piang ve leh a ni. 

Ramajit hi Huan Thlai siama eizawng niin khawvel mipaa chi thlah thei upa ber nihna a hauh a ni.

..

@@. *Vawih uih vangin rorelna buai:

Kar hmasa Nilaini Aug, 7 khan Africa khawmualpuia ram pakhat Kenya a Homa Bay County Assembly ah Member pakhat Juma Awuro chuan thu a sawi laiin Speaker, Edwin Kakach chuan member pakhat vawih uih lutuk avangin a thusawi lai a tih tawp sak.

Speaker in a thusawi a tihtawp chhan chu member te inhnial laih laih thâwm a hriat vang a ni. Inhniala an rik hlut chhan a zawh chuan Member pakhat, Julius Gaya chuan, "Pu Speaker, kan zingah hian vawih uih em em mai an awm a, a hrehawm hle a ni. Tunge vawih tih pawh ka hria," tiin a chhang a. Vawihah an lo inpuh kual nasa hman hle a ni.

Vawiha an puh rawn ber chuan 'Hetiang hian ka thawhpuite bulah ka vawih ngai lo reng reng' tiin a ṭang tlat thung. Khua a lum bawk si a, member te chu lehkha remchang apiangin an inzap nasa hle a ni. Speaker pawh chuan a rim a hriat meuh chuan, "hetiang vawih uih lutuk rim leng velah hian engtin nge kan inkhung reng theih ang," a ti chhuak ve ta hial a ni. Staff te hnenah Room boruak tihthianghlimna a chah nghal a. Vawih rim an tih reh fel hma chu rorel an ti tawp lailawk a ni.

..

MAK LEH DANGDAI BÂWM 

(FACEBOOK GROUP)

Share and subcribes. Enjoy.