Hriselna lamtluang NERVE (Hriatna thazam

Nerve kan tih hian kan hriatna thazam sawi nan kan hmang deuh ber a, heti hian sawi ta ila, nerve hian electric hrui ang hian kan taksa pum pui hi a zam chhuak vek a, chu chuan kan hriatna tinreng hi kan thluakah rang taka thawnin kan thluak chuan a lo thliar hrang ta thin a ni.

Nerve chi hrang hrang Science subject la chuan an zir thin a. Kan taksaa nerve kan tihte pawh hi hlawm lian pahninah then an ni tih hi kan hriat ve a tha.

1) Central nervous System ; Thluak leh hnungzang ruh (spinal cord) hi a ni.

2) Peripheral nervous System; Thluak leh hnungzang ruh bak, kan taksa (nghawng, kut, ke, kawchhunga kal, phing, lung leh a dangte) peng hrang hrang nerve te hi a ni.

NERVE natna thenkhat:

Kan taksa peng hrang hrangte ang bawk hian kan hriatna thazam (nerve) te pawh hi natna hrang hrangin a tlakbuak thei a, a nghawng dan leh a nat dan te pawh a thlentu azirin emaw tam takin a danglam thei a ni.

SCIATICA -

Sciatica kan tih hi kawng ruh (hnungzang ruh) dik lo vanga awm a ni a. (sciatica nerve) dik lo sawina mai a ni a, hei hian kawng achin hnuai lamah harsatna a siam a, mawng bawr na, ke na emaw mu chum chum thlengin a lang chhuak thin. Damdawi hmanga enkawl a ni thin a, a lo nasat tawh chuan zai a ngai thin. Damdawi leh zaia enkawl bakah hian (physiotherapy) fi-zia-the-ra-Pi) hmangin enkawl a ni thin bawk.

STROKE -

Stroke thlen chhan tam ber chu BP (Blood pressure) dik lo vang a tih thei awm e. Kum upat lamah a hluar lehzual a. He natna ve thung hi chuan taksa a nghawng nasa thei hle a, pangkhing zengte, kut emaw, ke emaw che tha thei lovin mi a siam thei.

NEUROPATHY -

Nerve natna lar tak pakhat chu (Neuropathy/peripheral neuropathy) hi a ni. Vitamin B tlakchham vangte, zunthlum vei vangte, natna hrik hnathawh avangtein he natna hi a awm thei a. Kut leh ke a chak lovin a chawmawlh a, a mu chum chum tih ang chi te pawh hian a awm thin. Ke aikherh te, chawntha chat te pawh a awm fo vang. Kut leh ke hmawr atanga intanin a nasat ang zelin a fan chho ve tial tial thin a, kut leh ke zeng hial khawpin taksa a sawp thei. He natna hi zunthlum (Diabetes) nen hian a inzawm hle. Zu in thin leh zuk leh hmuam ti nasa ziangah a tam lehzual niin mi thiamte chuan an sawi. Ruih theithil laka inthiar fihlim ngei ngei tur a ni.

CERVICAL SPONDYLOSIS -

Hetah hi chuan nghawng ruhah ve thung dik lo awmin chu chuan na a siam ta thin a, sciatica ang deuh khan ban leh dar lamah ve thung nain, kut hmawr thlengin a fan thin a, ring na, dar na te pawh a siam nasa thin hle. Rit lak, lukham sang kham, thutthlengban khama mut, accident te hi a thlentu langsar zualte an ni.

NERVE natna laka inven dan thenkhat!!!

Taksa tana tha lo ruih theih thil leh hriselna atana tha lo thenkhat kan tar lante pawh hi kan tih loh a tha hle ang.

1. Meizuk hi insum a tha hle. Meizialah hian (nicotine) a awm a. He tur hian kan hriatna thazam tan a tha lo hle.

2. ZU hi (neuropathy) kan tih nen hian nasa takin a inkaihhnawih a. ZU in thin tan chuan taksa sawizawi (exercise) a, thlan titlak a tha hle.

3. Mi thiamte sawi dan chuan Kuhva hian (nerve) tha lo a thlen thei a. Kan insum theuh a pawimawh hle ang.

NERVE natna leh PHYSIOTHERAPY (fi-zia-the-ra-pi)

Nerve natna ka han tar lan tak sciatica, neuropathy, stroke leh ka tar lan lem loh tam takah hian damdawi hmanga inenkawl hi a pawimawh tih kan hre theuh ang. Hei bakah hian tunlai thiamna atanga siam chhuah khawl chi hrang2 (TENS,IFT,ICT,ILT,etc....) hmangin taksaa nerve hnathawh tichak turin enkawl a ni bawk thin.

Jasmine

Assistant Professor of Urology

source : World Advanced G.K - Hriatzauna Changtlung

Share and subcribes. Enjoy.