THI FANG?

Bernard Stubbs-a chu mipa naupang dang a ang ve lova. A lu a lian em em a, a taksa erawh a sawngnawi hle a, a ke pakhat a bai bawk a ni. Ṭawng khat hle e ti lo chuan a ṭawng ve chhunin a lei a tawt bakah a dang a awk bawk a. A hmel ai mahin a nungchang a duhawm lo zawk a. A nunrawngin a thinchhe em em bawk a, ngainatawmna pakhat te mah a nei lo a ni ber e.

A chhungte’n atan theihtawp an chhuah nachungin harsa tih chang an ngah hle a ni. Khawtlang hnathawktute’n ‘a bika enkawl a ṭha’ tiin thurawn pe ṭhin mah se a nu chuan ‘a chhungte tling lo hle mah ila, eng ang pawha thiamna sang midang daih enkawlna hnuaia dah ai chuan’ tih ṭan chhanin anmahni enkawl a thlang zawk tlat zel a. Ngaihngam lo takin rawngbawltute chuan an tum chu an ṭhulhsan ta zawk a ni.

Bernard Stubbs-a chuan thil ṭhui hi nuam a ti em em a. Rilru lamah hnufual hle mah se a kut a themthiam em em thung a. A bik takin Khawchhak Ṭhifang lian tak tak thil kawpa, ṭhi leh banbun siam hi a tuipui hle a. A thil siam tea inchei vel ṭhinin darthlalang hmaah rei tak tak a in en ṭhin a. A hlimthla chuan a tilawm em em ṭhin a ni.

Tho thla pawh thlawn leh an ṭhenawmte zawhte mei hal tuma um te pawh hi a hlimpui ṭhin hle a. Hun engemaw changte hian a ” f-f-fel” avangin a nu chu “mawi mawi” tiin a ṭhi siam engemaw ber a pe ṭhin a. Chutiang hunah chuan, a fapa hmuh phaka a awm chhung, ni engemaw zah chhung chu a nu chuan, loh theih lohva a awrh a ngai ṭhin. A awrh loh vaih chuan khap daih rual lohin a thin a rim anga, intih buai pawh a cho hial ṭhin a ni.

Hringnun hi Bernard-a chhungte tan chuan a khirh thei hle.

A englam zawnga thlir chuan, a kut themthiamna chuan hun rei tak chhung tleitir theih chang a nei a. An pangpar huana chawngzawng leh vate khawi ngam sa te paw’n a kut an tawrh tlem phahin, an nghawng ṭhuaibun a tum ṭhinna tam tak lakah zalenna an neih phah ṭhin a ni.

A piancham vawi riatna a lo inher chhuah ni chuan chawchhun atan lui sangha pek a ni a. A vawikhatna atan sangha pum chu a thlengah suah sakin, sangha ruh chu ama then thiam ang anga ti turin an dah a. Tunhma zawng chuan ngun taka an thenfai sak hnuah a ti chauh an pe ṭhin a ni. Chokaa luh mai mai an remtih sak loh avangin – a nuin a intihnat palh a hlau si a – sangha hi a pumin a la hmu ngai lo hrim hrim a ni. Sangha chuan a tihlim ta em em mai a. “Tangha! Tangha!” tiin a zai a. “Mawi e tangha!”

“Nia, bawihte,” a nuin a lo ti a. “Ei zo vek rawh aw.”

“Miht. Miht!” hlim tak maiin a ti zel a. “Miht duhawm. Tangha miht. Tangha miht. Mawi mawi.”

“Sangha mit mawi,” aw nem takin a nu chuan a lo tih pui ve a.

A rilru zawng zawng pein Bernard-a chuan sangha chu ngawi rengin a ei ta a. A thiam ang angin a ruh te chu a thian ve zel a, mahse a eina thleng leh a vel chu a tiberh vek thung a. A nu leh pa chuan haider an tum nasa em em a, an theihtawp chhuahin, phurpui hmel takin an nuih sen sen a – an fapa paimcham a ni miau si a. Chawei kham hun a nih veleh chuan, a pa chu lawm takin, an huana hnim ṭo vat fai turin a chhuak nghal a. A nu pawhin lawm takin chaw eina chu a seng fel nghal thuai thuai a. A hmaiah sangha, zikhlum leh ice-cream kai luaiin Bernard-a chu, zel ang maia awmin, a ṭhutnaah chuan a ṭhu reng a.

Phone a lo ri a, chhang turin Pi Stubbs-i chu a va kal a. Chawei dawhkan chhuk sanin Bernard-a chu ngaihtuahna muk tak nen a chhuak ve ta a.

Tlailam dar 3:30 ah, khawchhak ṭhifang leh sangha mita siam, banbun tawi nalh tak mai a peihfel chu “Duhawm. Tangha miht duhawm. Mawi mawi,” tih pahin Bernard-a chuan a nu a pe a. “I t-t-ta tul, a-a-anu.”

“A va mawi ve,” rap titih deuh si hian Pi Stubbs-i chuan a ti hluai a. “Ka lawm lutuk, mate. I va’n fel em.” Lungawilo takin ni hnih chhung zet, zahngaihna namen lo nen, sangha mit te an ṭawihral thlengin a bun hram hram a.

Chumi ni aṭang chuan mit hian Bernard-a rilru an la ta em em mai a. Ama mit ngei pawh darthlalangah a en vung vung zel a, a chhungte mit te, huana savate mit te, ṭhenawmte zawhte rethei tak mit te, an chenna In mual zawla bawng tlate mit te, khawlaia mikhual kalte mite te, a bik takin, a nuin chawhmeh leina hmuna a hruai changa sangha zawrhna hmuna sangha thite mit te.

A lo upat deuh hnu chuan a thinur sosang hi a hlauhawm ṭhin em avangin a chhungte chuan khawtlang rawngbawltute chu an pun leh ta nge nge a. A thinrim a chhuah chuan chak namen lohin a chak a. A taksa chuan hmasawn lam pan lovin a ke pawh la bai mah se, hetiang hunah hi chuan, a Pa pawhin a thunun zo tawh ṭhin lo fo a ni. Ku sawmparuk a tlin hnu phei chuan a naupan lai ai khan hmuh a hreawm tawh fe zawk a. Ṭanpui tura lo kal, rawngbawltunu chu a lawm em em mai a. “Kan bulah a hlim fe zawk ang,” a ti a. “Enkawl dan kan thiam alawm. Kan hnathawkte an inpek bakah a anpui mipa dang tam tak zingah a khawsa dawn alawm.”

Bernard-a nu leh pa te chuan mak tih hmel takin an inen a.

Bernarda’n ‘Enkawlna In’ a luh hma ni zawng chu buaina hlirin a khat deuh ber a. A tirah chuan hnial namen lohin an remruatna chu a hnial a. Tlema boruak a daih deuh hnu chuan a nuin a hmabak nawm dan tur zia te a hrilhfiah a. Rawngbawltu sawi ang chiah khan, “I anpui midang tam tak an awm ve dawn alawm,” a ti a. Thinlung zawng zawngin a pa chuan, “Sikul ang reng ve deuh a nia, mama. Mipa reng reng chu sikul an kal vek alawm, I hriat kha.” Muk taka inngaihtuahin Bernard-a chuan a chhungte chu a en vung vung a, “Thil siam min phal sak ang em?” a ti a.

“Teh reng mai!” a chhungte chuan an ti rual ṭhawt a.

“Mi engzat nge awm ang?” tiin Bernard-a chuan a zawt leh a.

“Mi 34 vel an nih ka ring,” a nu chuan phur takin a lo ti leh a.

“Miht an nei ang em? Bernard-a chuan a zawt leh a.

“Teh reng mai.”

Hlim takin Bernard-a chu a nui a.

Alang apauah chuan hmin fel dera an inhriat avangin a nu leh pa te chu an thaw huai a.

Buaina sawi tham pakhatmah awm lovin kum hnih chu a liam ta mai a. Enkawlna In lamah pawh Bernard-a chu a fel hle a, a nu leh pa te pawh inthiamlo lutuk lemlo takin a awm loh chhung nite chu am takin an lo chen ve a. Bernard-a nungchang chu a ṭhat em avangin ‘enchhinna atan’ tiin an In lamah chawlhkar tawp chhung haw an phal sak nghe nghe a. In a lo thlen hmain a nu chuan lungphu ṭhalo a lo nei hman a, a pa pawhin namen lohin zu a in phah bawk a.

Hemi hun atan bik liau liau hian Bernard-a chuan Suit pawl a ha a, maimaw puansin tle chia siam nghawngawrh hring a awrh bawk a. A lu lianpuiah chuan a sam a khuih pial thlarh a. A dangawk ṭawng pawh a chiang em em tawh a. A zanriah bik te atan sangha a ei chak thu a sawi a. An In hlui leh a chhungte a hmuh chuan a hlim hmel hle a. Chawei hun hma chuan a pindan hluiah an hruai chho a. A ṭhi hlui engemaw zah a han hmuhte chu an chawei chhung zawng chuan nghet takin a nghawngah a awrh reng a, a nu chu pakhat te mah pek tumna a nei lova.

Ngawi rengin chaw an ei a, a chhungte mak tih khawpin hma takah a mutmu a tuah bawk a. Rilru hah luat avangin a chhungte pawh an mu ve thuai a.

Zanlai a pelh hnu chuan Bernard-a chu an thlam kailawn hmalamah a bawkvak thla a, huana Bukte-ah a lut a, chuta hachhek awm chu lain a nu leh pa te chu a chek hlum a. Thei leh thei lovin an ṭhenawmte Inah a va kal leh a, an ṭhenawmte nupa leh an zawhte chu a that bawk a.

Police te an lo thlen meuh chuan, an Inpui chhuatlaiah hahdam tak maia lo ṭhuin, inchhung hotunu ber tan ṭhi a lo thil mek a ni – mihring mit pariat, sangha mit paruk, zawhte mit pahnih leh inchawih taka rem ṭhifang rawng chi hrang hrang hmangin.