ZUNHIN DAWT EM NI?

Kan vengah hian tun hma atang tawhin puithuna mak tak tak sawi tur leh hriat tur a tam ve hle thin a. Tun tuma ka rawn share tur che u pawh hi kan chhungkuain a tak tak a kan tawn ngei ani.

He thil hi ka nu in min hrilh a ni a, Pathian khawngaihna azarah vawiin thleng hian ka nu hian min la dam pui a ni. Ka nu sawi ang angin ka rawn post ang e.Kum 1982 kha a ni a, a ni leh thla ka chiang fak tawh lo.

I pi Lalthangpuii (ka pa ni) te nufa chu an veng (Luangmual, Chhangurkawn chhak mai) atangin kan ina tlai chaw eia zan riak nghal turin an lo phei a. Tlaiah chaw te kan han ei kham fel hnu chuan an nufa mutna tur atan chhuatah puan kan phah a, kan buai laih laih a.

Heng hun lai hian i pa hi a hnathawhna hmun atangin tlai tak takah a lo haw thin.(Ka pa hi hetih hun lai hian Modern English School, Bunngkawn-ah zirtirtu hna a thawh lai a ni, kum 2007 khan ropuina ramah min kai san a ni.) Chutia i pite mutna tur kan siam lai chuan i pa pawh a lo thleng ve ta a, hetih hun lai hi zan dar 8 vel a ni.

I pi te mutna tur ka siam zo chu choka lamah i pa chaw ei tur siamin ka phei a, ka siam zawh a i pain chaw a bar mawlh mawlh lai chuan kan kawmthlang lamah khuan thawm mak tak mai, hawk dawt dawt rikan hre ta thut a. Chutih rual chuan i pa chuan,

'Chu..!' tih leh pawna tlan chhuah a rual nghal a. Keini ho pawh chuan kan umzui ve thuai a. Pawna kan va chhuah chuan i pa chuan kan thenawm pa PuDenga(hming lem) chu a hmuaia chirhdiak leh bawlhhlawh kai nuan chung leh, a thawmhnaw berh vek chung chuan a rawn pawm chho nawlh nawlh mai a.

Pu Denga te in hi kan kawt mai a ni a, tichuan i pa chuan an in lamah a pawm chho va, an inchhungchhuatah chuan a nghat ta hnawk a.Pu Denga hi rangkachak chher thin a ni a, a rangkachak chherna tur hian an in chhuatah thuk teruh te a siam a, chutah chuan mei chhemna puminmeihawl a chhem ling a, thleng tereuh te in rangkachak a chhuang tui a, a chher thin a ni.

Chutia i pa in an chhuata a han nghah hnu chuan a rangkachak chherna puma meihawl a dah chu a chhem vam a, a ling that lai tak chuan a bar ri sawr sawr a, a thial ta buah buah mai a. Keini ho chuan mak ti takin kan thlir thap a, chutia kan thlir thap lai chuan an in bangrel vel chu kawkin 'Khi...khi..khi' a tizuah zuah a, keini ho chuang engmah chu kan hmu ve lem lo.

A hnu a i pa in min hrilh leh dan chuan khatia thawm mak tak kan hriata pawna ka tlan chhuah khan thawm lo chhuahna lam kan kawmthlang kawrah khuan ka tlan thla a, kawr ka zuk thlen chuan thil mak tak mai ka hmu ta a ni.

Kan kawmthlang kawr chirhdiakah khuan Pu Denga khanbawvak kut kut chungin chirh a lo dawt hruah hruah a, chu a thawm chu a nia in atanga hawk dawt dawt kan hriat kha. Chutia a kum kut: kut lai chuan a inrinloh lai takin a hnunglam atangina kawngah ka man thut a, ka rawn pawm chho ta a ni a ti tiin min hrilh.

Pu Denga hi kei pawhin ka hmu ve hman a, pa fel lehngawichawi tak a ni. Kan naupan lai chuan an in bul huanah hian tlaiah mei a chhem thin a, chu a mei chhem bulah chuan ngawi rengin a thu reng thin. Mi thenkhat chuan an huanah hian rul lian deuh mai a awm a, chu chu a ko chhuak a, a be thin an: ti a, kan hlau ve thin hle a ni.

Tun hnu a ka ngaihtuah hian Pu Denga kha kan pi leh pu ten zunhin dawt an tih ang hi a ni ve mai ang em aw ka ti thin. Mahse mi tam tak in zunhin dawt an tih te hi chuan an kut changah eng a awm thin niin an sawi a, ka nu chuan khami tuma Pu Denga kut chang a en loh thu a sawi ve tlat thung.