HLAUHAWM KA TIH VE DEUH THENKHATTE

1. RAMHUAI A NIH KA RING!! : Thingtlang khaw pakhatah hian ka patea hian contract hna a hmu ve hlauh mai a, a hmun hi kawng laih thar anih avangin mi veivak an tlêm hle a. Kan hna ber chu culvert siam a ni a, kei a naupang ber tih takah cook-ah min hmang a, hnâ thawk ve ngai hek lo chu ramah chawhmeh zawng leh sava veh te'n ka chhuak thin a.

Tlaikhat chu dar4 velah sava veh turin ka chhuak a, ka kal hla angreng khawp mai a. Sava rual eng vâ nge pawh ka hre lo, kah rem si lo hian an petek an petek a, ka phûr laklawh chuan ka umzui zel a. Ka kal chin ngaihtuah lo chuan ka ûm zel a. A tawpah ka beidawng chu haw zai ka rel ta a. Ni dangah chuan ka kal tawhna hnu hi ka theihnghilh ngailo.

Khami ni kha chuan ka bo ta tlat mai a. Ka kalna hnu ni awm a ka hriatah chuan ka kal ta tawp mai a. Khua a thim titih tawh mai a, a reh hian a reh ngawih ngawih mai a. Ka rin lam pan chuan ka kal ta zel a. Thui fe ka kal hnu chuan hla vaklo ah hian mei êng hi ka va hmu ta hlauh mai a. Chumi ka'n hmu chu ka lâwm angreng hle a, hmanhmawh tak chuan ka pan ta a.

Ka thlen hnaih chuan thlâm hi a lo ni hlauh mai a, kal pelh mai ka tum lai chuan hmeichhe aw mawi zet mai hian thlâm chhung atang chuan,"Kha, i va tlai ve. Min lo nghak la kan haw rual dawn nia" a lo ti a. Ka nghak ve mai a. Reilote ah chuan a lo chhuak a, en pawh en lemlo chuan a hnungah chuan zuiin kan inchhawm chhuak dun ta a. Eng eng emaw sawia kan titi nual hnu chuan reilote ah kawng chu kan thleng ve mai a.

Ani chuan 'thu châwl lawk ang,' a tih avangin kan chawl ta a. Chutia kan chawlhlai chuan hla ve deuhah hian meichher êng hi ka hmu a, ani chuan,"Khi, i thianten an lo zawng che aniang a!" a ti a; a ding hlut a. Êng lam chu ka thlîr vauh vauh a, an rawn hnai telh telh a. Chutah ka thiani hnenah chuan,"Kan bûkah lo châwl la, chaw te i ei anga kan thlah dawn che nia" tih paha a lam ka hawi chu a lo awm ta reng reng lo mai a!! Ka hlau hnuhnawh khawp mai a, hmanhmawh tâwkin meichher awmna lam pan chuan ka tlân ta vak mai a ni.

2. AN CHAW LEH CHAWHMEH EITU! : {Khaw hming leh mihring hming thup a ngai tlat, min hrethiam r'u..}
He khuaa chhungkaw pakhat ah hian tlangval sual deuh, ei duhtui em em mai hi a awm a.

An chawhmeh reng reng hi a sawisel reng mai a; amah hi drug addict a ni nghe nghe. Hun a kal zel a, he pa hi 0D in a thi ta nge nge a. An In riakte chuan zanah hian choka vêl ri rawk rawk hi an hre thin a, tun an fiah ngam bawk si lo. A chawhmeh duh loh zawngte chu a lo paih darh neih nuaih mai thin a. A chang leh thâwm ri mak tak takte hi a siam thin a, an hlau thei khawp mai a. Hun kal hnu fe chuan 'tiang lam hre deuh hi an pun ta a. Ani chuan,"A ei duhzawng tak kawngka bulah dah ula, a reh mai ang," a ti a. A sawi ang chuan an ti ta a. Chuta tang chuan thâwm a awm ngai ta lo a, a reh zui ve ta hmak mai nia!!

3. MAIMIZIAL : {Hei hi ka thiannu pakhat, Delhi-a awmin a sawi a ni.}
"Ka room-mate hi chhungkaw thil vangin a haw a.

Zan ah chuan ka khua a har deuh chu zu tlem ka in sak a. Ka in zawh chuan ka mu deuh mai a, muhil chiah silo hian ka awm reng a. Chutihlai chuan mi lian deuh mai hi ka bulah a lo ding ta khun mai a. Khum atang chuan min hnûkthla a, au chhuah ka tum a ka au chhuak thei silo. Nâ chu ka hre vek tho sia, chêt tum chuan ka tâl nasa mai a. Chutia ka tâlna lamah khum atang chuan ka tla ta hlauh mai a, ka harh ta a ni. Ka hlau lutuk chu ka thiante a rang a rangin ka phone nghal a, riak turin an Inah hmanhmawh lutukin ka phei ta a ni", a ti!!

4. CHAKAI CHHITNA-A KAN THIL TAWN : Zan khat chu kan thian pathum hian chakai kan chhit a. Ni danga kan kal ngailohna anih avangin kan tri deuh du mai a, mi kal than lohna anih vang erawh chuan kan man hnem angreng hle a.

Nakin deuh hnu ah chuan duhtawk kan ngah ta bawk a, haw zai rêlin kal kan siam ta a. Thui fe kan kal hnu chuan lengkîr hi a lo awm a, lêt leh mai kan tum lai chuan thawm eng emaw mak tak hi kan hre ta a. Atir chuan ramsa emaw kan ti a, lo man theih mai inbeiseiin kan châng ru deuh a.

Mahse a thâwm chu a danglam tâk em vangin kan hlau angreng ta hle a. Luikawr sîr chu a rawn ri sû sû reng a. Kei chuan,"Tu nge!??" ka han ti vak a, min chhângtu tumah an awm silo. A hnu deuhah ka thinrim deuh chuan,"Min cho chuan lokal ta che!" ka han ti leh ta a.

Chuveleh hnim chu a rawn ri phei buan buan a, kan awmna a rawn thlen dawn hnaih ah chuan a tawp chat mai a. Chutah,"Min hlau em mi?" ka han ti leh chiah chu le, hnim chu a rawn inkeu a, a kârah chuan pa te reuhte, hnâr lian deuh beng parh deuh mai hi a lo dâk ta ker mai a. Kan hlau lutuk chu kan tlânna lam pawh ngaihtuah lo lêkin kan han tlânchhe tak tak mai a nih kha! Kan va hlau tehlul em...!!