HMEICHHE TAP THAWM

Ka Nu hian sorkar hna a thawh ve avangin thingtlang hmun hrang hrangah kan awm kual fo thin a. Hetia kan kual na lamah hian thil mak tak tak pawh tawn hriat kan neih phah nual a ni.

Khaw pakhat kan awmna chu thingtlangah pawh Motor pawhin a tlawh pawh loh leh electric pawh la awm lo a ni a. Ke in thui tak kal ngai a ni a. Hemi khua a kan insawn dawn hian, a khaw mi ten bungrua min phurh pui a, quarter a awm nghal tur kan ni a. He khuaah hian kan awmna tur damdawiin quarter tih loh hi chu rangva in pawh awm lo a ni.

Tlai lam dar hnih vêlah kan in thar tur chu kan thleng a. Rangva in, sei tak mai a ni a. Sub-centre nen kan awmna chu in pindan a ni a. Kan thlen tlai hian mi inah chaw kan ei a. Zanah chuan inleng kan nei a, dar riat velah chuan an haw ta hlawm a. Kan awmna hi tlem a hmun fianrial deuh a ni.

Inleng te an haw rêm hnu chuan mu turin kan inbuat saih a. Chutih lai tak chuan ring em em mai hian hmeichhe pakhat hi a rawn nui ta vak vak mai a, kan phu chiang kher mai. Ka nu chuan a hlau deuh a. Kei ni erawh chuan hlauh nachang pawh kan hre lova. Ka pa chuan, "kan inleng te kha an la ding a nih chu" a ti mai a. Mahse reilo teah kan inchung chu mihringin an rah rîk ang hian a ri ta tuarh tuarh mai a.

Chuveleh ka pa chu torch light nen a tlan chhuak a, kan unauin kan zui bawk a. Kan han ên kual vel a, mahse engmah kan hmu lo va. A ngaihna hre lovin pawnah chuan kan din remg lai chuan ka nu chu a rawn te thawt a, a tap a, rang êm êmin kan tlan lüt nghâl a. Ka pa chuan enge a hmuh a zawt a. Mahse a khurh nasat êm avangin engmah a sawi thei lawk lova. Minute sawm hnu vêlah chuan a rawn tawng chhuak ta a. Khatia pawna kan tlan chhuah khan ka nu chu a mahin roomah khum vel a ching fel a, chumi lai chuan room puanzar phenah hian mihring hlimthla a hmu a.

Keimahni a nih a rin avangin a thil tih lai chu a chhunzawm leh mai a. Mahse, a rawn luh meuh chuan keini ni lovin, hmeichhe bawrchhawr tak, mitmu var vek hian a lo en kul mai a. A hlau lutuk chu a rawn au chhuak a, a bo leh nghâl daih a ni.

Zan kan han mu chu kan room piah damdawiin lam ah chuan mipahnih in be char char thawm a awm reng a. Ka pa in a va en lahin tumah a hmu si lova. Kan kawngkalna kan hah viau nang a, kan thlen zân hian tumah kan mu lova. Thawm kan hre ta reng a ni.

Tichuan zingah chuan mi rawn leng te hnênah chuan kan lo hrilh ta a. An ni pawh chuan mak an ti em em mai a. Mahse an han ngaihtuah a, a hma a lo thawk thin te pawh quarterah hian an lo awm duh loh nachhan pawh thawm a awm vang a nih chu an ring ta a. Keini pawh chu indang luah ve mai turin mi hrilh a. Mahse ka pa chuan a duh tlat loh a vangin zanah chuan kohhran hote lengkhawm a sawm ta a. Tin, min riahpui turin tlangval pahnih an lokal bawk a.

Tichuan zanah chuan tawngtaina te neiin hlimtakin kan zai a. Dar sawm velah chuan an haw darh leh ta a.
Mi rawn leng an haw darh a tang a reilo te ah chuan hmeichhe tap ri chu kan hre leh ta a. Kan tlangval riahpui tur te chu an tlan chhuak nghâl a. Mahse engmah an hmu si lova. Tap ri pawh chu a la awm reng a. Khawi a tanga rawn chhuak nge tih chu kan ngaithla thap a. Zawi zawi a hla tial tialin kan hre theuh a. Kan han nghah rei deuh chuan a reh ta a.

Tichuan hemi zan atang hian vawikhat mah thawm hi kan hre nawn leh tawh lo a ni.