MARUATI THLA CHU

Hmân kum lawka thil thleng a ni a. An chhüngte remtihna a rawn ziak ka ni. Mahse a hming leh khaw hming vel chu engkim thup vek tur a min duh angin, ka thai lang lo phawt ang e. A chhûng hnaih deuh te in lo awm a nih chuan in hre thiam mai ang chu.

Kan tleirawl chhuah hlim hian zan tin ka thian pa nên hian kan lêng chhuak thin a. Kan thian nu pakhat Maruati(hming lem) te inah lut hmasa in, kan haw lamah kan lêng kawi leh thin a ni. Maruati hi ria lam pang, ngo deuh leh ngainat awm tak a ni a. A ngaihzawng hi hriat a har khawp mai. Tu pawh mai hi tha takin a be vek thin a. Then rual kawm thiam tak a ni.

Lehkha zirin hmun dangah kan awm a. Phone vel a la tam loh a vangin lehkha te kan inthawn fo thin a ni. Kei ni thian dûn chu hostelah kan awm a. Tlai khat chu kan class bâng hi bazarah kan lêng chhuak a. Chutia khawlai a kan lên lai chuan Maruati chu Taxi a a chuang lai kan hmu a. A rawn zin ve turah kan ngai mai a. Tichuan zânah chuan a chhûngte in, a thlen thin na ah chuan kan va lêng ta a. Achhûng te kan han zawh chuan, "Nia, vawiin tlai khân a rawn thleng a, mahse a lêng chhuak leh a, a la rawn haw lo a nih hi. Tûn tum a rawn kal chu a zia a dang êm êm mai lehnghâl a. A thuam hnaw hâk lai chauh nên a rawn lût a, room zawng zawng a lût kim vek a, 'ka lêng lawk dawn nia' a ti a a chhuak lehnghâl a. Hei a la rawn haw leh lo chu a ni a." tiin min hrilh a. Chutia kan inbiak lai tak chuan an phone chu a rawn ri ral ral a. In neitu pa in a han lâk chuan zual ko a ni ta tlat mai le? Maruati boral thu an rawn hrilhna a lo ni a. In a awm ho leh kei ni chuan mak kan ti ngei mai.

Kan zavai mai chuan kan ham haih vek mai a. In neitu pa ber chuan a zuk zawt nawn leh ta a. Tlai a kan hmuh hun lai vêl a tang khân nikhaw hre lovin a lo awm tawh hi a lo ni a. A mak kan ti lutuk chuan tih tur ber pawh kan hre lo. Tichuan rei vak lo hnuah chuan kan haw ta a. Hostel a kan room kan han lut chiah chu le! Ka thian pa khum ah chuan Maruati chu lo thu in min rawn nuih ta a nih chu! Ka thian pa hlau lutuk chu a au tê tuarh mai a. Midang an rawn tlân khawm nghâl a. Chutia kan buai lai chuan khawi lamah nge a bo hman kan hre tawh lo. Tichuan ka thian pa chu a khumah chuan a riak ngam ta lova, ka khumah chuan kan riak dün ta a.

Zan lai ka han thang harh chuan, natuar a hmeichhe rûm hlet hlet ang hian zawi te te a rûm ri ka hria a. Ka han ngaithla chiang deuh a. Vawi lehkhat ah ka thian pa chu a rawn thu chhuak hlawl mai a. A thlan tuiin a bual zawih zawih mai a. Enge maw tak hlauh nei a ni. Mahse a thil hmuh min hrilh duh lo a. Light ka han ti êng chiah chu kan room a tang a hmeichhe ruangâm kawrfual ha kal chhuak chiah kan han hmu leh zui ta mai chu a râpawm duh ngei mai.

Hemi zân hian kan mu tawh lova, ka thian pa chu zïng a tangin a chhuak ta nghal a. Chhûn ah a bungrua te rawn la in hostel chu a chhuah san phah ta nghe nghe a ni. Tin, he mi hnu pawh hian kan thian hmun danga awm te pawhin an lo hmu ve nual bawk a ni.