CHAKMA MITTHI

Ni kum 2016 nge nikum hmasa zawk kha ka hrechiang chiah lova. Lunglei civil hospital-ah sawn chakma tlangval a thi a. A unau mipa tlangval tantir 2 in an awmpui a. A han thi chu Ambulance a remchang lova, an hmelhriat pakhat 204 motor an hmang ta ringawt a. An khua lah chu Lawngtlai lamah a ni a. Lawngtlai atang pawha la hla tak a ni a.

Tichuan zan dar 6 velah an chhuak a. Motor hnungah chuan an U ruang chu Kuanga dah in an phur a, an unau leh driver chu ahma ah an chuang thung a.
Chutia an tlan ta chu Lunglawn an thleng chauh a motor gear box chu a chhe ta mai a. Tichuan driver chuan a motor ang tho nei Lunglawn ami chu a biak sak a. Ani alo tlawmngai a, tichuan motor dangah chuan an chuang ta a.

Kawng a chhe hle a, ruang an phur bawk nen furlai a ni a, an tlanchak lova. Chutia muangchanga an tlanlai Thualthu an pelh hnu lawk chuan Kuang chu awm chen vela sanga han chawikana motor chhuata thlakthlak ang deuh chawrh a na leh ringin arawn ri thuai mai a. Abik takin chakma unau pahnihte chu an hlau nasa mai a.

Driver chu a chhuak a, motor hnungah chuan a han lawn a, Kuang chu hawn chhin a tum ta a. Khatiang khawpa na leh ri ring kha chu a nihna takah chuan a keh ngei ngei tur anga ngaih a ni a. Mahse chakma pahnihte chuan an hlau em em mai a. Hawng lo turin an ti nasa mai a. Chutiang anga an ngen tak vakah chuan ani pawh chuan a hawnglui ta em lova. Mak ti angreng tak chuan an tlan leh ta a.

Tawipui S' ah thingpui an in a, an han kal leh, mahse km 3 pawh an la tlan hma chuan motor hnunglam vel chu kuttin hriam leh chang takina ham ang hian engemaw hamtik hrawk hrawk ang hian arawn awm leh ta a. Tah chuan chakma te pahnih chu an hlau lehzual a, "kapu ding reng reng suh, tlan char char rawh" an ti a.

A kawngkhar bulhnai pawh a thu tha ngam lovin an inpawm titih a. An hmel atang chuan an zam ngawih ngawih tih hi a hriat a, an khawngaihthlak letling zawk hle mai a.

Chutianga km1 dawn an tlan hnu chuan thil inhamri chu areh ve ta a.
Tichuan Lawngtlai an thleng a, Sihtlang khua nita in ka hria, chumi peng an pelh hnu chuan a hma ang chiah khan Kuang chu sang taka chawia thlak leh dawt ang hian ari leh ta thuai mai a. Tah meuh chuan Zopa thinin a tuar ta lova, chakma unaute pahnihin hawnglo hram tura an nawr nasa viau chung chuan motor ti dingin motor hnungah chuan Tuboh leh thlirtlawn nen a lawn a, Kuang chu a han hawng ta a. Chutah chuan alawm mak deuh chu. Kuang chhin a han hawng chu torchlight in ruang chu an en a. Alo mengkul a nih chu.

Driver chu a hnungtawlh deuh dawrh a. Motor sirah chuan mitthi unau pahnihte chu hlauthawng takin an lo ding a. Driver in Kuang; torchlight a an en a, an hnungtawlh dawrh khan an awmna hmun ramhnuai deuh roh a ni si a. Hmun dangah tlanchhe ngam heklo motor sirah chuan hlau em em in an lo inkuah a. A diktak chuan Driver pawh chuan a hlau ve thova, mahse engtin han tih vak ngaihna awm heklo reivaklo hnuah chuanKuang chu ava pan leh a, hlau deuh taka Light-a an en leh chuan alo maimitchhing tawh a. A chhin chu a kilh a.

An han tlan leh hnu chuan thil duh awm lo tak thleng dawn hian a hre ta tlat a. A ngaih a ngam thei ta hauh lo mai a. Chakma unaute lah chu a hlau hlau ah an tang a. Tumah tawngzai rel lovin ngawi rengin an tlan ta mawp mawp ringawt a.

Fur lai a ni a, kawng thenkhat chu a diak em em a.

Chutia an tlan lai chuan chirhdiak tlem lo awmah chuan an tang ta tlat lehnghal a. Chakma unau pahnihte lah chuan motor hnunglam, Kuang awmna lam atang chuan an nawr ngam lova, hmalam motor light engah chuan a harsa lam zawk nimahse hnunglamah chuan an nawr ta ngat ngat a. Mahse motor chu chelhbettu awm ang maiin tlemte tak tak pawh a tawlh thei lo. Chirhdiak tlemte awmah chuan tlan chhuak thei lovin an tang ta ringawt mai a ni.

Tichuan le ruang phur te an ni si a, riah ngawt thu awm heklo le Lawngtlai lam chu motor dang hnukchhuaktu tur zawng turin ke in an pan ta ringawt a. Ahma a thawm awm avang leh alo men kur tawh avang khan a huai deuh ber Driver pawh chuan chulaia khua han nghah var chu a ti vak bik lova Kuang chu an kalsan ta tawp mai a ni.

Tichuan zanlaiah chuan Lawngtlai chu an han thleng a. Driver hmelhriat pakhat Motor nei tho an han kaitho chu chanchinte an han inhrilh a. Ani chuan, "riak mai rawh u, in tanna lai chu ka hria alawm" alo ti awlsam mai a. An riak ta ringawt a.

Tichuak a tukzingah chuan motor pawhchhuahna tur hrui leh motor nena an zu kal chu, Kuang phurhna motor, atang zawkah chuan a neitupa chu a han thuluta, "tiang hian alawm a tan tlat chu" tihpah in an tlan leh dawn chhin a. Tah chuan mak takin awlsam lutuk in a tlanchhuak leh thei lawi si a. Tichuan mitthi chu an khuaah chuan himdam takin an thlen thei ta a ni.

Lawngtlaia an riahnapa chuan a hnuah a hrilh a, chirhdiak tlemte tak taka an tannalai kha hmun hrang ve tak alo ni thin a niawm e.