KAN THIANNU RUPALI THLA

Tuna ka thu rawn post tur hi ka cousin tawn a ni a, a rei deuh tawh avangin ama rem tihna zana post tur ka nih angin ka phur hle mai. Mahse thu kimlo, thu belhchian dawllo leh tih sual lai a awm a nih pawhin in mi hriatthiamna ka rawn dil e. A hmun hming leh ka u hming hi chu thupin hming lem ka vuah dawn a. Mahse a Diary atanga copy ka nih angin a thiante hming te hi chu a ziah ang angin ka rawn ziak mai anga. A sei deuh hlek avangin ka kai tawi deuh hlek dawn a, kha kha chu chhiartuten min lo hrethiam dawn nia, keima tawn angin han thailang leh phawt ila!

KUm 2002 kum kha a ni tawh a, February thla a ni nghe nghe, mahse a ni chiah ka hre tawh lo. Keini B.A 3rd Semester zo hlim kan ni a, kan semester ho chuan farewell neih kan rawt phur a, kan phur ang chuan kan nei ta ngaei mai, kan hlim em em a, mahse chu kan hliman karah chuan kan thiannu Rupali Shrivastav chu a hlim ve hauh lo mai, kei chuan a bianga mittui luang thla ngiai ngiai chu ka va hmu in, ka va pawh a. "Hey, Rupa ngati nge i tah, lungngaihna i nei ami?" ka ti chu, Rupa-i chuan, "Anjella, pawnah in bia ang" min ti a, ka banah a vuan a, min kai chhuaka, ti hian min hrilh a, "Anjella, ka chhungten Abhimanyu hi an duh lova, then tur leh kan hindu pui, kan thenawm tlangval Deepak Chopra neih tir min tum a, a hun leh nite an ruat fel vek tawh, tih ngaihna ka hre lo, ka mangang em a ni" a ti a, a tap zawih zawih mai a. Kei chuan kuah chung chuan, "Rupa, lungngai ma ta che, tih dan kawng a awm mai thei asin " tiin ka hnem ve chawt a. Mahse awmzia reng a nei lo. A tukah chuan Rupa-i ruang chhe zet mai chu an in bul huan atang chuan chhar a ni ta.

Kan thianzaho Tara, Sushma, Vidya leh Brunei(khasi mi) chu min thawng hle mai, nizan pawh kan awm ho a, kei phei chuan a lungngaihna tawrhpuiin ka hnem kha a ni si a. Tara-i ngei pawhin a in, a room thlengin a thlah kha a ni si a, thil awihawm loh tak ni si, mak tak maia khatia a ruang hmuh a nih kha tuman kan awih thei lo, mumang ramah pawh kan mang phak loh leh beiseih loh a thleng hi tumahin kan ring lo, kei phei chu luhaiin ka tlu deuh thaw a, Sushma-in min lo hmu lo se ka tlu hial tawh ang. Damdawi in mitthi dahna a, an dah kan thiannu Rupali kan va hmu chu,

"Awi karei! hetiang hi a ni thei dawn ami, a mitvei lampang lu chu a hek huau a, a mitmu dinglam pang a lo chhuak tun bawk a, a heh hmuh tur a awm lo, a ha a then sung bawk a, a khabe a bal vek bawk a, hetiang-a nasa a khawihtu kan thiannu hi tunge a nih hriat ka chak khawp mai. Hindu kulmuk lutuk nih hi chuan pawina a nei a ni, Rupa-i duh em em Abhimanyu lah Mosolman a ni si, a ni lah nikhaw hre lovin damdawi inah dah a ni bawk a. Crime Branch leh Investigator te pawhin an chhui nghal char char a, an sawi danah chuan mi pakhat chauh tih a ni lo tih angin an sawi bawk a.

Rupali thih hnu thla hnih vel a liam awrh chauh tihah chuan thawm mak sak tak tak hriattur a awm ta nawk mai a. Rupali thla kan hmu tih a awm nawk tawh mai a. Zanah phei chuan a roomah sawn thawm a tam lutuk, a rim chhe thei lutuk tih kan hre leh ta zel chuan hrilh a ti hai angreng khawp mai.

Kawngsira Pulau zuar putar pakhat pawn, "Nizanah Rupali bawihi ka hnenah lungngaih hmel deuhvin a lo kal a, thil min hrilh duh a nei tih a hriat, mahse ka buai si a, ka chhawn hman si lova, min kalsan rih turin ka ti a, lungngai hmel deuhvin a kal leh ta a ni a ti. Midang dang pawhin tiang chuan hmu an awm nawk a, thil sawi duh nei ni awm takin a thla a an hmu thin a, a chang leh kawng sirah thu in a tap lai te an hmu thin a, ti te in an sawi. Hmeichhia leh naupang lampang deuh chuan zan rei lam deuhvah chuan chhuak ngam pawh a awm ngai lo, Rupali thla hlau in, inchhungah an an tawm vek zel.

Ka chhinchhiah danah chuan May 28, 2002 zan a ni a. Mizoram chu nise thla ar kai den zan an lawm ngei ang. Kan awmna In hi kan thiannu Vidya-i Pa, Pu Naresh BHimroa-a In pakhat "BHIMROA VILLA" tih a ni a, in lian tha tak a ni a, nuam tak leh  thengthaw nuam tak a ni a, kan thianzahova cheng kan ni. Helai hmunah hian chhungkaw nga vel lekin in leh lo neiin an khawsa a, chhungkaw dang han belh vak tur a awm lo, a bak chu ramhnuai a ni mai,

kan awmna in hnungah chuan Swimming Pool lian leh zau tak a awm bawk a. Chumi zan chuan thla a eng em em mai si, kawngte chu hla tak thlengin a en a, kei lah lungleng mi lo ni bawk nen, inchung verandah ah chuan daduhi hla sa in ka zai rat rat reng a, chutih lai tak mai chuan Brunei-i room awmlai chu a rawn te chhuak thawt mai a, kan vai chuan Brunei-i chu kan pan ta a. Amah lah chu a lo ding khur zawih zawih mai si, swimming pool lam kawkin, "Rupa, Rupa" a ti tawk tawk thei chauhva, chutah nikhaw hrelovin a tlu zui mai si, mak ti deuh maiin kan thianzaho chu kan hawi phawk hra mai a.

Chutah Sushma-i inhnuai lam kal lah hmanhmawh bak ba lenga kan lama rawn chho lah a rawn thidang lut hi a ni mai a, chutah ramhnuai lam atangin chinghnia a rawn u ta ruah ruah mai, kei leh Vidya-i chauh kan ni tawh mai si, kan hmulthi a ding a, kan hlau tan ta a, kei phei chu ka khur ru der der tawh, Vidya-i chuan "Anjella kristian i ni lom ni, tawngtai ta che" a ti zo chiah mai chu kan thiannu Rupa-i nui khek ri chiah chiah mai chuan kan vel a rawn tuam ta, za em em hian a nui awr awr mai a, Vidya-i hlau lutuk chuan min rawn kuah ta chuk chuk mai, kei lah ka hlau ve tho bawk si, ka tiril a fan a, ka thauah min man a, keipawh chuan nghet em em mai chuan ka lo kuahbet ve bawk a, hlau ve ve kan ni si, kan thiannu pakhat Tara-i lo leng chhuak khanglang bawk nen, kan pahnih chauh chuan bang kil khatah chaun kan in kuahbet a. Hlauh tawh nak alaiin tukverh shutter chu thli na em em mai hian a rawn vaw ta chawrh chawrh mai a, chutah rum ri kan hre leh ta, chu kan rum ri hriat chuan min rawn pan ni hian kan hria a, kil khata hlau leh khur zawih zawih a, kan tawm dun lai chuan kan awmna room chu a uap khek ta churh mai, kan thiannu Sushma-i nikhawhrelova tlu zawi hnawk chu kai tho tu awm ang mai hian tundin a ni a, mahse amah erawh a harh chuang lo,

Chutah leh! ka ngaihtuahna ah pawh ka ngaihtuah phak loh leh rapawm tak mai chuan min nang ta, aw lalpa, ka va han rap ngai em, thih daih hi ka chak, kan thiannu Sushma-i ban chu kan lam hawi chuan a rawn ti fan phei ta a nih chu, kan en ngam tawh lo, ka maimitchhing ringawt tawh, chu kut vawt ngiak nguak tak mai chuan kan pahnih chuan min rawn zut thla ta riai riai mai, vur ang mai hi a ni a, khatih laia ka awmdan kha ka hre tawh lo, ka dang var lawp lawp thei, mumal ka hre tawh lo, chutah za em em in min nuih leh, kan theih ang tawkin kan in kuahbet a. Chutia engmah hrelova kan awmlai chuan room kawngka chu a rawn in hawng thuai a, Tunge an nih ka hre tawh lo, ka vai ruai tawh, ka harh leh chuan roomah chuan Tara-i leh thenawm khawveng te chu an lo awm a, doctor te an lo ko chu lo niin ka va han lawm tak em.

Tara DiSilva hi Roman Catholic an ni a, a ni hi sakhaw mi tak a ni. Hemi zan pawh hian min inkhawm san a. Buaina namen lo kan tawh phah a, amah lah a in thiamlo hle.

Chutia kan thiannu Tara-i leh thenawm khawvengte rawn thlen tak, tak tak hnu chuan thawm pawh a dai ve leh tan tawh a, Brunei-i leh Sushma chhuta lo tlu te chu khumah mut that tir an ni a, doctor te kovin bawihsawm an ni a.

Doctor pa chuan an pahnih dinhmun a that thu a sawi chuan kan thaw huai a, kan lawm hle mai. Darkar chanve hnu velah chuan Brunei-i chu a rawn harh a, Brunei-i rawn harh hnu reiloteah chuan Sushma-i pawh a rawn harh, mahse a chianglo ruai mai a. Doctor in a en nawn leh chuan a la harh chiang lo a nih hi a ti mai a. Brunei-i chu thil awmzia kan han zawt a, ti hian a sawi a,

"Khatia ka inbual zo, ka mu tur kha ka khum hi a lo darh nuaih mai a, a zualpui ka ti fel vel e ka tia, faifuk rat rata ka zai laiin ka kerek ah min man bet tu awm ang mai hian ka hria a, ka ke lam ka zuk en chu, Karei! kut puam uk leh dang bul mai hian ka kerekah min lo man bet reng chu niin, ka thauah mi man a, ka khur a, ka hlau si, tlanchhiat mai theih si loh, ka ke chu ka theih ang a nasa in kan leng ve vel a, mahse min mantu kha a chak si, a thlah mai duh bawk si lo, chutah ka khum hnuai atang chuan bawkvak chungin zawi muangin a rawn tawlh chhuak ta hrut hrut aleh, a lu hek huam danah chuan Rupali ngei mai kha a ni, thil rim chhe tak hi a rawn nam huk huk bawk a, ka room chhung chu a uap khek ta churh mai, ka ke rek a hmerna lah chu a na em em mai bawk si, ka hlau tawh si, thih dan mai hi ka nap rum rum a, mahse in awm alawm tiin rawn koh che u ka tum a, ka aw a chhuak thei lo, a zawi sin rat mai a, chutah a lu chu keimah lam hawi zawngin a rawn inher thut mai chu ka mar a awm tawh lo hian ka hria, min rawn melh run mai bawk si, theihpatawpin ka aw chhuah tumin ka au ta vak mai a, a rawn chhuak thei ta, ka au ri in rawn hria a ni tih ka hriat rual khan rang lutuk-a bawkvak chhuakin swimming pool lamah khuan a liam thla ta a ni" a ti.

Chutia Brunei-in a sawi zawh hnu reiloteah chuan tuman engmah sawi theih kan nei lo, kan in melh tawn hrak hrak mai a. Chutih karah Sushma-i chuan "Rupali min kalsan rawh" tiin a rawn te chhuak tuar mai a.

A rawn harh chiang hle mai. A rawn khur a, a rawn tap chhuak bawk a, keini ho chu min ko chhuak chul bawk a, chutia Sushma-in kan hming a rawn lam chhuak chul mai chu mak kan ti angreng khawp mai. Sushma-i hi kan thianzaho ah chuan mize danglam tak nei a ni a. Mi luhlul, mi ngeng ngal chi hi a ni ve hrim hrim a, mi tawng tam lo tak a ni bawk. Chutia Sushma-i harh chhuak ta tihah chuan Tara-i chuan a zawt ve ta a.

Sushma-i chuan "Khatia Brunei-i tlu kha inhnuai lamah tui vawt la tura ka zuk kal kha, fridge ka hawng a, tui bottle ka la tur kha fridge chu a rawn che hrut hrut a, hnung lampang atang hian ni maiin ka hria a, hnung lampang ka va en chu fridge hnung lampang atang chuan Rupali ngei mai chu a rawn chhuak tuah tuah mai a, min rap hle mai, a lu a hek huam mai bawk si, chuta kara a sam bawrchhawr hrip hrep kara a mit meng rum el ul a min rawn melh leh khui mai khan min rap leh zual, ka tim uai uai tawh mai si, ka khur nasa tawh bawk si nen, ka rawn chho tur te pawh kha ka kal hlei thei lo, ka kal te pawh a dik tawh lo, ka kal sai hlawk hlawk tawh hi a ni ber, a hnung zawngin ka rawn kal chhova, min rawn zui zel mai bawk si, room kawngka ka rawn thlen dawn khan a ring a rawn fan chhova, kan in melh hnai kher mai, infawp tur mai hi kan ni, ka hlau lutuk awm ngaihna hre lovin ka rawn tlu lut hnawk mai a ni" a ti.

Thenawmte lo leng lut ho pawh chu a barakhaih hle ni tur a ni, an chiai deuh thaw a, mahse Tara-i chuan "Engkim a tha vek ang, rin ngam Pathian kan nei alawm, engmah hlauh tur a awm lo" ti chuan min han thlamuan ve tak na a, midangte kha chuan an awmdan atang khan an hlau tih a hriat a, thenkhat te chu an lo in kuah chawih chawih hlawm a. Chumi zan chuan tumah kan mu lo, kan tlaivar thak a, kan titi a, a tuk khua a lo var chuan thenawm te zinga mi chuan hindu puithiam a lo kova. Tara-i chuan a duh lo nasa mai. Mahse chu puithiam chuan helai hmunah hian thlarau sual in hmun a chan thu leh anchhe lawhna in a nih thu a rawn chhamchhuak a. Kar2 vel min chenchilh nghe nghe bawk. Min chenchilh lai chuan engmah thawm hriat tur a awm lo. A reh hian a reh tlawk tlawk mai a ni.

Puithiamin min chenchilh a, min awmpui reng hnu chuan midangin an rawn kohna avangin min chhuahsan a, chutah thenawm tlangval lian pui pui pahnih chuan min awmpui leh a. A ni chiah ka hre tawh lo, a kar thumna vel awrh chauh a ni tih chuan puithiam thil tih theihna vel khan awmzia a nei ta hauh lo mai.

A hring a hran in a rawn inlar dawn tih kan hre hek lo. Room khatah chuan khum dawh zawm put chuan kan mu a, kei a chhak ber sirah ka mu a, Tara-i a thlang ber sirah a mu bawk a. Kan chhak lawk chhuata puan phahah chuan tlangval pahnih chu an mu bawk a. Chumi zan chuan kan ti ti a, fiamthu te thawhin kan nui ar ar hlawm a, chutia hlim taka kan nuih lai chuan nasa em em mai hian kan khum a rawn sawi a, kan mu pawh chu kan tho chhuak vek hlawm a, kan chhaka tlangval mu te pawh thawmah chuan an harh ve nghal a. Kan hlau hlawm ngei mai, kan in kuah khawm a.

Chutah leh kan khum zawmna lai tak chu a rawn chat phuk a, Rupali tih hriat reng chu lu hek huamin a rawn tawlh chho ta hrut hrut mai. Vinesh-a kan thenawm tlangval chuan in ti huai deuhvin zuk pawh a tum a, ani Rupali chuan hneh em em mai cuan a lo paih vir lawp mai a. Vinesh-a unaupa Ankit-a room kawngka a hawng tur pawh hawng theilo, pawn lam atang chuan a inkalh a, chutah room chu tawih rim nam, ngher nghur tak mai chuan a rawn luah a, luak a ti chhuak kher mai.

Kan khumlai tak maiah chuan a ding ta zur mai, a mit rum el ul mai chuan min rawn melh khui hlawm a, a taksa atang chuan hnang tawp tak mai chu a far thla duah duah mai bawk a, a ka thisen-a bual chung chuan a nui khek ta awr awr mai, a nui hmel a rapawm mai bakah a nui lah rapawm bawk, aw thum chher chur mai chuan "Sushma, sushma" a ti puam tul mai bawk a, Tara-i chuan Sushma-i chu a kuah bet a, chutah leh a din na atang a ring a rawn fan phei leh ta, kan vai chuan min rawn melh kual a, kan zawnah theuh a lu a rawn hawi a, a thaw a rim chhe si, a mit meng rum el awl dur khuih mai te, a ka atanga a chil thli far thla duah duah te chuan mi va han rap tak em, a lei chu rul lei ang mei hian a chuah zul mai si, chutah Sushma-i chu a rawn liak ta, Sushma-i hlau chu a tap chhuak a, a khur zawih zawih mai si, chutah Sushma-i ban rekah a man bet thut mai chu kan te ring hlawm ngang mai.

Chutah aw puam tulh chuan, "Sushma-i hi chu ka ta tur ka hruai dawn a ti ta mai a", keini kan hlau tawh si, kan khur der der tawh mai a, Brunei-i hlau lutuk lah ni khaw hre lovin a lo tlu leh tawh bawk si, Kei, Tara, Vidya leh nise kan khur chawr chawr tawh mai si, thi daih thei chu ni ila ka thi thei hial tawh ang, ka dang lawp lawp a, mumal ka nei tawh lo, ka mang hriat ruai tawh mai.

Chutah kawngka a rawn in hawng rawk a, puithiam pa chu lo niin, a hriatna avanga lokal a ni. Puithiam pa nen chuan an in hmachawn ta tih ka hmu a, mahse ka chiang thei tawh lo. Ka hmuh leh chu Puithiam pa kaw chhung a zen a, a ril a phawrh chhuak a, a eisak ka hmu kha ka insum zo tawh lo. Ka tlu hnawk a, engmah ka hre zui tawh lo. Tara, Vidya leh Ankit-a chiah an awm tawh. Engtin nge an awm ka hre zui tawh lo.