KA UNAUPA THIL TAWN LAWR KHAWM

Ramhuai/Thlahrang lam hi hmu thei bik riau te hi an lo awm thin niin a lang. He ka unaupa ngei pawh hi naupang te ni siin hetiang thil hi a lo tawng ve nual tawh a, kei mah ngei pawn vawi eng emaw zat chu ka lo zawt tawh hlawm a, chung zing a mi chu in lo ngaithla teh hlawm ang....

1. Hman deuh khan Local TV ah te Dulte dai a Sumo driver ramhuaiin an sawisak chungchan leh amah ngei an interview na te tichhuah aniin mi te mak tih leh sawi pawh a hlawh nasa hle anih kha. Amah ngeiin a Somo log Book atanga a thil chhinchhiah a sawi, a hun leh ni nen thlap, la chhiar ve lo te kan awm takin.Dulte dai he thil thlenna hmun hi Pilea in mual an ti a,helai hmunah hian mihrang hrangin thil mak tak tak an tak fo thin a ni.

PILEA IN MUAL THIL MAK CHU(ama sawi dan ang chiah in ka rawn dah ani e)-

Dt. 27.10.2008 (Monday) - Zan dar 7:00 pm passenger pakhat ka nei:Pilea in mual ka thlen hian motor tlan lai chu a thi tawp a, motor chian loh vangah ka ngai a, ka en kual a, engmah chhia a awm lo va. Darkar chanve hnu velah chuan motor dang a lo kal a, ka'n self leh chhina a nung mai a tluang takin Kawlkulh ka thleng.

Dt. 28.10.2008 (Tuesday) - Zan dar 7:30 pm passenger pali a nei:A hmun ngai ka thlen hma hian ka motor ke dinglam chu rangva an vuak rik ang hian a ri thuai thuai thin a, ka ding a, light nen ka motor ke chu kan en a, engtin mah a awm lo va, ka tlan leh mai a. Motor thihna hmun ngai ka thlen leh chuan a ke hma ding lam leh a ke spare a chhunga ka dah chu a puak rual ta a ni.

Dt. 30. 10.2008 (Thursday) : Zan dar 7:40 pm passenger pathum ka nei:Zan dang ang bawkin motor tlan lai chu a hmun ngaiah hian a thi leh tlat mai a, motor chabi-a off angmai hian vawi leh khat ah a thi tawp mai a ni, a hnu reilo teah a nung leh mai a, tluang takin Kawl kulh kanthleng leh ta.

Dt. 1.11.2008 (Saturday) - Zan dar 7: 30 pm passenger panga ka nei:Zan dang ang bawkin motor tlan lai chu a hmun ngaiah a thi leh ta hmak mai a, brake ka tlawh full reng a, chuti chung chuan motor chu hnung lamah ft20 chuang a tawlh let a. Kan ding fel chu motor hmalam chu zo taka chawi ang mai hian kawng chhak hawi zawng hian a inher ta a. Hemi zan hian, Kawlkulh Sumo DZ in min zui chho a, a khalhtu leh a chhunga chuangte pawhin min hmu ve reng a ni.

Dt. 3.11.2008 (Monday) - Zan dar 8:00 pm passengerpasarih ka nei:Hemi zan hian ka passenger zingah ka pu (ka nu putea) C. Ropianga, Kawlkulh pasaltha leh Upa F. Lalchawiliana te an tel a, thilmak thleng a awm tak zeuh zeuh avang hian ka thiante'n 709 truck-in min lo nghak a, kan inzui chho ta a. Ka motor a thihna thin hmun kan thlen chuan a thi leh ta a. Reiloteah a nung leh mai a, ka thiante chu "Tlan hmasa rawh u" ka ti a, ka zui chho ve ta a. Tichuan Km 1 vel kan kal hnu chuan, 'let leh ila i fiah ang u' an ti a. Ka thla a muan em avangin kei pawh ka phur khawp mai, mahse ka passenger thenkhat chuan an hreh khawp mai, hreh chung chungin kan let thla leh ta a. A thih thinna hmun chu kan pel thlaa a thlang deuhah kan in-turn a, engmah kan tawk lo. A thih thinna bul kawng zauah chuan kan ding a, zunram kan thiar a, chutihlai chuan ka pu chuan torchlight nen motor thihna thin chu a en kual a, engmah thawm hriat leh hmuh a nei lo.

Kan inthiar zo ka passenger-te pawh an lut kim vek tawh a, motor hnung lam pen thum velah chuan ka va zung nawn leh a. Hetihlai tak hian ka pu pawh chu motor-ah a lut ve chiah a. Tichuan ka zunna thlang hnimbuk kar atang chuan pa lian takpahnih hi an rawn lang thut mai a, ka awmah leh ka kerekah manin min phih ta lawp mai a. Tan ka han tum a, "E he!" ka ti a, ka te thawt a, ka tukhumah hianthingfaka vuak ang mai hian a ri chawrh a, a bak chu ka hre chhunzawm ta lo a ni....

Ka passenger-te leh ka pute sawi danin ka pu motor-a a lut chu ka luh ve loh thu an lo hrilh a, chulai tak chuan motor hnung lamah ka te ri an hre zui ta a, ka pu leh passenger-te chu torch light nen rawn zuang chhuakin min rawn zawng ta a, mahse min hmu mai lo va. Ka zunna zawna hnim pe thla hun chu ka pu chuan hmuin min rawn umzui nghal a, kawng atangameter 15 velah nikhaw hre lovin min rawn hmu ta a ni.

Midangte ko thlain kawngpuiah min zawn chho a, helai vel hian ka mar a awm lo va, an hlauthawng hle niin an sawi. Kawngpuiah chuan Upa F. Lalchawiliana chuan tawngtainate a hmang a, chumihnu chuan motor dang lo thlengte nen Kawlkulh min panpui ta a, rei vak lo inah min chawlhpui a, tawngtairualte an neih hnuah Dam dawi in min panpui nghal a. He mi zan dar 11:30 vel hian biak theihin ka lo harh leh ta a ni..........

2. PALIAN PUI, HMUL DUR MAI AN MUTPUI: A mah hi thian ngaina tak mai a nih avangin thian pawh a ngah hle a, an thian ho hian riah khawm pawh an hrat ve hle a ni. Naupang kum 10 mi vel a nih laiin anthian hoin an mahni in ah an riak khawm a. An in hi choka lam leh bed/sitting room hi a hrang deuh in a awm a. Kawngka pawh a hran ve ve a luh a ngai a. Zan dar 10 vel a ni a, a nu leh pa te pawh mut tumin bed room lam an pan fel a. An thian ho pawh chu an mu chu a ni ve nghal mai a. He mi zan hian an thenawm hnai ah pa pakhat a boral nghe nge. Light an ti thim a, an mu fel ren rawn a. An kawng ka kalh that vek chu tu a maw ni hian pawn lam atangin awlsam te in a rawn hawng a, inchhung ah chuan a rawn lut a. He tia a kawngka hawng leh in chhunga a lut thawm pawh hi a nu leh pa pawn an lo hre ve vek a ni.

Chu pa chu tawng pawh tawng lovin an inkar ahchuan a rawn mu ve ta mai a. An mahni pawh chuan eng ah vak ngai lo chuan an mu tlang hmiah hmiah tho a. Rei fe an mut hnu a an han khawih chhin nak chuan a lo hmul thup mai a ni. Tichuan zan khua a an mut hnu chuan zing khawvar dawn lamah a chhuan san leh ta a ni. An la naupan avang hian hlauh na chang pawh an hre lo a ni awm e..........

3. NULA IN CHAKAI MEICHHER CHHIT NA AH A KO: A mah hi hlauh vak pawh nei lo a nih avangin lui te hia mah hian a kal mai thin a. Zan chakai meichher chhit te pawh hi nuam a ti hle a ni. A ma sawi ang in aw. Kan khaw pawn mai ah hian side-way restaurant hi a awm a, chu mi thlang lawk ah chuan kawr te hi aawm a. Tum khat chu chu kawr te chhit tur chuan kain buatsaih a. Khaw thim lek lek ah chuan kawr chu ka thleng thla a.

Mei kan zu vang vang phawt a chu mi hnu chuan ka mei ka chhem alh ta a. He kawr te kam vel hi lei pui atan a nei te pawh an awm hlawm a. Tichuan chakai chu ka chhit chho tan ta a. Enge maw chen ka chhit hnu chuan ka duh tawk hnai ta a. Kawr kamah ka peng a mi sawhthing hmun a ka kal lai chuan 'Ngurpui' ti a nula aw in min ko chu ka hre ta a. Mahse ka chhang lem lo. Vawi thum lai mi a ko nghenghe. Tichuan in lam pan chuan ka haw ta vang vang mai a ni. A tuk ah chuan ka thiante hnen ah ka hrilh hlawm ta a, ka thiante chuan kal leh an rawt ta a. A tuk zan chuan thian paruk vel lai hruai chuan kan kal leh ta a.

Kawr mawng lam atang tho chuan kan zawh chho leh ta a. Mi sawhthing hmun kan kal lai tho hian 'Ngurpui' ti chuan min rawn ko leh ta a, vawi hnih min ko na ah chuan kan tlan chhe ta hum hum mai a, mi sawhthing hmun te chu kan chil chhe nasa hle ang...........

4. AIZAWL LAMAH VE THUNG: A mah hi driver a ni kan tih kha, Aizawl veng hrang hrang ah pawh mi motor khalh hian a lo khawsa ve nual tawh a ni. A ma sawi ang bawk in aw. Tum khat chu Aizawl veng pakhat(veng hming thup) ah mi taxi khalh in ka awm a. A taxi neitu te in ah hian ka riak nghal mai thin a. Tum khat ka taxi khalh haw ka thleng chu Taxi neitu te in atanga hla vak lo, ka thiante in a chaw ei turin ka insiam a. Ka haw hma loh avangin zan dar 7:30 vel ah chuan chaw ei turin ka chhuak a.

Ruah lah chua tla deuh siap siap a. Chutia mahni chauh a ka kal lai chuan min tawk zawng a rawn kal ni awm tak hi ka hmu a. Zan a nih tawh avangin ka hmu chiang thei lutuk lo. Tichuan thil rimchhe deuh rim chu ka hre zui ta a. Ka mit chu vai deuh riai hian ka hria a. Ka mit kan nuai a kan men leh chuan ka hma ah palian tak, sang em em mai hi a lo ding ta reng mai a. Ka hlau lutuk chu chet ngaihna pawh ka hre lo.

Tichuan nikhaw hre lo chuan ka awm chu a ni zui mai a. Hetia ka awm hi a rei lem lo a. Kan harh leh chuan a lo awm tawh lo a, tichuan chak theih tawp inka chaw ei na lam pan chuan ka tlan ta a ni. Tichuan ka chaw ei natur chu thlan tla phung in ka thleng ta ani.( He thil hi a mah in a sawi chhuak mai lo a, a chaw ei na tur a va thleng kha hah em em leh thlan tla phunga a thleng kha mak an tih em avangin an zawh fe hnu ah a sawi chhuak ngam chauh a ni.