HEARTLESS LOVE

( He story hi hmanlai 198..vel ami kha nia,a bu hi a hlui tawh ema,a lettu hming pawh hmuhtur a awmtawh loh avangin a lettu hming dah loin ka rawn chhawp chhuaka,a lettu hria in awm anih chuan khawngaihin minlo hrilh ula ka lawm hle ang.)

                          Chapter - 1

Chumi tlai nipui lai chu nuam hle mahse Clare chenna lama a haw lai chuan China i chu a inngaihtuah nasa mai a, van dumpawl thiang kuk mai leh boruak nuam tak te pawh chuan a rilru an la peng hman tawh lo.Chanchinbu lei tumin luikama dawr chu a pan a,beisei takin hna ruak awm leh awmloh chu a en nghal vat a,mahse nidang ang bawk - Awm lo.

A chanchinbu lei țangkai lo zet chu a kawrchung ipteah chuan a hnawh lut nawk a,a boot bun chuan lei chu a khawng tlauh tlauh ringawt a.Hnathawh tur a mamawhna chauh hian a tilungngai ani lova,chenna tur hmun a mamawhna hi a harsatna lian zawk chu niin a hria ani.A chhan chu karhnih emaw lek ah Clare chuan pasal anei tawh mai dawn si a,chumi hunah chuan kawtthler bak chu chan a nei dawn lo tlat ani.Aw,hetiang harsatna ațang hian engtinnge ka talchhuah ang? Pathian chauhin a hria ani,a ti rilru nauh nauh a.

A kwngzawh tetakte ațang chuan kawngpui lam chu a pan leh a,Italy a a hnathawh a bansan mai kha thil atthlak tak chu alo ni e.Mahse a hun lai kha chuan thlan tur dang nei miau si hek lo le!

A rilru chuan Rome a a hun hman tawh dan te chu a chhui let a,khanglai hun kha chu a nuam ani,ka hlim em em bawk si a,a ti rilru nep nep reng a.

Kum 18 anih a,fahrahte Convent ațanga alo chhuah lai kha chuan a tan hna a harsa lova,Magazine lar tak pakhat ațanga Italian naupang pahnih awmtu tur an duh thu an rawn chhuah veleh khan lawm takin a duh thu a thawn vat a,tichuan Londona hotel pakhatah Signor Cencelli te nupa hmaah Interview a nei nghal a.Cencelli te nupa chu an nelawmin,karhnih hnu maiah chuan China pawh Rome ah a awm ta mai reng a.Cencelli te fa pahnih Franco,kum ruk mi leh Guilia kum li mite a hmuh hnu phei chuan chawp leh chilhin a ngaina nghal a.

Kum hnih zet Cencelli te chhungkaw zinga a khawsak hnu phei chuan khawpui bul lawka an in ropui zet chu China pawhin nuam a ti tak zet tawh a,an chhungkaw zinga tel ve zelin,Europe khawmualpui pawh a tlawh tam hle tawh a,Italian țawng pawh a thiam tawh hle ani.

An chhungkaw zinga mi ang chiah chiaha an endante chu China chuan mak pawh a ti hial zawk a.Adeli Cencelli pawh China aia kum hnih chauha upa a ni bawk a,reiloteah kawmngeih tak tein an inkawm ngeih nghal a,chuvang tak chuan ,Naupangte kalsan harsa a tih chu thuhran nise,ani zawk chu kalsan harsa a tih chhan tak pawh ani.

Thla tam tak ral tawh mahse,tun thleng hian Italy a a hun hman tawplam a ngaihtuah hi chuan China chu ala khur thei deuh thaw hial ani.Cencelli te nupa chungchangah hian rinhlelhna chhete mah ala neih ngai loh avangin rapthlak a ti a,engemaw changa Signor Cencelli an a en vung vung țhin te kha hetiang lamah hian alo ngai hauh lo țhin kha a ni a,alo tisual deuh chu ani.

Inzaina tenau deuh a neih dawn țuma Adele damdawi ina a luh țumin, China chu Signor Cencelli nen chauh inah an awmdun a.Hemi țum hian China chuan him lo riauva inhriatna a nei țan a,Signor Cencelli pindana zanriah a han pek ațang phei chuan him lova inhriatna chu a nei nasa zual ta ani.Tlai khat chu China lo beisei loh ber a chungah a rawn thleng ta a,a thinrim lutuk chuan khur zawih zawih chungin Cencelli hmaiah chuan a beng țhuai a,mangang zet chungin a pindanah chuan a inkalh khum ta hmak a.

A duh lohna khatiang tehhrepa a lantir avang khan Signor Cencelli chu a thinrimin,China nun chu hremhmun tluk zeta hrehawmin a siam ta hi ani ngawt a.Tunhma lam zawng te khan tlaktlaina reng alo nei ngai lo emaw tih tur khawpin thinrimna tur leh sawiselna tur hlir adap ta mai a.

Dinhmun khirhkhan takah a ding ta miau mai si a,a hna chu bansan a,haw vang vang a duh a,mahse Adele nidang zawng aia amah mamawhtu han kalsan hmiah chu harsa a ti si a,mahse loh theih lohvin Signor Cencelli chuan a chhuahtir ta tho ani.

Adele chu damdawiin ațanga alo chhuah hnuin tlai khat chu Guilo leh Franco te a muttir hnuin a tlu zal ve mai mai a.Zanriah ei tura inthlak a tum lai takin Signor Cencelli chu a hmaah chuan alo lang hlawl mai a.A mitmeng rawpntak chu a hmuhin,huatna namen lova khat chung chuan rang lutukin azuang thova,mahse a kilah dang chepin,Signor Cencelli chuan fawh a tum ta a.China chu keite ang maia kawlhin a che a,an hnung maia Adele lo ding reng an hmuh tak thutah chuan Signor Cencelli pawh chuan a tawpsan vat a.

Adele pawh chuan a tuar nain,hrehawm pawh a ti ngei mai! Han awm luih zelna chi ziazang a nih tak loh avagin a tukah chuan China pawhin rilru na tak chungin a chhuahsan ve ta nghal a.

Chung thil zawng zawng chu thla hnih liam taa thil thleng kha an ni a; chumi hnu chuan a țhianțha ber leh a țhian neihchhun Clare hnenah a kal nghal a.Clare hi a ngilneiin,a țhatna hi rulh zawh sen chi ni pawhin a hre lo hial ani.A duh chen chen a hnena awm turin leh Rome a a chunga thil thlengte theihnghilh tir tumin theihtawp chhuahin a lo țanpui zui ta ani.

A chunga thil thleng zawng zawngte kha theihnghilh thei se chuan a tan pawh a țha ber ang tih a hria a,mahse chuti mai chuan a theihnghilh thei mi bik silo.Signor Cencelli chuan a naupanna rilru leh hmangaihna kawnga mipa te a thlir dan a tidanglam vek a,Signor Cencelli ang vek turah erawh chuan ngai bik lo mahse,mipa te chunga rinna nghah chu har dawn hle in a hriat phah ta ani.

A inngaihtuah muk em avang chuan kawngpui a pawh leh tawh tih pawh a inhre hauh lova.Chutah Car horn ring zet maia han ri țhawt leh a hnua Car break han ri chik tuar chu a hre zui nghal zat a,a phu chiang kher mai! A mitmeng paw raih mai chu a meng zau kawk a,chu Car in a chil teuh zia a han hriat avang chuan hlauvin a ding khawng ta reng ringawt a.

Car ațanga driver lo chhuk a hmuh chuan China chu ngaihdam dil inpeih sa atin a lo ding a,a kalna kawng enna chang alo hre lo chu a tidik lo ani.A chilhlum lo emaw,hliamna tak a tuar lo emaw si chu thil mak tak zawk ani!

Chung thilte a han ngaihtuah phei chuan a hlau thar zual leh hle a,chutihlai chuan driver chu a hmaah alo ding tawh a.Pa sang tak leh hang lam deuh hi ani a,a thinrim chu a hmel a dur khuih mai lehnghal a.

"I va han chhaw ve! I kalna i en ngai miah nange?" a rawn ti tuar a.

China chuan hlauthawng hmel tak hian a en hau a,chupa thinrimzia a han hmuh chuan ngaihdam dil alo tum lawkna zawng zawng pawh chu a hrawkah a thamral zo ta vek maia.A chhan tak lawk loh avanga thinrim zual ta sauh ang mai hian chupa chuan a darah na zet mai hian a țham ta lawp a,a sam țawnna a inphelh thleng mai chuan a sawi ta nawk nawk mai a.A chetdan em em chuan China thin chu a tirim ve ta phat mai a.

Mahse a țawng chhuah hmain chupa vek chuan, "I awmdan chu engtizia tehhrep nge maw nile? Ka chilhlum teuhzia che hi i hre lo em ni?" a han ti leh a.

China pawh chu a thinrim ve takzet tawh a,a sam phelh darh niaih tawh chu hnunglamah a thing khawm a,chupa chelhna ațang chuan a talchhuak ta lawp a.

"Nang pawh i ti lutuk deuh ani lo maw? Hei hi vantlang kawng ani a,i khalh chak lutuk anih ka ring bawk," tiin a tum aia ring mah chuan a ti ve ta siah siah mai a,a mit paw reih te chu thinrim avangin a eng phat tawh zawk a.

Chupa chuan a en reng ringawt a,a mitmengah erawh chuan engmah a lang lova.China chuan chupa Car pawh chu a va hmu a,Sunday News paper a a chhiar ațangin Porsche ani tih a hre nghal a.Chupa chu a han nui suk a,mahse a mitmengah erawh chuan a nui tih reng a hriat chuang loh.Mit la miah lovin chupa chuan a en reng a,en zah a tum anih chuan a inngaihtuah nawn leh a ngai ang,China chuan alo ti rilru a.

Pian thiam tak leh mi hipna ngah tak chu ani phawt mai tih China chuan a hre thei a; tin,pa hausa tak a ni ngei ang tih pawh a car leh a suit țhui nalh tak ațang chuan a rin theih a.

Chutah, "chu chu min puhna a ni maw?" tiin a hma aia aw dam deuh zawk chuan a han ti a.a aw ki a thlak thut mai chu China chuan a hmaa a thinrim aw aimah khan hlauhawm zawkin a hria a.

Chutia indinchilh reng eingawt mai chu China chuan a ning ta deuh a.Hetiang tehhrep hian lo ti lo sela chuan ngaihdam dil pawh a lo tum kha ani a,mahse a rawn chhalh danin a zir tak miau si loh avangin luhlul a chhuah khum ve mai tur lah ni!

Zamna nei miah lo chuan a en ve kal mai a, "I duh dan danin ngai rawh,tunah chuan min hrethiam la......." tia kal mai a han tum a.Hepa lak ațang hian kalbo vat zawk sela a țha ani.A darah chuan a la vuan ve bawk na a,mahse awlsam takin a talput leh mai a,a hawi sawn nghal a.

"Oh,la kal mai rih love," tih pahin rang zetin chupa chu a hmaah bawk chuan alo ding leh a,an indin hnaih em avang chuan an insi deuh thaw hial a.China chuan Italy a a awmdan kha a hrechhuak ta zawk a,a hlau thar leh ta hle mai a.A hmun chu inang lo mahse hetiang chiah hian Signor Cencelli hmaah khan a ding kha a ni si a.

Chupa chuan a kuta rawn vawn a tum lai tak chuan ani chu chi ai tak chungin alo inveng a,mahse rang zetin a man a,a vuan nghet hle mai leh nghal a.China chuan chupa chu a kut lehlam chuan a han nam nghek a,ani lah chuan ngaipawimawh lem lo tih hriat fe hian a lo en reng ringawt mai si a.

China chuan, "I kut hi la sawn vat rawh," a han ti țhat a,thinrim leh hlau bawk si chuan a meng alh phat tawh mai a.

Chik zet maiin chupa chuan a en rwng nain,a thinrimna chu a haider sak tlat a.China in chupa mitmeng buang thang mai a han en leh chuan tun lawka a ngaihdan kha a thlakthlengtir leh ta vek mai le! Hepa hi Signor Cencelli a ni lo tih a hre chhuak a,chuvang chuan a hlauh ngawt nachhan tur a awm lo.Chupa kut chu a sen vek tawh a,a chak hmel hle nain, a kutzungțang chu a sei sel sawl hle mai thung a.

Muangchang hian China a vawnna chu a thlah a,a huhang chu a tuar lo nge,China chu a khur dar dar mai a.A nuihzat hmel em avangin China chuan a hmel pawh a en duh tawh lo.

"I dam lo em ni?" bung ang reng takin chupa chuan a han ti nghut a.

China chuan muangchangin chupa chu a han en a,a hmelah chuan nuihzatna engmah hmu tawh lo mahse,engemaw ti tak hian a chhungril chu a tina ru tlat mai a.

"Inphahhnuai luih hi i ching viau em ni?" alo ti ve vat a.

Thil nuihzatthlak tak a sawi ta emaw tih mai tur hian,a kareh mawi tak mai chu chupa chuan a han pet sawi a,amah a nuihzat leh tawh ani ngei ang.China thinrim lutuk chu a mittui a tling piau tawh mai a.

"Chutiangin ka inphahhnuai tih pawh ka hre lo."

"Chu pawh nise,i ching thuai ta ve ang.......Ngaihdam dil i nghak em ni?" Chupa chuan a han ti leh a.A awmdan chu a naupan thlak hle chuan a hria a,mahse a ngei ve tlat ani.Chupa chuan a hmui a chip hmak chu China chuan alo hmu reng a.

"Nghak pawh ni ila,tih awm loh chu a ni lovang chu,mahse nang ang naupang chhe lakah chuan engmah ka beisei love," chupa bawk chuan a ti leh a.

A tham loh dan em em chu a hmaia ben sawk mai China chuan a duh a,mahse a thinrim poh leh chupa chuan nuam a tih hmelin a lang si a.A tihngaihna hre lo chuan a ha var thianghlim tak mai lang țhah khawp chuan a nui ve ta ringawt a.

"I nunrawng kher mai,vanduaithlak taka kan inhmuh leh tawh loh hi ka beisei," a ti hmak a.

Chaltlai zeta a lo chhan leh a lo rin tehlul nen,chupa chu za awm zet hian a nui ta hawk hawk zawk a,China chu a hrilhhai lehling kher mai.

Makti zet hian a en hau a,amah nge maw chupa chu â ta zawk le? Chup chuan a lu chuba thing nar nar a,la nui reng chung chuan, "I chhaw reuh hle mai," a han ti zui a.

China chuan a haw ta hle mai a,chutihlai ngat phei chuan chupa tluka huat a neih pawh a inring lo hial a ni. "I țawng,ngeiawm zet zet mai ngaithlaa helai hmuna chawhnu pum mai hmanral ka tum lo," ring zet hian a han ti ta a.

Chupa chuan a mitmu buang thang mai chuan a rawn en a, "Ka tikhawtlai che elo?" ti el tih hriat tak hian a lo ti a.Chiang zet mai hian China taksa pum mai chu a han en a,A fur jacket tawite,velvet kekawr hring leh leather boot bun nen chuan a lan nalh vak pawh a ring lo kher mai.

Thudang engmah sawi leh tawh lovin China chu a han in her nghat a,chupa car chak hmel zet chu pelin,lehhawi leh tawh hauh lovin a kal ta hnak hnak a.

A kalpah chuan mi nuihzata awm hi chu ka Talent dawn vw anih ber awm hi maw! a ti rilru nauh nauh a.Chutihlai chuan Car Engine ri ham ham chu a hre zui nghal a,lehhawi miah lo mahse chupa chu a kal ta ani tih hre thei mai a,a thaw huai nghe nghe a.

A kal liam rual ruala theihnghilh nghal daih a duh tehlul nen Clare chenna in a thlen leh thleng pawh chuan a ngaihtuah chhunzawm ta reng a.Kha Porsche pa nui ring zet mai kha,chuti maia theihnghilh theih mai chi ani tlat lo ani.

A thinrim deuh em bawk avangin nidanga a kal aia chakin a kal a,Clare chenna chu Victorian in lian zet mai hi ani a.Kum nga vel kalta ațang khan kaw tam takah an siam a,Clare luah chu chhawng chung ber,lian leh thawveng nuam tak hi ani a,China pawhin a pasal nwih huna luah ve a tum a.Mahse a vanduai kher mai,Clare pasal neih tur chu lo hre hma deuh an awm a ni ang,chu in chu inneitunu chuan a fanu pasal țhen lo kir leh tawh luah atan a hauh ta tlat mai a.

Kawngkhar lianpui chu nam hawngin,inchung lamah a tlan chho zai zai a,a chahbi chu phawrhin Clare hming inziakna kawngkhar chu a hawng leh a,a lut nghal a. "Clare, ka lo haw tawh asin," tih pah chuan a jacket chu a phelh a,kawngkhar hnungah chuan a bang nghal a.

Ani chuan, "I va luck em?" a rawn ti a.Choka lam ațanga rawn chhuakin, a rawn nui sang a,a sam chu a hnunglamah a țawn khawm laih a.

China chuan a lu a thing nar nar a,nui chung hian, "Vawiin chu luck lo," zangkhai tak hian a lo tive tawp ringawt a.Athin la phu dup dup avang chuan ama aw pawh chu ang lo riauvin a hria a.

Clare pawhin engemaw tak zawng a hria ani.A chhan chu a hmelin nidang a ang lo tlat a,a thutak riau mai ani, "Engemaw chu ila hmu ngei ngei ang,hmanhmawh duh lo la," hnem tum tak hian a han ti a.

China chu a nui leh sak a, "Ni e,rei tak nghah hi ngai lo hram sela. Tihpui i ngai em?" a ti zui ta daih a,an thusawi chu thlak vat a duh ani.A rilru lakpenna tur thil a awm loh chuan a rilru hahna chuan a mittui a ti hnai mai dawnin a hria a,Clare chu țha in fel teh mahse mahni inkhawngaihna a nei lo thei silo.

Clare pawh chuan hriatthiam hmel takin a rawn en a, "Parbawr chu i rawn hawn em?" a ti ta daih a.

Chuveleh China chuan, "Oh,ka theihnghilh daih mai," tihpahin pawi ti awm fe hian a chal chu a dawm a. "Ka va kal leh ange,a pawi hle mai,ka thluak a thawl thut ani ta ve ang," tih leh kawngkhar lam pan chu a rual a,a coat chu a ha leh a.

"A ngai lovang,i chhuah hnu lawk khan Mrs Collen in anțam min rawn pe țeuh mai a,zanin tlaiah chuan kan siam mai dawn nia," alo ti thuai a.

China hrilhhai hmel chu a hmuhin, "Hey,pawiti mah ta che,parbawr ai chuan duh pawh ka duh zawk reng reng asin," Clare chuan a han ti leh ngat a.

China pawh chu a nui ve leh ta a,an pahnih chuan choka lamah an lut leh ta a.Oven awmna lam pana kal pahin China chuan a hnar a len vat a, "Bawngsa ka roast anih kha," Clare chuan alo ti vat a.

China chuan Apron hreng mawlh mawlh chung chuan, "Enge ka lo tih ve ang?" a han ti a.

"Alu kha lo siam mai rawh."

"Awle," tih pahin China chuan chhuara Alu leh a velna chu a lathla a,dawhkanah chuan a chhawp chhuak nghal a, "Engzat ei tur nge ni ang?" a han ti leh a.

Clare chuan a dar a san ak a, "Min zawt ta hram mai maw? Ka hrechiang lo nain, pali,panga vel kan nih ka ring." China in a ngaihna hriat loh hmel zeta a en hau avang chuan, Paul a te an ni a,an țhian țha tak mai leh a țhianpa unaupa chu an ni a.Mahse a unaupa erawh chu vawiin hian London ah alo kir lo mei thei bawk," a han ti barh barh a.

Clare sawi dan chuan China nuih a ti za hle mai a.A chhan chu Paul hi a chiang lo riau mai țhin a,Clare hian a khuh hneh mai pawh a.Kum kalta ațanga Art College a inchhar an ni a.An in date hmasak ber țuma an inhloh teuh zia pawh Clare chuan a sawi fo țhin.Paul chuan chumi țum chuan an inhmuhna tur a hai pek a,Clare in an intiamna hmuna alo nghah reng lai chuan Bus a Theatre dang pana Paul chuang chu a va hmu ta a,Red Light avanga Bus din lai tak chu a ni hlauh a,Rang zetin Clare chuan ava pan a,a va nang hman leh ta hram ani.

A țhiannu a han en chuan a țhiannu chu China chuan a itsik rum rum a.Clare chuan hmangaih leh innghahna a hriat theih tirh ațanga neih a duh em em chu a nei a.......Ni lo,mahni inkhwngaih bawk a țan leh dawn.....!

Ei an peih ta! Dining roomah chuan dawhkan chu an remfel a.Zinglama Clare in pangpar a lei chu China chuan dawhkan lai takah chuan a khawi a.Lungawi zeta an chaw eina tur a thlir vel hnu chuan inthlak hmaa inleih tleuh zawk a tum ta a.

Minute sawm hnu a Clare i,hair dryer a a sam a chhem ro hauh hauh lai chuan eng kawr nge a hak ang tih a lo inngaihtuah ve a.Tin, kawnga mi tawhkhirh zet mai a tawh chanchin kha engvanga Clare chu hrilh miah lo nge anih chu a ngaihtuah let bawk a.A thinrim hmel kha a mitthla ah alo lang a,rinhlelh rual lohvin pa hausa tak leh hmelțha tak ani phawt mai.A.rilru a luah mai bakah a chanchin dang pawh la hriat a chak ani.Mahse chutiang hre tur in an inhmu leh tawh awm silo,a tlai deuh ani.

Nidang ang bawkin zanin pawh hian make up hman vak a tum lo.A rilruah thildang a tam avangin inchei pawh a chak vak lo ani.Mascara leh lipstick a inhnawih hnu chuan wordrop lam a pan a,kawnga a mi tawh bawk kha a rilruah a lo lang leh a.An intawh dan leh an inbiak dan zawng zawng kha a hrechhuak leh a...."Engatinge maw ka ngaihtuah leh țhin chu ni....?" a ti sap nghe nghe a.

Ngaihtuah tawh loh tum rilru tak chuan a kawr hak tur chu a la chhuak a,Indian cotton rawng dal lam,silver rawnga țhuipar hi ani a,a kal zawng chuan a tle zet zet thei a; a sam leh a mitmu rawng nen pawh inhmeh hle hian a hriat ani.

A hmel a hmuh ngai miah loh,a nu thlalak chuanna silver țhi chu a awrh leh a,he thil chauh hi a nu laka a rochun awmchhun chu ani.Sandal pheikhawk keartui sang deuh a bun leh hnu chuan a inpeih ani ta mai a; Choka lama eitur vel te chu ava endik leh phawt a.

Clare chu eirawngbawl thiam tak ani bawk a,engkim mai chu a tui hmel ser sawr hlawm hle a.Alu a en lai tak chuan Intercom chu alo ri a,Paul a lo ni a.Hmehkhep pakhat chu a han hmet a,kawngkapui chu a inhawng a,Paul chu lut tura hrilh pahin Clare chu a han ko a.

"In turte pe in lo dawngsawng lawk ta che,minute nga velah ka inpeih ang,"tiin khum pindan ațang chuan a rawn au va.

"Awle,rawn hmanhmawh lutuk suh." China chuan a ti veleh vat bawk a.

An awmna kawngkhar an rawn kik takah chuan China chuan a va hawng a,Paul leh ahriat ngai loh mi pakhat hi an lo ding a. "Hello,Paul,lo lut rawh u," nui var var chung hian a lo ti a.

"Hello,Love, i dam em?" tih pahin Paul chuan a biangah a rawn fawp zauh a.

China pawh chuan a fawp let ve a,a ngilneiin abula awm hi a hahdamthlak em em a,a hna pawh tling taka thawh tum hram țhin mi ani.A hmel te pawh a țha in,a sam te pawh a fai hmel hle a,a smart zeih zawih hle ani; wine bur hnih hi China hnenah chuan a pe a.

Nui chung hian, "Kan eitur ka hre lo na a,chaw ei tih tui nan a um hnihin ka rawn keng ani," a ti a.

"I ti lawmawm hle mai,tihvawh ang em?" phur tak chung hian a lo ti ve a.

An hnunga han khuh der khak khak ri a hriat veleh Paul chu a lehhawi vat a.

"Aw....James,a va han pawi em! inhmelhriattir tur che u ani a...." tiin China chu pawitih hmel tak chuan a en a,China lah chu a nuih a za ru hle thung a.

"Clare i ni ang chu maw? Paul hian i chanchin hi a sawi fova, alo sawi țha duh lo mah mah zawk anih hi," tih pahin China kut chu a rawn vuan a,nelawm tak hian a nui sang a.

China pawh chuan alo nuih let ve a, "Clare chu ka ni lo tlat! Nang tunge i hming?" a han ti ve a.

Paul chu a rawn inrawlh ta vat a, "Duhtak, keima thiamloh vek ani,a bul ațangin kan țan țha leh ange; China,hei hi James Galloway a ni a, tin,James,a ni hi chu China Harmon, Clare pindan luahpui tu leh a țhianțha ber ani," a rawn ti ta zung zung a.

Chutah an han inchibai ,ha leh a,James chu a nuihzat hmelin,a mit paw ram maite chu a eng deuh phat a. "Min ngaidam rawh Miss Harmon,mahse Clare i ni lo hlauh chu a lawmawm ka ti khawp mai," a ti a.

"Khawngaihin China tiin min ko zawk rawh," tiin nui chung hian a han ngen ve a,a kut ala vawn reng pawh chu a lasawn ta a.

"James tia min koh duh a thu a ni ang chu," thutak hmelpu deuh hian a han ti a,a mitmengah erawh chuan ala nuihzat hmel hle tho a.

"Awle,James chu ni rawh se; sitting room ah hian lo lut ula,intur ka han siam ange," a ti ta a.

An kawrchung a hlih sak lai chuan James chuan, "Khawiah nge Clare chu?" a han ti hau a.

China chuan, "A inthlak lawk a nih kha,a lo kal thuai ang," alo ti vat a.Hall a an coat a khaisak hnu chuan Refrigerator ațangin wine var ala chhuak a,an vaia intur chuan a thli chhuak ta a; chutihlai chuan Clare pawh chu a rawn lut ve ta chiah a.A silk kawr hak chu a inhmehin,a sam a suk fai hlim pawh chu a tle siau mai a.

Tichuan introduction chu an han țan țha leh a,China leh James chu dembel deuh tih hriat fahran hian Paul chuan a han sawi vel a.

China chu choka lamah a va kal leh leh a,a lo let leh chuan James hmel chu chiang deuh zawkin a han en nawn leh a.Clare leh Paul chu alo titi pui bawrh bawrh a,kawm a nawm hmel hle pawhin a hria a.

Kum sawmthum chu la tling lo deuh chuan aring a,a sam chu a tamin,a buang deuh bawk a,a hnar ngul sang veh vawh a han en chuan tuemaw a hriatchhuah tir zawk mai lehnghal a.....! Porsche a a mihring hmuh kha ani a hriatchhuah chu ni.James chu a han en nawn leh a,a kareh chu a zim deuh nain Porsche ami nen kha chuan an inang a ni! A thawmhnaw rawng pawh chu China duhzawng tak ani a,kekawr buang leh a rem tur tak waist- coat a ha a,silk kawr var thianghlim tak a ha bawk a; ala naupan hmelin,a hmel pawh țha ve tak ani.A chanchin pawh han hrechiang mahse a mi duhzawng tak a nih ngei pawh a ring hial ani.

Pindan sir lehlamah chuan ațhu a,hruihnanga siam,an țhutthleng te chu Clare in an inneih buatsaih vel nana a lei a ni a,mi sale a lei a ni nain a nalh hlawm hle ani.Amah chauhva a țhu chu James chuan a rawn hmu a,nui chung hian a rawn pan ta a.

"I khua a va han har awm rauh rauh ve?"

China chuan a lu alo thing a, "Khawhar love,ngaihthlak hi nuam ka ti zawk ani," ti chauhvin alo chhang a.

"Engtik ațang tawh khan nge Clare nen hian in lo inhriat tawh?"

"Kei kum ruk ka nih a,ani kum sarih anih lai ațanga inhre tawh kan ni."

"Ah,naupan lai ațanga țhian maw? I va vannei ve China! Kei erawh chuan ka naupan lai ațanga ka țhian neih ve chu ka unaupa chiah ani," lungawi lo hmel deuh taka a han tih chuan China nuih chu a za hle mai a.

"A va vanduai thlak ve,khawnge i țhiante zawng zawng chu an awm zawh tak a?" alo ti a.

James chuan a dar alo chhin ak a,amah chu a innuihzat hel hle mai a, "Rapthlak deuh asin,ni lawm ni? Khawvel zaupui maiah mahni unaupa chauh kawm tur han neih mai chu.....! Naupangte ka nih lai ațangin hmun dang dangah kan insawn kual țhin a,țhian bulbal deuh nei tur chuan University ka luh hnuah chauh awmhmun nghet kan nei ani," a ti a.

"I pa chuan enge a tih țhin a?" dilchhut hmel takin China chuan a han ti leh a.Chhungkhat laina hnai a neih miah loh avang hian mi chhungkaw chanchin han hriat vel hi a chak riau țhin ani.

"Diplomat(ram aiawha palai) ani."

"Chuti chu zin kual vel reng a ngai ang a,a nawm viau awm chu mawle."

James chuan a rawn en a, "Kei pawh a nawm viau ka ring.Anih leh nang i pa in enge a thawh țhin?" a han ti veleh thung a.

Chutah zet zawng China chu a kun ngaih a, "Ka hmu ngai lo,mahse doctor anih ka ring," tiin a chhang ta nghat ringawt a.

James chuan a kut pahnih chu a vawn sak a, "Pawi ka ti takzet ani China, sawi tur leh tur loh pawh hi ka hre țhin lova," inthiam loh hmel tak chuan a ti ta a.

China chu nui chung hian a rawn dak chhuak a, "Pawi tih viau leh ngaihdam dil vel pawh a ngai chuang hleinem,mi chhungkaw chanchin han hriat vel hi nuam nuam ka ti a,ka han zawt mai che ani.I unaupa chanchinte chu mi han hrilh ve teh,zanina lo kal ve tura Clare in a sawi kha a ni em?" a han tih zawm ve a.

An boruak rit deuh hlek chu a zia awm leh tawh tih hriain James chu a thaw ve huai a. "Aw,Bena a ni.Hetah hian in anei a,kar hnih chhung zet chu a chei țha tawh ani.London ațanga an rawn koh țhin avangin a kal a,vawiin chawhnu lam hian a lo thleng lehin ka ring," a han ti ve thuai a.

"Ben Galloway, chu hming chu ka hre tawh thanin ka hria?" China chuan a han ti a.

"Hre tawh mai thei, sumdawng hausa ve tak ani a,a hmingthang ve khawp asin," chhuang hmel takin James chuan a han ti ve a.

"Anih tak chu,kar hmasa pawh khan chanchinbu ah a chanchin hi ka chhiar tawhin ka hre tlat ani."

"Duh aia tam mawle.Tleirawl chimawm zet ang mai hian chanchin hi a ngah ve thei teh ania," hul hak hian James chuan a han ti leh a.

"I ngaina hle ani lawm ni?" nui chungin China chuan a han yi leh a.

"Ngaina e," James chuan a ti mai a.Chutih lai chuan Clare chuan choka ațangin China chu a rawn hui zauhva,chu chu a hmuhin China pawh chu a tho vat a.

"Min lo hrethiam lawk teh,choka lamah Clare ka va pui lawk ange," tiin a kalsan ta nghal a.

Clare chuan ei chu alo siam peih deuh thaw tawh a,China chuan soup chu no ah a thli ve nghal a.Clare chuan nui chung hian a lo fiam a, "James nen chuan in inngeih hmel hle mai," alo ti a.

"A duhawm ngawt mai," China pawh chuan a ti ve mai a.

"Ni e,a duhawm ngawt asin,i lak ațang khan a mit pawh a lasawn hleithei lo ni hialin ka hria," alo ti a.

China chu alo nui har har a,a dik leh dik loh hre tur erawh chuan a hmel pawh alo enchik ve lem lova.

Puar taka an ei kham hnu chuan wine in an han tuihnih leh sak a,an boruak pawh a zangkhaiin a nuam hle nghe nghe a.

"Hnathawh tur kha i hmu ta em?" tiin Paul chuan a rawn zawt thut a.

Ani chuan a lu a thing a, "La hmu rih lo,hna han hmuh mai harsatzia chu nang pawhin i hria anga, mahse ka la hmu ve mai ang," a theih anga aw zangkhai chuan China chuan a han ti ve a.

"Ni e,ila hmu em em ang," fuihna awka lam deuh hian Paul chuan alo ti ve leh vat a.

An țawng ngaithlaa lo ngawi reng James chuan phur hmel tak hian, "Oh,chutianga chenna leh hnathawhna tur mamawh in nih chuan a tihdan tur ka hre thei maiin ka ring," a rawn ti ta a.

An ngawi ta țhap a.Chutah China chuan awih harsa ti deuh tak chung hian, "Enge i thusawi awmzia chu?" a rawn ti ta hlawl a.

"Ka sawi awmzia chu hna leh chenna i mamawh a nih chuan ka țanpui thei ang che ka tihna a ni," muang charh hian James chuan a rawn ti ve ta a.

"Oh, James, min han hrilh thuai la anih chu," hrilh nghakhlel tih hriat tak hian Clare chuan a lo ti vat a.

"Ka hre lo le......! Thupui vaitu a han țan te hi chu nuam ka tih zawng tak mai ani a....." James chuan a han ti te te phawt a.Chutah China hmela beisei leh hlauthawng bawk si a han hmuh chuan, "Helai lawk maiah hian Ben an in a lei a,in hre maitheia,Aspenmere Hall ani a.

Chumi enkawl tu tur chu a zawng mek a,vawiin chawhnu khan London lama a awm chhung chu henglai khuaa lo zawnsak ka tum thu ka hrilh a,tunah chuan China,i duh phawt chuan hna chu i ta ani tawh e," a rawn ti ta a.


                           Chapter - 2


A tuk dar sawmpakhat rik chuan James Car chu China te chenna kawtah chuan a rawn ding dawt a.China chu a hlimin a phur bawk a,James an bell a rawn tihrik hma hma chuan kawngkhar chu a va hawnsak thuai thuai a.

A hna tur vel a ngaihtuah atalangin mut pawh a mu țha lo kher mai a; mahse alo lungkham ruk em em țhin chu kiang dawn taa a hriat a vang chuan James pawh chu phur tak maiin alo dawngsawng barh barh a.

"Good morning,hmelțha," nui chung hian a rawn ti a, ngaihsan hmel takin China han inchei velna te chu a en vawng vawng a.

China chuan, "Hello,James,ka kal thei tawh angem?" alo ti ve thung a.

Nui chung bawk chuan, "Coffee in tur pawhin min sawm dawn nange?" China mitmeng phur tak mai en reng chung chuan a han ti leh a.

Han khawtlai leh chu a hreh hle mai a,mahse, "Tehreng mai,lo lut ta che," tiin a sawm ve ta a.

James chuan a en zawk a,a nui ri ta hawk hawk a,China rilru lah chu hriat a awl nasa si a. "Ka fiamthu mai mai anih kha,chuti takin ka tui pawh a hal love," a ti leh ta a.

China chuan a lei a chhuah khum zauhva, "Hrep tak che hian," a ti hlak a, a nui zui leh ta ar ar a.

"Kal ang hmiang," tih pahin a ban chu a rawn pe a.

China vek chuan James sira țhut pah chuan, "In chu hmuh ka chak tawh em ani," a han ti leh a.

"I rilru tur chu ka hriatthiam pui khawp mai che a,mahse tun thleng pawh hian chu hna chu i thawk duh chiah angem tih erawh chu ka hrechiang lo ani.I hriat angin in lian tak ani a,Ben a awm loh hlan chuan nangmah chauhva i awm a ngai dawn a...." China hmel ngui ta rawih a hmuh chuan, "I hlimna tihchhiat chu ka duh vang ani hauh lo ania,Love; ka hrilh duh zawk che chu.....he hna chauh hi khawvela hna awmchhun a ni lo tih hrilh che hi ani.I duh loh zawng alo nih hlauh pawhin hna dangah pawh ka țanpui thei tho ang che.Aw, thildik lo tak ka lo ti zawk ani," a ti chuai ta raih a.

A motor khalh tibuai lo tur siin China chuan a banah a va vuan a, "Min țanpui tura i inpeih avang hian ka lawm ngawt mai," a han ti a.

James chuan a rawn en zawk a, "Kei tak pawh le,țhian țha tak kan nih chhoh zel pawh hi ka ring tlat ani," a han ti a.

James sawi awmzia chu a hriatchiah loh avangin China chuan chhan mai ngaihna a hre lova.Nakin deuhvah chuan, "Ka chanchin hi i unaupa chu i hrilh tawh em?" tiin James chu a zawt a.

"Ka tum na a,ka be pawp thei ta lo,ka hmuh ang apiang chu hnialna a neih ka ring lo," James chuan alo ti a.

"Anih,a hnena thawkah chuan min lo duh ta lo sela?" hlauthawng rilru tak chuan a han ti leh a.

"Chutiang engmah a awm lovang," awlsam takin James chuan a ti ve mai a.A chhanna chu a beisei ang chiah chu ani lo nain,James chu a inrintawk hmel em a,chuvangin a kuta innghah tawp mai chu țha berin a hre ta ani.Lo hlauhthawn viau lah a sawt bawk hek lova.

Minute sawm panga hnuah chuan kawngpui ațanga inherin,gate hmanlai tawh tak,lunga siam mupui lem bawk vung mai awmna ah chuan a ding ta a.Hung chhunga motor luhna sir tawnah chuan huan enkawl loh tih hriat tak mai hi a awm bawk a.

"Chhe lutuk lo ani lawm ni?" James chuan nui chung hian a han ti a. Chutah, "Ka sawi tawh ang khan he hna hi i duh chuan i thawk lo thei a,hlauh pawh i hlau deuh mai thei ani...." fiamthu tih hriat tak hian a han ti leh a.

Chu building chu uluk fe hian China chuan a thlek vang vang a,James a thusawi avang chuan a nui ve sak a. "Clare chenna in nen khan ka tehkhin deuh a," a han ti ve a.

James chuan a rawn en a, "Kal teh,i han en chiang teh ang hmiang," a ti a. Rang zet hian China chu Car ațang chuan a chhuak ve vat a.

Kawngkhar lo awm hmasa ber, rawng var hnawih chu James chuan a hawng a,an inzui lut ta a.A chhung chu rawng hnawih thar vek ni mahse,luahlum tawk loh ani tih chu hai rual lohin a heiat theih mai a; rawng lah chu hnawih thar tih takah a rim ala nam rum rum a.Ben Galloway chuan rawng inchawih tur chu hre hle pawhin a hria a.

"Engchen nge i unaupa chuan a luah tawh?" tiin amah en rengtu James hnenah chuan a han zawt a.

"Ala luah chiah lo,thla hnih kal taa a lei chauh kha ala ni a,a chei thar lehin rawng te pawh a hnawih țha leh vek a,chung chu hei i hmuh ang hian a zo tawh a,reiloteah a insuan lut mai ang," tiin alo chhang a.

Luah loh rim a nam nachhan pawh anih ngei a ring a, "Khawnge tunah a chen a?" la hawi kual reng chung chuan a han ti leh a.

"London ah in a nei a,tun kumthum kalta chhung kha chu chutah hlir chuan a khawsa ani," a ti a.A nin hmel deuha a hriat avangin thildang chu a zawt kai duh ta lova,chu in fan kual puiah chuan a sawm ta zawk a.

China rin ai chuan a te zawk a,mahse a tunlaiin a ngainatawm riau a.

Drawing room chu rawng uk buang lampang deuh hnawih hi a ni thung a.Chhuatah chuan carpet dup leh mawi zet mai hi a inphah dulh a,chair nalh tak tak bakah lung leh hluma siam mile leh lemziak tam tak bangah chuan a intar thluah bawk a.Pindan chhunga thil awm reng reng mai chu a mipa thil hliah hliah mai hian a hriat hle hlawm a.

Pindan tam zawk a hmuhte chu China chuan ngaiah a neih tawh a,a mit la ber tu zawk chu swimming pool lian țha zet mai chu ani.A velah chuan thingbuk tawi tete leh cane chair a awm bawk a.Tui lah chu chen vel chakawm tak hian a fim dumpawl kuk mai bawk si a.

"A nawm hmel kher mai," a han ti sap a.Thlasik khawvawh lai taka chulai tuikhuah,tuiluma khat luau maia han hleuh kual vel chu a nawm tur zia ringawt a ngaihtuah nauh nauh reng a.

James chuan nui chung hian, "Ben hi chuan khawsak nawmdan hi chu a hre teh mai ania," alo ti a.Chutah China banah chuan a kai a, "Tunah chuan chhiahhlawh ho chenna ka entir tawh ang che," a ti ta a.Tichuan in hnung lamah chuan a kai phei leh ta zel a.

Chhawng hnuai berah chuan chu in ațanga hrang nalh hian a awm a; sitting room zau tak leh huan han thlir pah vel theih na tukverh,meichhemna,bedroom leh khum lian țha tak pakhat,wordrop leh private telephone,bual pindan leh pindan dang pakhat țhutmut theihna awm bawk hi a awm a.

Chu hmun chu China tan chuan Lal in a ni ringawt mai a,chen a duhna hmun ngei pawh ani.Chuvang chuan, "A nuam ngawt ang,hna pawh chu ka thawk ang e; tin,he hna remchangtak mai min kawh hmuh avang hian lawmthu ka hrilh nawn leh che a,ka theih anga nasa in ka thawk anga,nang pawh ka theihnghilh hauh lovang che," meng de sar chung hian a ti ta a.

"Ni e,min theihnghilh chu tum duh ting lo la a țha zawk ngei ang," James chuan a lo ti ve vat a.

"Ka thusawi awmzia chu i hria em?" nui har har chung hian China chuan a han ti a,lak thutak loh hram hram chu aduh ani.

James chu tukverh lamah chuan a kal a,hla taka tlang lo lang te chu a thlir a; chawhnu lam a ni tawhin,chhum tam danah chuan ruah pawh a sur ngei a rinawm bawk a. "A khawhar thlak dawn hle mai a,pawi i ti lo maw?" tiin China hnenah chuan a han zawt leh bauh a.

"Min thlauh thlak leh i duh ta elo?" nuih rah rah chunga a dara va vawn pahin China chuan a han ti ve a.

James chuan, "Ni lo,chutiang lam a ni lo,i duh ngei dawn em tih hi hriatchian ka duh ani," alo ti a.

Chutah China lam hawi chuan a rawn in her a,a mit taka lo en pah chuan, "Mahnia awm pawh ka pawiti hauh lo asin,nuam ka ti zawk mah mah ang.Thurualpui lohte nena chenho ai chuan mahnia chen pawh nuam ka ti daih zawk ang," alo tihsan ve mai a.

James chuan a dar a chhin ak a, "I tih tlat chuan le...." a ti ve ta ngawt a.

"Ka hria alawm James,tunah chuan ka hna a ni ta bawk a,a hrehawm tur zawng hlir chuan sawi tawh lo zawk teh," tiin ngen titih mah hian a khap ta a.

"Engemaw min tiam phawt la," ngeiawm ang reng taka nui chung hian a han ti ve leh a.

China chuan a mitko a san ak a, "Eng maw?" a lo ti ve hau a.

"Zaninah zanriah min eipui tur ani," James chuan alo ti ta lek a.China pawh chu a nui ta har har a.

"Chaw maw? Nang chaw han eipui che chu ka chak zawng tak alawm.

An inrem hnu chuan a hna tur bawk chu an sawi zawm leh ta a.Study room ațangin James chuan a unaupa chu a bia a.Ben Galloway chuan last minute chiahah pawh ala rawn hnawl leh mai thei ang tih a hriat avangin China chuan ngaihthlak ve pawh chu a chak lova,chuvang chuan amah leh a ruaitupain hun an hman tam ber na tur choka lam chu alo fang kual vel duh zawk ani.Choka chu room dang an fan tawh zawng zawng ai pawhin a ropui zawk hialin a hria a,a bungrua te lah chu a changkang em em vek mai lehnghal a.

Choka lai takah chuan maimitchhing chungin a ding a, "Khawngaih takin Ben Galloway chuan hna chu min pe hram sela aw...." tiin a rilruin a țawngțai ta a.James lo luh lai pawh chuan a lo la ding ta ran a,a hmel a va hmuh chuan a hlauthawng leh deuh thut a.Tun hi a tana hun pwwimawh tawpkhawk ani,hna chu a hmu ngei ngei tur ani.

James țawng lawk loh chhung mai pawh chu tuar har a ti hman hle a, "A țha em?" zawi tak hian a lo ti a.

"Hna chu i ta ani ta e," hlim hmel vak lo hian a ti ta a.A sawi zawh hma kha chu thawk pawh ala mai lo hialin China chuan a inhria ani.

"Oh, James, ka lawm lutuk tlat!" tih pahin James chu a kuah ta nawk nawk mai a.

James pawh chuan a lo kuah let ve a.Chutihlai tak chuan ani China chuan a tana țhian rinawm a chhar ta ani tih a inhriat tak ni!

An inthlah hnuah China chuan, "Engtinnge a lo sawi a?" tiin hlim hmel tak hian a han zawt a,a chhungrilah pawh a hlim tih chu hai rual ani lo.

"A.......a duhdan tak chuan nupa tuak ni thei sela a duh a,a mipa zawk chuan eng engemaw chhe lai lo awm palh te pawh a siam thei anga.Mahsela rintlak tak tur i nih thu leh nang aia țha chu a hmuh ka rin loh thu ka hrilh a.Tichuan eirawngbawl i thaam leh thiam loh min zawt a,i theih tur thuin ka chhang leh a! I thei angem?

"Aw,thei ang.Eirawngbawl vel chu ka thiam ve zawng tak niin an sawi ve hial țhin.....! Chu....min duh vak lo deuh tihna a ni maw?" China chuan a han ti leh daih a.

"A....a rilruah nupa alo dahsa vang mai ania.....! A engapawh chu nisela,i hna tur a ni tawh a,engmah danglamna a awm chuang lo ani lawm ni?" James chuan a ti ve ta a.

China chuan, "Anih leh Interview emaw,thildang tih hmasak leh ngaite a awm angem?" a ti leh a.A rilru chuan.....lo ngai ta se,James a unaupa hausa tak hmaah chuan eng anga inchei ngai tur nge ni ang tihte chu alo ngaihtuah nauh nauh a.

"Awm lovang,a hnaah hian a buai khawp a,naktukah pawh hian Italy ah a thlawk leh nghal dawn a,chuvangin a in chahbi pawh hi min pe ani.I duh hun hunah i insu thei anga,kei pawhin ka țanpui thei ang che," tih pah chuan pawisa tel chu a pe ta a. "Kha kha i hlawh tur a ni anga,a sawi danah phei chuan, hemi a i lungawi tawk lo anih pawhin alo haw hunah in pahniha in la sawi dun turin a rawn ti nghe nghe ani," a ti zui a.

China chuan ngawi rengin a pawisa fun dawn chu a phelh malh malh a,chutah mak ti deuh hian James chu a en ta hau mai a!

"A tam lutuk zawk ani mah mah hi.....!" a ti sap a.China chu a lawm hle mai a,a rilrua a suangtuahnaah tak phei chuan mumang hlimawm tak nei a,a rawn harhchhuah leh huna hna nei lo bawk a Clare ina lo la awm reng tur angah te chuan a inchan hial ani!

James pawh chu a nui ve hawk a, "Ka tan chuan a tam lutuk lo asin; tin,a phu tawk awm chu Ben pawh hian a thawhtir ngei bawk ang che," alo ti ve maia.

"Thildang ala awm em?"

"Umn,awm e,zingtinin Mrs Stephenson alo kal țhin anga,in tihfai lam chu a rawn khawih vek ang a,chutiang lam chu i khawih ve a ngai lovang. Tin, hei hi......"tih pahin Bank note dang chu a pe leh a, "I thlakhat hlawh advance a i lak tur leh eitur leh thil țul dang i leina tur anih hi!"

"A va tam em em ve! Tak tak anih tur pawh rin a harsa thei mai dawn alawm le," tih pahin pawisa chu dawhkanah chuan a thlauhthla tap a.

"Kha zawng kha a nih ka ring," James chuan a ti leh mai a; China tana thil thar leh lawmawm em em mai chu ani tan chuan eng ual pawh anih ve vak hmel loh hle mai a.China lah chuan a harsatna ber,darkar sawmhnih pali chhung maia chinfel an ni ta duak mai chu ngaihtuah loh theih pawh a ni hauh silo.

Darkar hnih hnuah chuan Clare chenna inah chuan China chu a va dah leh a; leng lut tura a han sawm zui pawhin James chuan hna a ngah thuin a hnial a,a hawsan ta zawk a.

A kal liam tak hnu chuan eng hna tak thawk ang maw? tiin China chuan a ngaituah zui nauh nauh a,an han inhmuh ve chang lahin amah leh a unaupa chanchin bak chu engmah lah a hrilh ngai silo.Zanriah ei dun turin an intiam lehnghal a,a chanchin zawh nachang a lo hre miah lo chu China chuan â a inti em em ani.

An pindan pawn berah chuan Clare chuan puan a lo țhui malh malh a,China in a hnathawhna tur chanchin a han hrilh meuh chuan ani pawhin alo lawmpui ve em em a.

"Aw,China,ka lawm lutuk! Heta i awm zui thei lo hi keimah vangah ka ngai a,hrehawm ka tih tehlul nen,tunah chuan ka ngaih pawh a țha ve ta huai e," tih pah chuan a puanțhui lai pawh ngaihtuah chang lek lovin China chu a rawn kuah chung chung a.

Chumi ni chawhnu chu a khat tawka coffee in reng chungin China insuan chhuah dan tur vel sawiin an titi a,tunkar tawpa Aspenmere Hall a insuan luh chu țha berin an hria a.

James nena chaw eidun tur chuan uluk takin a inchei țan ta a.A kwrlum lampang hakah chuan lunghlu pin tereuh te te,Adele Cencilli pek chu a kilh a,make up pawh nidang zawng aiin a hmang uluk a,a sam pawh a dar velah a thlah darh siau bawk a.

Ani ngei pawhin amah rau rauvah a nalh ve țum ber ni pawhin a inhria ani.James chuan dar riatah chiah a rawn lam a,Ani pawhin China incheina chu nalh a ti ani tih a mitmeng ațang chuan a hriat theih mai a.

Restaurant changkang zet maiah hian zanriah chu an ei dun a,chutah chuan James pawh accountant ani tih China chuan a hre ve ta a.A sawi lo nain,a unaupa hnena a thawk ve mai lo chu mak a ti deuh a,mahse James chuan amaha sumdawn nan bul a țan mek tih a han hriat chuan mak pawh a ti ta bik lem lo a.Tin,khawpui pawna building nuam takah a cheng tih a hre bawk a,thil ti tak tak mi a ni tih a hriatin a unaupa tluk zeta hmingthang ve tur ala ni ang tih pawh a ring a.Mahse a bulah hi chuan a uangin,fiamthu te hi a thawh deuh reng ang lawi si a.

Aspenmere Hall a a insuan luh hunah chuan puih ve a tum avangin a hun tur te chu a zawt deuh reng a.China pawh chuan tunkar tawp lama insuan luh a tum thu chu hrilh ve in,hawihhawm takin puih a ngaih loh tur thuin a hnial ve thung a.Engmah hautak tham tur ken tur a neih loh thuin a chhang a,amah chauhva insuan mai chu țha zawk dawna a hriat thu te nen a hrilh ve a.

James an Clare chenna kawta a va dah leh chuan chumi tlaia a nuih hnem zia leh a hlimzia chu China chuan a hrilh nghal mawlh mawlh a.Leng lut tura China in a sawm lehna pawh chu James chuan a tuk zing lama hna a neih tur thuin a chhang leh a,a chalah chuan dimte hian a han fawp zauh a,Aspenmere Hall a a insuan luh veleh a rawn phone a tum thu a hrilh a.Chumi hma pawha a rawn phone mai theih a rin thu leh Clare pasal neih ni pawha an inhmuh ngei a rin thu te a sawi a.

An inthlah liam hnua inchhunga a lut chiah chu a chauh zia China chuan a inhrechhuak a,Clare hmel a lang lem lo bawk a,ama khum lam chu a pan ding ta nghal a; a lu in a lukham a delh thlak rual rual chuan a muhil chu a ni zui ve ta nghal mai a.

China chuan Clare pasal nwih ni tur chu Ben Galloway ina insuan luh nana hman a tum ve ta a,chu chu a hna hmuh ațanga kar khatna chiah tur ani.Clare leh Paul chu Register office ah an innei a,James chu mopa țhianah a țang a.

Mo thuam vara a han inthuam meuh chu Clare chu a nalhin a thianghlim sar mai a,thu an chham lai te chuan China mittui chu a tla a tla thung a.An hlim dun hmelin an thuchhamte chu an titak hle mai bwwk nen,China chu a hnuk alo ulh țeuh mai a.

An inneih zawh veleh Paul inah chuan tukțhuan an ei a,China pawhin a hun tam ber chu James nen titi dun nan a hmang a.Aspenmere Hall a a unaupa alo haw tawh leh tawh loh te chu a zawt a,mahse James chuan Ben chu Italy a ala awm thu leh alo haw hun tur a hriat loh thute a hrilh a.

An party an zawh chuan Clare leh Paul chu Airport lamah Mexico a Honeymoon hmang turin an kal nghal vang vang a; thlahtu tam tak zingah China pawh chu a tel ve a.An thlah liam tak hnu chuan midangte pawh chu an mahni carin an haw ta thliah thliah a.

James chuan China nen chauhva an awm hnu chuan, "Vawiin chu a nuam hle mai," a han ti chhuak hlawl a.

China pawh chuan, "Ni e,a nuam khawp mai.Kei pawh vawiin chawhnu hian insawn chu ka tum ta asin," hlim hmel tak hian a han ti ve siam siam a.

"Chu anih leh ka puih che chu i duh lo tak zet maw?" tiin James chuan a sana bih zauh pah chuan a han ti a.

"A ngai lo,i buaizia lah ka hria a,mi puih i inhuamna avang ringawt pawhin ka lawm tho tho mai James."

"Anih zanin tlai zanriah lam te hi?"

China chu a han inngaihtuah zawk a,chutah, "Awle,a tihchi khawp ang chu," tiin a nui ta var var a.

Car dum sei reng rawng hi an bulah chuan a rawn ding chawt a,driver chuan James chu a rawn nuih sak a.James chuan, "I car i rawn keng em?" China hnenah chuan a lo ti ve a.

"Khilai lawkah khian ka dah," tih pahin an chhak lam hla vak lo chu a han kawk a.

"Nih leh ka kalsan ang che aw,zanin dar riatah ka rawn lam dawn che nia. Ui hi i ngaina em?"

"Aw,mahse......" a sawi zawh hma chuan a biangah a rawn fawp zauh a,Car dumah chuan a lut ta nghal a,an kal chu ani zui ta mai a.China chuan James a awmdan chu mak ti rilru tak chung hian a thlir liam a.Chutah a lu a thing nar nar a,inngaihtuah buai a ngai love ti niawm takin a car awmna lam chu a pan ve ta a.

An chenna ava thlen leh chuan a bungrua bak chu hmuh tur alo awm tawh lova,ngui angreng tak chuan a incheina thuamhnaw chu hlipin,hnathawh kekawr jean leh kawr dumpawl chuan a inthuam ta a.Chutah tukverh bula țhuin coffee a in a.

Uluk taka a intel fel hnu chuan a Car te takte hmang pawhin vawihnih kal ngai lo turin a inrem fel thei mai a.A tawp nan pindan chu a han enkual leh a,thil pawimawh engmah theihnghilh nei lovin a hria a.Chutah kawngkhar chu zawi tein a khar a,chahbi chu inhnuai lamah a pe ta nghal a.

Aspenmere Hall a thlen dawn hnaih meuh chuan rilrute pawh a hlim leh țan tawh a,he hna a han hmu hlauh chu vanneihthlak hle pawhin a hre thar leh a.

Darkar khat hnuah chuan a thawmhnaw te chu wordrop hlui lam,mahse nalh tak maiah chuan a dah lut zo hman vek a,a bungraw dangte pawh chu an hmun turah țheuh a dahfel thlap bawk a.A neih zinga a roh em em,Italian lemziak thiamina ram lem mawi zet maia a ziah chu a khum ep chiahah chuan a tar vah bawk a.

A awmna chu duhthusamin a lum nuam a,a ngaih a țha thawkhat ta bawk a,alo muhil ni ngei tur ani,pawnlama hmehrik rawn ri ral ral chuan a tiharh ta zawk mai a,a sana a han en chuan dar riat alo ri chiah tawh a,inpeih diama James an rawn lam a tum hun chiah ani.Mahse ani lah chu chei pawh alo la inchei hauh silo.

A ri a hriat rual rual chuan a zuangtho vat a,kawngkhar chu ava hawng a,James chu a kut lehlam lehlama basket khaiin pawnah chuan alo ding reng a.

"Oh, James, pawi ka ti lutuk! Ka lo muhil a,insiam pawh ka lo la insiam reng reng hleinem," inthiam lo hmel tak chuan a ti ta hau mai a.Ruah a sur tih pawh a hre nghal a,James a lu pawh chu a huh chap mai bawk nen. "Lo lut rawh,ruah a sur tih pawh ka lo hre hauh hleinem," tih pah chuan a kalna tur chu a kian nghal a.A thilkhai a han hmuh chuan, "Kha enge ni ta ngai?" tiin a kawk a.

"Lo nghak la i en dawn nia," James an a tih chuan hnial tumin China chu a lo ang hman ziau a.Chutihlai tak chuan James chuan, "Lo ngawi rih teh,ka lo thlen ațangin țawng ve na hun pawh ka la nei hman hleinem," nuihza hmel tak chuan a ti a,China pawh chu a nuive ta ar ar bawk a.

"Min hrethiam teh,ka muhil kan tho thut kha alo tlai tawh nasa si a,ka buai zo vek anih hi; lo lut rawh," a ti mawlh mawlh a.

Sitting rooma an inzui luh hnu chuan James chuan pindan vel chu a thlir kual dan dan a,chutihlaiin China chuan thukah thing a lo tuah belh sauh sauh bawk a.

"A nawm dawn reuh viau hi le," tih pahin James chuan a basket khai chu a nghat a,a coat hnawm chuap chu a phelh nghal a.

China chuan a coat chu a lo laksak vat a, "I ti lawmawm e,coffee i duh angem?" a han ti a.James an a chhan hman hma hma chuan, "Enge ni basket ah khan i khung a,ka hre chak tawh teh ania," a han ti leh zung zung a.

James chuan a darah a vuan a,han kawih țhut pah chuan, "Țhu la,lo awm hle hle mai rawh,ka hrilh em em ang che," nui chung bawk chuan a han ti leh a.China pawh chu a sawi ang chuan a awm ve nghal a.

Chutah James vek chuan, "Zanriah ei tura pawnlama kal chhuah chu i chauh deuh ka rin avangin kan pahniha ei tur chu ka rawn keng ta mai zawk ani. Tin,hei hi......." tih pah chuan a basket khai pakhat zawk bulah chuan a țhingțhi nghal a,a chung țawnna chu a phelh a, ".....I in luahlumpuitu turin a thilpek che anih hi," a han ti a.

China in lawm hmel taka a va en ve chuan Ui note duhawm zet mai hi alo awm a.Hlim em em chung chuan, "James,a nalh reuh lutuk," tih pah chuan ala chhuak nghal a. "Hei hi ilo tum vang ani maw tukin khan min zawh?" a ti a.

"Nih pawh a ni ta ve ang,i khawhar hnem atan leh nangmah chauhva i awm changa vengtu atan che a țhain ka ring a,mi rinawm tak hnen ațanga ka lei ani a,in vengtu atan pawh zirtir finsa diam ani tawh nghe nghe a,engmah hlauhthawn tur a awm lovang," hlim tak hian a ti ve sauh sauh a.

China chuan a lu chulsak heuh heuh pah chuan, "Engtinnge ka koh ang?" a han ti a.

"I bulțanna hriatreng nan 'Fortune' ti mai ila."

"Fortune," China chuan an lam chhin a,uite chuan a bemg tun hra chungin a hmuiah a rawn liak hlap hlap a. "Ani pawh hian a duh ve hmel khawp mai,chuvangin 'Fortune' tih hming chu pu hlen rawh se," a ti ve ta a.

A uite han khawih vel chu James chuan alo thlir reng a,a hlim hmel hle mai bawk a.China in a han hmuh chuan James hian a duh hle tih chu a hre nghal mai a,James hi thildang ni lovin, țhian atan a ni a duh ni. James pawh chuan a rilru chu a hriatthiam hmel hle a.

China chuan, "Coffee kha i duh em kha?" sawi tur dang a hriat loh avang chuan a han ti leh daih rih a,a aw te chu a lai deuh rat hial a.

James chuan, "Duh lo mai ang," a ti a, a mitmeng pawh chu a lo danglam leh tain,an boruak pawh a pangngai leh ta bawk a.

""Chawei chu siam nghal tawh mai ila?" James chuan a han ti a.

"Puih i ngai angem?" China chuan a ti a,James erawh chuan a lu a thing mai a, "Fortune kha lo enkawlin,a in thar turte chu lo hmelhriattir rawh."

"Rawngbawl i thiam pawh ka lo ring lova," bag a thil lakchhuah pahin China chuan a han ti a.

James erawh chuan, "Mipa, theih leh thiam ngah tak ka ni asin," choka lam pan pah chuan a ti ve mai a.

Han insiam vakna hun a awm lo bawk a,China chu a insil bawrh bawrh a,a sam a khuih lwh tawp a,Fortune lah chuan a nelin,a kalna apiang maiah chuan a zui ve nghal zel mai a.China pawh chu a lawm ve kher mai! Tun hmain ui hi ala nei ngai lova,a nghawngawrh tur leisak a,a hming pawh chu awrh teltir ngei a rilruk ta a.

James a eirawngbawl chu a tui kher mai,a sawi ang mai khan thiam pawh alo thiam nangiang reng ani.Tin,an boruak inkar pawh a hahdamin a hlimawm a,nichin deuh lawka a mitmeng danglam tak a hmuh pawh kha a hmu leh tawh hek lo.Chuvang chuan China pawh chuan a ngaihruat thil mai mai anih a ring ve ta zawk a.

A tukzing a han harh hlawl chuan a awmna chu a hai deuh rum rum a.Chutah han hrechhuak leh thutin a pindan vel chu hlim tak chuan a enkual leh ta a,a lemziak tarah chuan a mit chu a fu ta chat a.Tukverha a va dahchhuah leh chuan ruah alo sur cherh cherh a,favang ințan hun ani bawk a,pawnlama thinghnah te chu an lo tla nasa tawh hle mai bawk a.

Khum ațang chuan a tho a,chumi tuk khaw nuam lo tak pawh chuan a hlimna erawh a bawhbuai chuang lo.Choka ah Fortune chu chaw a pe a,ama tan coffee a insiam bawk a.Mrs.Stephenson lo kal tur leh tur loh te chu a ngaihtuah a,inbual zeta chumi hnuah in chu fankual leh a rilruk ta a; chhun lamah chuan ala hmelhriat ngailoh Ben Galloway a eitur lo buatsaih sak a rilruk ta a.

A coffee a inzawh chuan inbual turin bualin lam chu a pan a,a inthlak hma law law a han inbual zawk chu a duh ani.Tuilum herhchhuahna chu a han herh a,mahse engmah a rawn chhuak ta hauh lo mai a,tuidawt lamah chuan engemaw ri deuh rawk rawk hi awmin a hria a,a off leh ta hmiah a.Reilote a nghah leh hnu chuan a han on leh a,mahse engmah a ni thei ta chuang lo! Kut silna lam ami chu a han herh leh a,a ngaite bawkin,far khat pawh a rawn haw ta bawk lo lehzel si a,a hrethiam lo kher mai.Tuivawt herh hawna chu an țha vek si a,mahse tuna ang khawvawt deuh vurah chuan tuivawt te chu sawiloha leng ani si a.

Chutah bualin dang,chu ina mi tho chu a han ngaihtuah chhuak a,a enchhin ve mai tur alawm,tumahin an hmu dawn chuang silo.A towel leh shampoo chu ala lawk a,Fortune chu choka ah chuan kawngka a khar hnan a,a mutkawr nen chuan inchunglamah a tlanchho ta a.

Pindan a han hmuh chu Ben Galloway a bedroom ni ngei tur ani,nuam zet mai leh mipa pindan tih hriat zet mai hi ani a,a khum lian zet mai chu satin puan senduk hian a inkhuh dulh a.Han țhutchhin a chak em avang chuan a va țhu a,a kut chuan a zut dan dan a,nula a nei țhin angem? tih te chu a ngaihtuah a.Chutianga khum nuamah chuan ala țhu ngai hauh lo ani.

Wordrop nalh tak tak inhung thluahte leh chu pindana thil awm reng reng chuan a mit an la hle vek mai a.A hotu thar chu eng mi tak ni ang maw? Inbual tur anih kha a han inhre chhuak leh thut a,bath room lam chu a pan ta vat a.

A bathroom chhung vel pawh chu rawng senduk tak hnawih chhuah vek hi ani a; darthlalang seipui mai leh mipa inhnawih chi eng eng emaw te a awm bawk a.

China chuan zawite hian, "Mipa rawngsen lam ngaina mi tak chu a nih awm hi maw," a han ti sap a.Darthlalanga a han in en chuan danglam deuh huin a inhria a, ala awmna ngai loh pindan anih vang pawh a ni ta ve ang.

Tuilum herh hawna chu a va herh vat a,mak tak maiin tuilum chu a rawn chik ta seng seng a.Thildang a ngaihtuah kual vel atalang khan a rin aiin a lo tlai dawn tawh mai a.A mutkawr chu a phelh a,tuilum chuan a inphuhtir ta nghal a.

A tawpna atana a lu phuan buah mai a tleuh fai lai tak chuan chu pindana lo lut thawm chu a hre ta thut a; chuveleh a hlauthawng lutuk tihngaihna hre lo chu a maimitchhing ta ringawt a.Mahse Mrs.Stephenson i lo kal thawm anih zawk ringin a han thaw leh huai a.Mahse rilru ngaihțhatna a neih hman deuh chauh tih chuan a thawm hriat chu mipa thawm ngei ani tih hriat tak maiin,a lam pana lo phei zel thawm a ni tih lah a hrechiang hle mai bawk si a,a rilrua a ngaihțhatna pawh chu a bo leh duak a.

'James ani ngei ang' Hlauthawng rilru tak hian a ti rilru nep nep a.Kawngkhar kalh nachang alo hre lo chu anchhia a inlawh ru mawlh mawlh bawk a,bualinah em chuan a rawn luh chu a ring chiah lo deuh a.

"Bualinah ka awm e, James, reilote ah ka lo chhuak thuai ang," tiin ring tawk leng lawng chuan alo au hmasa ta ringawt a.

Pen ri pawh chu a tawp nghal chawt a,eng thil nge lo thleng tih pawh a hriat hma chuan bualin kawngka chu a rawn inhawng zui ta rawp mai le! Awki hniam tak, mahse thinrim tih hriat tak leh thuneih hmel tak hian, "Tu phiangsen nge ka bualina lo inbual ta mai?" a rawn ti ta a.


                          Chapter - 3


China thil tawh chu a damchhunga a thiltawh azawnga hreawm ber ala ni thei hial awm e.Chupa thinrim hmel,kar hmasa nge a hmasa leh zawka Porsche Cara chil țhelhtu hmel kha a han hmuh meuh chuan a pum mai chuan a khawng vek a,a zawhna chhang tur pawhin a hamhaih lutuk ani.A hamhaih lutuk chuan a taksa ruak ngalngata awm chu inkhuh nachang lah a hre hek lo.

"Sawi tur i haihchham elo?" a han ti zui ta mai lehnghal a,China zak lutuk chu a sen awp awp tawh a.

A mit buang thang mai chuan ngun zet hian a thlek vel a.China lah chu chupa mitmeng chuan a tiza uai uai mai a,a hnutehmur te chu a kawh auh tawh mai bawk a.A taksa velah chuan a inbualna tuihuh vel chu ala far tluah tluah thei a.

Chupa chuan, "I nalh kher mai! Ka unaupa hmeichhe kawm țhin ang lo tak i ni," a han ti leh nghut a.Chuveleh China chuan ruaka awm a ni tih chu a han inhrechhuak leh ta thut a,a bula towel inbang chu a phih thla vat a,a intuam hmanhmawh leh ta hnuhnawh a,a hmel chu zahna hlirin a khat ta a,a sen zual ta awp awp mai a.

A lo thlen tirh kha chuan rukru anih a han ring ringawt phawt kha a ni a,mahse 'ka unaupa' tih thu a han sawi veleh khan China chuan a hrechhuak ta uar uar a,amah ruaitu tur Ben Galloway a ngei a lo ni reng mai!

China chuan han chhan ve pawh chu duh teh mahse,sawi tur abar pawh a hre ta der lo mai a,a hrawka hnawh phui tlat tu awm ang mai ani ta a. Chutihlaia a duh ber chu a awmna chhuat chu rawn inhawngin,rawn dawlh pil vek se a duh ber ani.A heh ro halh chu a han liak huh a,engemaw tal chu a sawi ve ngei tur ani,ani lah chuan a rawn hnaihin,a țawng ve chu a nghak tlat bawk si.

China chuan, "Pawi ka......ka ti........ngawt mai......." zam tih hriat tak hian a rawn ti ve ta hram a.A sam sei tak ațang chuan tui chu a la far tluah tluah thei a,a kawchhung chu sa hulh hulhin inhre mahse a khur chhe lo chauh chu a ni lawi bawk si!

A hmel chu a han en zawk a,engmah a hriat theih lo na a,chutia en reng chu nuam a tih hmel hlein a hria a, "Ka....." a han ti leh hman chauh a,Ben a chuan a rawn țawng khalh ta thung a.

Ben chuan, "Ka hria alawm,pawi i ti ani tih chu.Mahse a tlai hret tawh ani lo maw Lalduhawm?" tiin a sawi khalh a.

Ben vek chuan, "Unaupa James chuan inhnuai lamah breakfast a lo siam vel em ni?" a han ti leh kher a.

China thin chu a sa ta zak mai a,a in control theih hma chuan a hmaiah a bensak ta chawrh mai a,a towel ven lai pawh chu a tla leh țhelh nghe nghe a.

Na tham khawp tur chuan a beng thei lo tih chu a inhre reng a,mahse a makti hmel chu darthlalang ațang chuan a hmu zawk a.Chutah nghet zet mai hian a banah a lo mansak chawt a,han tal deuh eih dawn pawh nise a towel ven chu a tla thla thei mai dawn bawk si.

"Min thlah vat rawh bawlhhlawhpa!" a ti leh tuar ringawt a.

Ani chuan, "Tichuan min beng leh anga maw? Ka duh ka ring chiah lo.Chubakah tikhan damlai thla inlar i an hmel riau lehnghal," alo tih san mai si a.

Hepa hi chu engtikawng zawng mahin a hneh dawn lo tih China chuan a inhre reng a,a fimkhur viau loh phei chuan tun aia nasa pawh hian ala ti duh ang tih chu a ring ani.

"Hetianga tharum nen i hmeichhia te i tilui țhin anih chuan tikhan i duh tawkin min han thlir leh rawh le," China chuan a ti ve ta hmak ringawt a.A rindan chuan a thlah ve nghal mai anga,tichuan a tlan chhuak anga,he thil hreawm tak hi a tawp nghal thei turah a ngai ani.

Vanduaithlak takin China thusawi chuan awmzia a nei lo kher ta mai a.Ben Galloway chu a țhen sak ringawt a,a mitmenga nuihzat hmel zet chung hian, "I rilru a va han tenawm reuh ve! Ka unaupa mit i lak nachhan anih pawh ka ringhlel love," a ti ta nghut a.

A hmusit kher mai.Dim lo zet chuan a thlah nawk a, "In ha vat rawh," ram hmak hian a ti ta a.A cigarette chu phawrhin a țan nghal a,a hah hmel hle nain ,mi hipna zawng a ngah ani.China pawhin a hmel a han en apiang chuan eng thil emaw tak,a hriatthiam chiah siloh hian tinatu awm tlatin a inhre ta mai a.

"I awm lai hian maw ka inhak ang?"

A rawn melh leh zawk a,hmanhmawh zet chuan a kalsan zui ta nghal a.

China chu a thaw ta huai a,a kut pahnih chuan a hmui a hup ta a.Hetiang hian maw amah ruaitupa nen chuan an han inhmelhriat tak ni? A hmuh tirh ațang pawh khan, hmana a hmuh tawh,Car a su țhelhtu kha a ni tih a hre mai a,James a unaupa chu lo ni rengin! Rin harsa pawh a ti kher mai.Ani khan a hre ve angem? Hria nisela,engatinge tunah khan a sawilan ve hauh siloh?

Thawk a han la vang vang a,la khur deuh dar dar chung chuan bualin kawngkhar chu a hawng a,Ben Galloway mut pindan lam chu a pan ta a.Tlawm lutuka awm pawhin awmzia nei vak dawna a hriat loh avang chuan a lu chu a dak deuh vah a.

Ani chu tukverh bula dingin sikret alo la zu a,a rawn hmuh chuan a chhungrila a hlauhna chu a tilang mai palh ang tih China chuan a inhlau ber a.

A mutkawr pan tak hak chhana a taksa thla lo lang chu ngun fe hian a lo en leh a; chutah bualina a luh hmaa a khuma a lo țhutna khuar deuh dam chu en in a hmui chu a chip ta hmak a. James nena a khuma mudunah a ngai ngei ani tih China chuan a hre mai a.

China chuan sawifiah tum chuan, "Mr.Galloway...." a han ti țan chauh va.

"Tunge ka nih ilo hre hman reng tawh ani maw?" mak ti hmel tak chuan a rawn tih khalh leh rih a.

China chu a bu nghut a, "Min sawifiahtir........"

Ani chuan rum zet hian a rawn melh a, "Insawifiah hranpa chu a ngai hauh lovang,chhuak turin ka duh che ani, Sweetheart, tunah hian.Chu chu i hrethiam em? Insiam la,chhuak nghal rawh," alo tihsan hmiah mai a.

"Mr.Galloway, James an min pe....." A rawn hnaih lehzual sauh va, China erawh chu bang lamah a tawlh dawrh thung a.A thinrimzia a hmuh rual rualin a insum nasat zia pawh a hre nghal a.

"Ka sawi chu i hre lo em ni? Zaninah hian chhuak nghal turin ka duh che ani," a han ngawi leh rih phawt a.

Chutah han sawizawm lehin, "Tlang takin ka hrilh mai ang che, James a sawi emaw,tih emaw pawh nise engahmah ka ngai lo.Lo mudun ta pawh ni ula ka pawisa bawk hek lo,ka khumah a nih loh phawt chuan.I chiang em? a han tih zawm leh sak sak a.

"Chutiangte chu engtia sawi ngam mai nge i nih? I rin angin Mr.Galloway, i unaupa James nen kan mudun lova,tum pawh kan la tum chhin hek lo.....Lo duh ve ta tehreng pawh ni ila,i khum kher kher chu ka thlan loh hmel ani.I khum khuhna puan sen te saw ka ngei zawng tak ani," a han tih khum ve piap ringawt a.

Ben chuan a mitko a san awk a, "Chuti chu min lo nghak a nih ngei zawk dawn chu," tih pah chuan a rawn hnaih leh sauh a. "Chutia James awm loh lai a nih chuan a ai ka lo awh mai ang chu! Bakah, ka bualina hmeichhe saruaka inbual pawh ka la hmu zen zen silova," a ti leh a.

Amah chu a nuihzat tih China chuan a hria a, "James aiawh thei tura engtia in ngai mai nge i nih? Khawvelah nangmah chauh hi mipa awm ni mah la ka duh chuang lovang che.Ka ngaihdan che chu a chiang tawk em?" a han ti ve sak sak ringawt a. A rilru chhungril takin a sawi lo tih erawh chu a inhre reng a; rapthlak leh chhe pui puiin puh mahse,engtin emaw tak a hip tlat ani.Chu tak chuan a thin a tirim zual a.

Nui hmel pu lek lek hian, "Chu, hneh i va har awm ve! Anih leh James nena kaldun in nih si loh chuan engti tihin nge he inah hian i luh theih? Nge, James hmeichhe khawi dangte ațangin Gate luh theihna i nei em ni zawk?" a ti leh a.

China chu a thaw halh a,tun hi a sawifiahna hun tur chu ani. "Keimah hi i in enkawltu tur chu ka ni,min sawifiah tir theih chuan......." a tih lai mek chuan.....

"Oh,ni lo ve,min sawifiahtir zawk teh.He thil hi James a fiamthu a lo nih pawhin pawi ka ti khawp mai,mahse ban i ni tawh."

Lehlam a hawisan nghal hmak a.China chuan hmai var pap hian a hnunglam chu a en a.Darkar khat hmalamah kha chuan a nun a hlimin,a buainate chu kiang duak tawhin a hria kha a ni a,tuna a chhuah leh rikngawt chuan khawiahnge a kal chuan ang? Kalna tur pakhatmah a nei tawh lo.Clare lah pasal neiin,honeymoon hmang turin an kal daih tawh bawk si.Han sawifiah tir sela chuan.....!

Ben Galloway chu a rawn inher leh a, "Ka thusawi awmzia kha i hre lo em ni? Ban i ni.Thla khat hlawh ka pe ang chia,mahse tunah hian i chhuak nghal tur ani," a awki vawt raih chu thlakin, sumdawnna thil sawi hi a ng tawh zawk mah a.

"Min ban ngawt thei lovang," hlauthawng fe chung hian China chuan a han ti ve leh ngawt a.

"Ka ban zo chiah che alawm," a lo tihsan mai a.

China chu han intihuaisen ve leh hramin, "In enkawltu țha tak ka ni asin,rawngbawl thiam tak ka ni bawk," James a sawi hre reng chung khan a han ti ve lehngial a.

"Chu phei zawng i ni mai thei," ngainep awm fe hian a dar chu a han chhin ak a. "Mahse ka tan chuan i rem lo ani."

"Engvangin maw?"

"Ka sawi vek kher a ngai lem em ni? I la naupang lutuk a,i mumal lovin,ka unaupa nen inzawmna in nei bawk.Chhan țha tawk tak tak pathum a nih chu!"

"Min sawifiahtir chu i tum lul lo em ni? Bualin chungchang kha chu ka sawifel theiin ka ring," a han ti ve leh bauh a.

Chhang mai lova a ngawih tak reng avang chuan China chuan a sawi zawm nghal vat a: "Ka bualina tuilum herhchhuahna ah khan engemaw chhia a awm a,tuilum a herh haw theih tlat loh va.Chumi avang chuan i bualin lo hman hawh mai chu a pawi ka ring lova,i lo haw mai ka beisei lo bawk....."

"Chu chu a lang tlang sa reng alawm,mahse engmah a danglam chuang lo.Ngaithla teh Miss......"

'Miss' a tih chu China chuan 'Harmon' alo ti vat a.Harmon tia koh a phut ani ngei ang.

Ben pawh chuan, 'Miss Harmon' tia han ko țha ve lehin, "Ka chauvin ka ril a țam tawh teh ania,inhnial thui vak pawh ka peih lo.James a hmuh dan che alo dik lo anih chuan pawi ka ti khawp ang.Mahse i tan hetah hna a awm lo ka tih chu ala ngai reng tho," nin hmel tak chuan ala ti ta fo mai a.

China chuan tihtheih dang anei ta lo,a kal mai tur ani.Chuveleh a mittui chu dan rual lohvin a rawn far ta zung zung mai a.

"Khawvel a tawp pawh ala ni em hleinem,hna dang te pawh a tam a,hna dang i hmuh leh hma chuan i nu leh pa hnenah pawh i awm thei ang chu."

A mittui kar ațang chuan a va en a, "Nu leh pa ka nei lo," zawi sep chuan a han ti a.Chuti taka a nunrawng thei chu mak pawh a ti em em ani.

"Fahrah khawngaihthlak tak i nig reuh chu mawle!" awih lo hmel zet chuan a han ti el ve leh ngat a.

Chutah meuh zawngin China chuan a tuar thei ta ngang lova,mittui nen chuan rilru na lutuk chungin kawngkhar lam chu a pan ta rawk rawk a.A hmanhmawh lutuk chuan a mutkawr fual tak chu a pal nawk a,Ben Galloway chuan rawn chelh vat lo phei se chuan hmai lei si chawrhin a tlu ngei ang chu.Amah a palen ang bawkin a chak tih pawh a dawm ngheh zia ațang chuan a hriat theih a.

Thlah leh ta mai lo chuan China hmai dang var pap leh a mitmeng, rilru na tih hriat fahran mai chu a en ta ngawih ngawih mai a!

Chutah pawi tih hmel zet hian, "Tihhlauh che ka tum hauh hleinem,pawi ka ti tak zet ani......" a han chawl leh dat rih a. "Han inthlak la,artui leh coffee kha han siam la, choka ah min lo nghak ang che," aw zaidam tak chuan a han tih zawm ta thung a.China chuan a han en a,a ti tak tak angem le? A thupek ang chuan han ti phawt sela,a chinfel leh dan pawh ala awm ang chu.

Chutah China chu a bu ta nghat a,inhnuai lamah chuan a tlan ta nghal a.A bedroomah chuan a inthlak sawk sawk a,a sam chu hnunglamah a țawn tawp a, jean kekawr leh kawrlum a ha a.Darthlalanga a han in en chuan a țhen sak a,a duh aia a lang naupang chu pawi a ti rilru hle mai a.Ben Galloway chu hua pawh nise,a hna chu a duh ve miau mai si a,a tihdan huatthlala tak tak te pawh chu haider a țul rih dawn tlat ani.

Choka a thlen chuan a rilru tawt up up pawh chu a zia awm leh deuh huai tawh a,Fortune chu huanah kaltirin eitur vel chu a buatsaih ta nghal a.

Ben Galloway lo kal lai chuan a eitur siam chu plate ah alo dah khu vang vang a,vawksa leh pâ, coffee nen a lo siam peih diam tawh a.

Dawhkan a rawn kil chu ngawi rengin a lo en a,ala chauh hmel hle nain,a inbual chuan a tilang tharlam sawt a.A thwwmhnaw pawh kekawr dum leh sweater dumin a rawn thlak vek tawh a.

Engemaw ti tak hian a dip chu na hlein a hria a,a rawn en veleh chuan a thin chu phu dat datin a inhria a,coffee a thlitsak lai chuan alo nuih suk a.

"A tui hle mai,i in siam kep ve nange?" a han ti zui a.

Ani chuan a lu a thing a, "Ka....ka ril a țam lo," tiin a lo chhang vat a.

Chutah Ben a ngei chu a tho va,ketli a coffee la awm chu a va thli ve ngat a,dawhkanah chuan a rawn dah a, "Țhu la,in rawh," a ti ta a.

China pawh chuan thuawih taka thupek chu zawm mai țhaa a hriat avangin a țhu ve nghal vat a.A hmel chu lang dang lutuk lo sela a duh hle mai.

Chutah, "Hna chungchang hi mi han hrilh teh," a ti ta a.

China chuan, "Nimin khan ka rawn lut a,James an he hna hi min pe niin a sawi che a,a rawn phone che khan?" zawi te hian a han ti sep sep a.

"Ka unaupa hi i hriatna a rei tawh em?" tih pah chuan an panhniha noah coffee chu a han thli leh a.China lah chuan a chak tawh lo hle nain,hrilh chu a tum bik lo.

"Karhnih vel ani tawh ang."

"Enge i hmuh dan?" a hmel chu ngun zet hian a en a,a rilru hriatsak tum niawm takin. China lah chuan chutianga a zawh a rin loh em avang chuan han chhan mai ngaihna pawh a hre lova,a hmai chu a sa hat hat mai a.

"Ka hrethiam e," alo ti vat a.A sikret chu a phawrh a,a pe ve a,zahzelah China pawh chuan alo la ve vat a.

James nena an awmdan chu a duh duhin lo ring mahse chhan pawh a tum chuang lo,a ngaihdan zawng a hrilh chian tawh khawp kha.A va en chuan ani chuan a lo la en reng a.

Ben chuan, "Tunhmain kan inhmu tawh," tiin a zawt ta phawng mai a.

"Nia,kei pawhin ka hria asin," nui chung hian China chuan a chhang ve vat a.

"I hriat pawh ka ring lo va," nui chung ve bawk chuan a ti ve a.

"Chuti chu i hresual anih chu." Engtin emaw tak alo khak leh a rin tehlul nen mahse engmahin a sawi zawm ta lo va.China chu a tho va, "Thleng vel hi kan sengfel tawh ange," a theih anga aw zangkhai chuan a ti ta a.

Mahse Ben Galloway chuan, "Țhu rawh," alo ti leh hmiah a.China pawh chuan eng khaw sawi set set lo chuan a țhu ve leh ta a.

"James khan upa ve deuh ang khan a sawi che a,chu chu han sawifiah teh?"

China chuan a dar a san ak a, "Min țanpui a duh vang chauh anih ka ring,hnathawh tur leh chenna tur ka mamawh tak zet si a; khawngaihin ani chu dem suh," a ti ve ta a.

"I țan hle mai maw? Anih leh engtizia a chuti taka dinhmun harsa a awm nge i nih?"

A aw chuan ngaihno bei lo teh mahse,a chanchin hriat chu a duh tih hriain, "Nichina ka thusawi kha i ring lo tih chu ka hria a,mahse fahrah chu ka ni," China chuan a ti nghat a.

Chutah zawngin, "Pawi ka ti ngawt mai," lainat hmel tak chuan a ti ve ta a.

"Sikul ka zawhin Italy ah hna ka nei a,mahse ka chhuahsan a țul leh ta si a," Cencelli chhungkua nena an intih dan kimchang tak erawh chu a hrilh tel kher duh lem lo a; alo ngaihdan a hniam tawh laklawh a,hrilh pawh nise amah bawk chu a thiamlo leh thovang tih a hresa reng a. "Ka lo kir leh chuan ka țhiannu bula chen ka tum a,amah vanga James pawh hi hria ka ni.Mahse ka țhiannu chuan pasal a nei ta si a,chuvang chuan ka dinhmun chu a lo harsa zo ta ani," tiin a chanchin chu a hrilh ta malh malh a.

A hmui chu a chip hmak a, engmah han sawi belh pawh anei hek lo. "Italian țawng i thiam em?" tiin a lo zawt ta daih thung a.

Makti takin China chuan a en hau a, "Thiam tehreng mai!"

"Anih leh țawng dang?"

"French chauh. Mahse engatinge.......?"

Nal tak leh thiam taka țawng chi hnih tal hmang thei Secretary ka mamawh a,heta țanga thawk tur hi.Khawl chhut i thiam em?"

"Aw,mahse..........."

*Mahse...* tih a ngai lo,Miss Harmon," a rilru siam fel tawh tih hriat tak hian Ben chuan alo ti mai a.A thluak chak tak chuan kiltin dapin, a hlawkna tur pawh a dap chhuak rang kher mai. "Chuti taka i mamawh anih chuan hna chu i thawk anga,mahse secretary han pawh i thawh tel a ngai ang.Chumi awmzia chu i zing hun țhenkhat leh zingkar kherah lo pawh ka mamawh dawn che ani,i hrethiam em? Office hunbi pangngai angin ka kal ve lo va,mahse i hnathawhah chuan hlawh țha tawk tak pek i ni ang," nui chung chuan a ti ta a.

A han nuih meuh chuan a hmel, tihhar hmel takte kha a bo duakin China chuan a hria a.A paihchhuak tawh mi dawn emaw a intih tawh nakalaiin hna pahnih ngawt mai a pe leh ta chu ani a.A duh phawt chuan he hna hi thawk lovin Aspenmere Hall hi a kalsan vang vang thei - kumkhua atan. A taksa peng te chuan, "heta awm hi a hlauhawm ani," tia rawn hrilh hian China chuan a inhria a.

Ben Galloway duhawmna leh hlauhawmna inkawp chu China chuan a hlau va,heta a awm phawt chuan an in hnim hnai leh zual ngei dawn a,mahse a pawm mai loh chuan eng hna dang nge a thawh chuan ang?

"Ka lawm e, Mr,Galloway," a ti ta sap a,a huat em avang chuan en pawh a en chuang hauh lova.

A nui sak chauh a, "Enge i hming hmasa?" tiin a zawt leh ta daih a.

Ani chuan, 'China' tiin a lo chhang a.

"Hming nalh tak anih chu,i inhmeh ngawt ang."

"Ka lawm e,ka nu leh pa te nena kan inzawmna awmchhun chu hei chiah hi a ni tawh si a," a ti sap a.

Chutihlai chuan Fortune chuan choka kawngkhar chu rawn hawn a tum rak rak a.

"Oh,Bawihte! Mr.Galloway,ka lo hrilh theihnghilh hlauh che a, Ui ka nei asin! A mitmenga hlim tih hriat tak mai chuan Ben Galloway pawh a ti thinrim thei ta lo.A tho a,kawngkhar chu a va hawnsak ta a, "Pawi i ti em?" a ti a.

Ani chuan a lu a thing a,a kut pahnih chu phar chhuakin,Fortune chu a liah tir hauh hauh a.

"Engvangin maw.....?" a han ti phawt a,nuihza tih hriat fe hian a țhen sang a. "Tukin zing kha chuan sava tluk zetin ka zalen a,tunah chuan in enkawltu riangvai tak leh a Ui ka nei ta a,engahnge pawi ka tih ang ni?" tiin ngeiawm zawng nilo hian a han tifiam a.

Chutah zawng China pawh a vawikhatna atan a nui ve ta var var a,a mitmeng te chu a lianin,a pawisawi lo mitmeng hliah hliah hian a lang a, Ben Galloway pawh chuan alo en ve reng a.

Ani chuan, "Ben tia koh ka duh zawk," a han tih chuan China chu alo meng zau kawk a.

"Awle" alo ti leh mai a. "Mut lawk ka duh a,nakinah ka rawn hmu leh ang che," tiin a tho a,a chhuahsan ta a.

Dawhkanah chuan China chu a țhu vang vang a,a hlim nge maw ni dawn ni le? He hna hi a thawk zel anih ngat chuan a hlimawn phian ta ve ang.


                         Chapter - 4

Ben Galloway chu chwwhnu lam zawng a mu a,amah biak tumin Telephone lah chu a ri deuh reng mai a,China in thleng vel a sil zawh chiah chuan a vawikhatna chu a rawn ri ral ral a.

Chu aw chu hmeichhe aw thawp sat mai hi ani a,China aw a han hriat zet chuan mak a tih hmel kher mai! Chiang tawk fek fawk hian Ben Galloway a biak duh thu a rawn sawi a,chuvang chuan a harh tawh em tih va en a a kal lawk hlana lo chelh rih turin a chah a.Inchungah chuan tlan chhovin,a bedroom kawngkhar chu a han kik ta a,mahse chhang tu a awm lo.Dim tein kawngkhar chu a nam hawng a,a lut ta a.A va luh chuan pindan chhung thim riai ah chuan Ben chu ala muhil tih a hre nghal a.

Muttui tih hriat tak hian ala thaw sak sak a,China chu a khum bul hnaiteah chuan a va ding a,a hmel chu ngun takin a en ta reng a.A naupan hmel sawtin leh a ngilneih hmel sawtin a hria a,a taksa pengtinte chu a hrechiang tawh hle ani.A duh vang reng pawh ni lovin a thinphute chu a rang tawh hle a.

Chutia a en reng lai chuan hmeichhia rawn phone tu kha a han hrechhuak leh thut a,a hrawk chu rawn hnawh deuh up up tu awm hian a hre nghal a.A muttui hmel em avangin kaihthawh loh țha zawkin a hria a,dimtein a chhuahsan leh ta zawk a.In hnuaiah chhukin,a rawn phone tu hnenah chuan Ben chu tihbuai theih ani lova,a duh chuan thu a chah thei ang tih a hrilh nghal a.Lehlama mi chu a alawm loh hmel kher mai.Mahse tih theih dang nei si hek lo,thu chu a chah ve ta tho a,chutah phone chu a dah ta țhuai a.

Lehkha thema a thuchah chu en in China chu a thaw halh a,Olivia chu eng ang tak ni ang maw tiin a ngaihtuah a,a hmel pawh a țha hle ang tih a ring bawk a.Bena ngaihzawng tawh chu chhe zawk zawk an ni hauh lovang tiin a rilru chuan a ngaihtuah nauh nauh a,nuam a ti tehchiam lo kher mai.Chutiang ngaihtuah hman ka ni lo ve,ti niawm takin choka lamah chuan a kal a,Bazar nana thil a mamawh velte chu a ziahsan ta zawk a.

Bazar ațanga alo haw leh chuan dar li a pel tawh a,a car chu inhnung lamah dahin,basket pahnih chu a khai a,choka lam chu a pan a,a hahin lum pawh a ti hle mai bawk a.Choka ah chuan Ben chuan coffee in pahin chanchinbu alo chhiar mek a.

Ben an China bazar lo haw a hmuh veleh chuan a basket khai chu alo lakthlak sak vat a.

China chuan, "Ka khai thei alawm," alo ti a.A hmel chu a han en a,a pum chu a ti deuh nghulh ta mai a,mahse a rilțam vangah a han puh deuh thlarawk a.A hmel chu a lang tharin,a hahdam hle a,a kum zat awm te ahan chhut pawhin kum sawmthum paruk,sawmthum pasarih vel anih a han ring deuh ngawt a.

"I thlauh țep anih kha," tih pahin dawhkanah chuan a han dah a,coffee chu a thlitsak bawk a.Chair a țhuin China chuan a in a; vawiin chu a chauh deuh vang nge ni chu rei a ti hle mai a.

A rilru hriatpui niawm takin Ben chuan, "I hna hi hahthlak deuhin i hre lo maw?" tiin a han zawt a.

China chuan, "Kan bulțanna kha a țha vak lo tih ka hria," lungawi vak lo hmel chuan a han ti țan chauh a.

"A tawk e,naupang thinrim ham tak inih hi,i ri leh hlat mai țhin a; ka sawi khachu theihnghilh leh daih rawh," nui hmel lek lek hian alo tihkhalh a.

China chuan - A awlsam lo ngawt ang,a ti rilru a.A coffee chauh chu ngaihtuah niawm tak hian a en ran a,an boruak chu nuam lo em a a hriat avangin, "Telephone a thuchah kha i lo hmu em?" tiin a zawt ta a.

Ben chu a bu nghauh a, "I țuan a țha kher mai," la nuihzat hmel deuh tak chuang chuan a ti ve a.

China chuan a melh zawk chauhva,a chawhmeh leite phawrh tur chuan a thawhsam ta a.A hawihhawm duh loh dan em em chu mak a ti deuh a,hetiang reng a a awm anih phei chuan an inkarah inhriatthiamna awm thei dawnin a ring lo hial ani.

A sangha lei, vur bawma dah pah chuan, "Hetah zanriah i ei angem? Phone a rawn betu Olivia inti kha hrerengin,a ei loh ngei pawh a beisei ani.

Ben chuan a chanchinbu ken lai kar ațang chuan a rawn en a, "Aw,pawi i ti deuh em ni?" a rawn ti ve a.A rilru hriatsak tum niawm tak chuan ala rawn en reng a.

"Rawngbawl dan tur ka hriat theih nan ka zawt mai che ania," thinrim insum tak chungin China chuan alo ti a; Ben chu kal chhuak se,amah chauh chuan awm thei zawk se a duh ani.Mahse kawng lehlamah chuan nula hmelțha Olivia bula a awm lo thei tur chu a lawm rilru ang reng hle lawi a.

"Nia,ka hria alawm," a lawm chiah lo tih hre reng chungin Ben chuan a han ti a.A tho va,a bulah chuan rawn kal hnaiin a biang chu a han khawihsak a, "Inren thiam tak i nih awm hi,hriatreng tur anih hi," a ti ve ta sap a,a chhuak ta nghal a.

China chuan makti tak chung hian a kalchhuak lai chu a en reng a,a bianga a khawihna chu sa deuh hut hut hian a hre tlat mai lehnghal a, "Hrep tak hian," a ti sap a.

Rei vak loah chuan ei peih diamin Dinning room chu a siam fel a,khua a vawh avangin pindan tinah chuan mei a chhem vek bawk a; a chhuahsan ațang khan Ben chu ala hmu leh miah lo va,mahse a pindanah hna a thawk reng tih erawh chu a hria a.Choka vel a duh ang thlapa a tihfel tawh chu lungawi hmel tak hian a en kual a,a eirawngbawl pawh a uluk a,a hna hi a tlin tih hriattir a duh ani.

Pindan chhuahsan tura a inher chiah chuan kawngka dal taka Ben a lo ding reng chu a hmu ta a,uluk taka a thil lo rem fel vel a en hnu chuan amah chu a rawn en leh a.

"Ka bulah ei rawh China,mahnia ei hi ka chak lo teh ania," a ti a. A Christian hminga a kohna hmasa ber a niin, a hmui chuan a rem thlap mai a.

"Chokaah ka ei thei alawm," China chuan a lo ti ve vat thung a.

Ani chu a nui a, "I hlau em ni?" a lo ti vat a.

"Teuh lo mai," China chuan amah pawh enlem lo chuan a lo ti ve mai a.

"Chuti chu insiam kep rawh.A reng reng thuah James nen pawh in ei dun fo awm si a," a ti ta a.

China chuan Ben a țawng duh dan chu a ngei kher mai.A thleng tur a lakna drawer pawh chu a duh aia ring mah chuan a khar ri bar a,amah hlat thei ang ber turin a thleng chu a dah a,a che vel chu Ben chuan ngawi rengin a lo thlir a,a tih zawh chuan chhuah mai hi a han tum a.Mahse ani chu a din ngaiin alo la ding reng a.

"Min lo hrethiam lawk rawh," a ti a,a thinrim em avang chuan China mittui chu a tla țep mai nghe nghe a.

Ben chu ala chesawn ta chuang lova,amah chu ala en reng mai a.

Amah hnaih taka China kun reng,a khabea a han kuai dak chuan a mittui tling piau chu hmuin, "Engtizia nge ka bula chaw ei chu thih hrehin i hreh elo?" fiamthu tih hriat tak chuan a han ti leh a.

"Engatinge ka chungah hian i ngilneih loh em em?" China chuan alo ti hlar a.

"Ka ngilnei lo amaw? Ka ngilneihna chu i duh reng em ni China?" makti hmel tak chuan a ti a.

"Ka hre chiah lo," China chuan a ti ve nghat a.

Ben chuan dimte hian China mittui chu a hruksak a, "I duh ka ring lo," tih pahin a rawn kun hniam a,a hmui nel thap mai chuan China hmui chu a rawn dek a.

An hmui a intawn veleh chuan China chu rilru na tak leh,pawnlama nuam ti rilru tak si chuan a khur der der a,a ban tha chak tak mai chuan rawn kuah se,amah chu duh tak maiin rawn kuah se a ti rilru em em mai thung a.Chutah inthiamlo tak chung chuan a talchhuak a,a chhuak ta nghal daih a.

A inbual zawha zanriah eitura a inthlak lai te chuan Bena hmuiin a rawn khawihna laite chu a la hre ru reuh reuh reng a.Darthlalanga inen chungin a hmui chu dimtein a han khawih ringawt a.

A sam chu țawn loin a thlah darh hniang a,Mascara leh lip gloss tlem a hman chu duhtawkin,Ben Galloway hmachhawn a hreh deuh tih mai loah chuan a landan chu a duhtawk hle a.A pheikhawk sang a bun leh hnu chuan a hmel pawh pangngai thei ang bera lantir a tum tlat a.

Ben nena chumi tlai an hman dun dan tur chu ngaihtuah reng chungin choka lam chu a pan leh ta a,chawhmehte chu dawhkanah chuan a chhawp țan ta nghal a.Hmu lo mahse Bena pawh alo ve ani tih erawh chu a hre thei a; thawm a dim thiam avang leh a chetran em avang hian amah chauhva awm anih leh nih loh pawh hi a hre thei lo ani.

"Ka lo pui ang che," nui chungin Ben chuan a rawn ti a.Ani pawh chu a inthlak ve tawhin,dinner jacket leh kekawr dum a ha a,a kawr var hak chuan a vun sen uk deuh chu a tilangsar hle a.A palianin,a hlauhawm hmel hle pawhin China chuan a hria a.Ben an a rawn en chuan a ka chu ro deuh hulh hian a hria a,a ip deuh chaih a.

"Tihtur vak pawh a awm tawh hleinem,chubakah heng hi ka hlawh hmuhna chhan a ni alawm," zangkhai tak chuan alo ti mai a.

"I duh zawk chuan le,keiin wine ka lo lem ange," lawm vak lo tih hriat tak chuan a han ti a, chutah "I lang nalh kher mai," nui țha chung chuan a han ti leh a.

"Ka lawm e," tiin China erawh chuan lehlam a hawi vat thung a.A hmel lo danglam leh vak țhin chu hmuhtir loh hram a duh ani.

Chaw an eikham chuan a hah tawh ringin Ben chuan coffee siam chu a chuh ta vat a.Mei alh hlap hlap bulah China chu hahdam tak hian a lo țhu thung a.Tray a chawiin coffee chu a rawn pe a,China chu hlim tih hriat tak hian alo nui var var a.

"I siam tui hle mai," sikret țan paha nui var var chung chung chuan a han ti a.

China chuan, "Ka thiam ka tih reng kha," tiin alo nui ve var var a.

Ben chu a nui hawk hawk a, "I sawi amaw? Ka lo ngaithla mumal hauh lova,naupang danglam tak i ni China, engatinge hetiang ni si a,hetiang inhlui zet enkawltua i țan mai theih,min han hrilh teh?" a ti ta duah a.

"In enkawl hi nuam k tih zawng ani a; tin, he in hi nuam tak ni pawhin ka hria a,mahse min hiptu ber zawk chu mahni chauhva chen theihna awm hi ani.Tunhmain mahnia luahtur ka lo la nei ngai lova.......!" a hriatthiam hmel loh em avang chuan a sawizawm zel duh ta lo va.

"Chuti lam chu alo ni maw?" a mit pawh lasawn chuang lovin Ben chuan alo ti ve mai a.

China chuan hn sawizawm leh vak ngaihna pawh a hre lo va.A va en leh chuan hepa hian a hip takzet a ni tih a inhria a; hetiang hian tunhmain a awm pawh a la inhre ngai si lova,mak pawh a tiin,a tibuai rilru hle ani. 'Duh loh' hei chiah hi hepa lak ațanga a inven theihna tur chu ani.

WEbsite link ho awlsam zawka in zawn hmuh zung zung theih nan STORY FB group siam a ni e, in lo hmangtangkai theuh dawn nia... Whatsapp group pawh siam a ni e.
Group link : https://www.facebook.com/groups/991354610918230/

A coffee chu a tlak thuai a,thleng sil tur chuan a tho nghal a,sil zawh vat a,mut a duh ani.He Ben Galloway hi ngaihtuah tawh miah lo turin a intiam a,Tih aiin sawi mai hi chu awl tak ani.

A sengkhawm vel lai chuan, "Sil a ngai lo,dah rawh," Ben chuan alo ti vat a.

China chuan a en hau a, "A ngai lo,reiloteah ka zo mai ang," alo ti ve vat bawk a.

"Vawiinah i thawk hah tawh a,chuvangin dah mai rawh," Ben chuan alo ti leh a.

"Tih ka duh alawm," ngai pawimawh lo tak hian Chin chuan a lo ti ve leh a.

"Mi hnial hi chu i peih ve ngawt mai,i hah hle chung pawhin. Mahse,ka hrilh tawh ang che khan ti mai rawh."

China chuan thinrim tak hian a hmachhawn a, "Chu tak chu ania heta ka dinhmun hi chiang taka hriat ka duh ani.He in enkawl tur hian hlawh mi pe a,thlengsil hi chung zinga pakhat chu ani. I chhihhlawh ka ni lova,hlawh neia rawih ka ni zawk; thlengsil tura rawih.A tawk em? a thinrim tih a hriat avangin a hmel chu a en duh hauh lo va.

A tho va,luhlul hmel tak hian a rawn en a, "I sawi chiang khawp mai," Ben chuan a ti ve nghat a,a chhuak ta nghal a.Chutah China pawh chuan a tih lai chu a chhunzawm ta zel a.An hlim tawh tehlul nen a tichhe zo leh ta vek mai!

A thlengsil chauhva a rilru pek tum chuan fimkhur takin a sil ta mawlh mawlh a,a sil zawh chuan choka light chu tithimin,a khum lam chu a pan nghal a.Ben a sawi ang khan a hahin,a țum a țha lo deuh reng a.Naktukah zawng a țha ve tawh ang chu,a ti rilru nauh nauh a.

Muhil mai thei lovin China chu a khum lianpuiah chuan a let a let a,thawm a han ngaihthlak deuh vang vang pawhin thawm hriat tur reng a hre lo; Ben chuan Study room ah hna a thawk leh anih a ring a.

Reitak hnuah chuan a muhil ve ta hram a,a mak teh e,ngaihtuah hauh loh pawh hi mumanga hmuh tlat chang hi chu a awm ve țhin reng a; A mumangah chuan Italy ah alo awm leh a,Signor Cencelli bawk khan alo tibuai leh a,meng sen rum mai leh hmel hlauhawm pui chung hian alo man bet tlat mai a, alo tal chhuak thei hauh silo.A hlau lutuk chu alo au vak vak mai a.

A han harh meuh chuan a dara Ben a kutin alo kuah reng chu a han hmu a,khua a vawh tehlul nen thlan hian a lo bual huh chap mai a.

"Ben" ama hriat tawk lek chuan a han ti sap a,a lungphu,phu dawt dawtte chu a hria ang tih a hlau hle mai a.

"Mumang mai ani a,tunah chuan i him tawh e," zaidam takin Ben chuan a rawn ti hlawl mai a.

Khum bula khawnvar chu Ben chuan a ti eng a,dim tein China lu chu a lukhamah chuan a nghat thla leh a.Mutkawr dum lianpui a hain,a awmhmulte chu a lang chhap thei a.

China chuan a hmai hliaha a sam chhawlleng chu a huihkiang a, "A pawi ka ti hle mai," a han ti sap a.

Ben chu a nui sak a, "Engmah pawitih tur a awm hleinem,enge ni i mumangah i hmuh a?" a han ti a.

China chuan hrilh nge țha ang hrilh loh? tiin a han inngaihtuah phawt a. Chutah, "Italy a ka awmlai thil ania," ti chauhvin lehlam hawi chung chuan a chhang ta a.

Ben chuan chuti mai chauh chu alo duhtawk ta hauh lo mai a,a lamah a kuai her a, "Min hrilh rawh!" a ti ta tlat mai a!

China chuan a mitmeng ngilneih hmel tak a han hmuh takah chuan sawi mai pawh chu țha zawka hriatna a nei ta a.Tichuan, "Rome ah chuan nau awmin ka awm a,nuam pawh ka ti em em a; ka thawhna nu, Adele nen phei chuan kan inkawmngeihin,naupangte pawh an țha em em a.Mahse Signor Cencelli erawh chu......Rapthlak tak ani.Min khawih a tum laiin Adele chuan a rawn hmu ta hlauh a,min tawpsan leh ta hlauh a.Ka țhianțha em em Adele chuan......" sawi hrehawm a tih em avangin a khur ta dar dar a.

Ben mitmeng chu a rum kher mai a,a hmui chu a chip hmak ta mai a, "Chu chu ila mangphan ta reng ania maw?" a rawn tichhuak ta hlawl a.

China chu a bu nghat a. "Ka mangah chuan min lo manbet a,ka lo talchhuak thei si lova......." a ti ta a. Chutia a han hrilh vek mai chu amah ngei pawh chuan mak a inti deuh hial a.

Ben chuan a hmai chu a chulsak a, "Ka nau khawngaihthlakte," a ti sap a,a mittui parawl kiangte chu a hruksak a,a lainat hmel kher mai.A chhan ber pawh a hriat hauh lohvin China chu a hma aimaha lungchhe zawk chuan a rawn țap ta hlap hlap mai a; Duat taka enkawltu Pa kianga fanu awm hi a ang ber awm e.

Ben chuan a han kuah a,a sam te chul sak heuh heuh chung chuan a hnem pah malh malh a; China pawh a thla a muang huai huai a,lungawi hmel takin a awmpharh hlai hlap maiah chuan a hmai a phum kak a.

A lungchhe zualpui a han reh chuan Ben chuan a muttir ta a.Ani chu a ding chhuak a, "Engemaw intur ka han siamsak ang che,i muthilh theih nan," nui chung hian a han ti a.

"Ben......" amah chauhva awm chu a ngam lo tih a hmel ațang chuan a hriat theih a.

"Minute hnih emaw lek chauh ani ang,bawnghnute ka va chhuang anga,i duh leh mi rawn au vak mai dawn nia," China hmai danglap han piaisak zauh pah chuan a ti a,a nui pah hawk hawk a.Choka lam a pansan ta a.

China chuan kohlet leh mai a duh deuh rum rum a,a hlauhna chuan a thauvah a man a,amah leh amah pawh chu dawi a inti hle a; mahse choka lama Ben a thawm ri rak rak a hriat chuan a tithlamuang leh huai a.

A sawi ang ngeiin Ben chu reiloteah a rawn lut leh ta a,chocolate la khu vat vat chu a rawn chawi lut a. "In rawh le,far khat pawh bang awm hauh lovin," a han ti a.

Khum tlangah chuan țhuin China chu a en reng a,China pawh chuan no chu lain a han in a,a lo tui kher mai lehnghal a,a chhawk huai huai pawhin a inhria a.

"I ngilnei hle mai," a ti ta sap a.A biangah chuan mittui sulhnute chu a la chambang val raih a.

Ben chuan, "Vawiin tlaia i ngaihdan kha chu anih loh kha," alo ti hmuk a.China chu hnial tumin a han ang ziau a,mahse Ben bawk chuan, "I chocolate kha in rawh,țawng a ngai lo,kha khan a tilum dawn che alawm," alo tih khalh zat a.

China pawh chuan Ben a hrilh ang chuan a tlak ta vek a,a hmui chu a han liak zauh a,Ben an alo en reng chu nuam lo pawh a ti deuh hle a.A harh tawh hle nain,a kawchhungah chuan hlauhna chuan ala fan reng tho a,han mut leh pawh chu a huphurh ang reng hle a.

"Tunah chuan mu tawh rawh - Naute," tih pahin Ben chu a ding ta hluai a.

China chuan, "Ka tiharh che em ni?" a kal nghal mai la ui tih hriat tak chuan a han ti a.

Ben chuan, "Min rawn ko alawm," a han tih chuan China zak chu a sen ta ap ap a.A hmingin a ko a ni awm si a,inchhung vel enkawl tura rawih mai chauh si tan chuan a inawm lo deuh mange!

"Ka la muhil lo reng reng a," China sakhmel a han hmuh chuan nui hawk hawk chung hian a lo ti leh a.

"Pawi ka ti ngawt mai,tihbuai che ka duhloh tehlul nen."

"Ka hria alawm." Kawngka a pel țep tawh tihah China chuan, "Ben,khawngaihin min kalsan teh suh,awm ve rih rawh," mangan hmel tak chuan a ti ta tlat mai a!

Makti hmel takin Ben pawh chu a ding leh chat a. "China,i sawi awmzia chu i hre lo ani," tiin a sam dum chhah tak chu a tuai a tuai ta mai a.

"Ka sawi loh tur ka lo sawi ani - ka ât vang ania,pawi ka ti khawp mai!" hriattham chang chang chauh hian a han ti niah niah a.Amah chauhva chu zan thim tak kara a han mu tur a ngaihtuah chuan a hlau tlat ta mai ani! A dawih lutuk chu a inhaw ru em em a.

"Pathian hmingin,ngaihdam hi dil reng lem teh suh," bung vutin Ben chuan a ti a.Chutah Chin bulah chuan rawn kir lehin a rawn kuah ta chat a,China pawhin lawm rilru tak leh khur dar dar chung chuan a kuah let ve nghal a.A thla pawh a muang nghal siai siai a,muthilh mai erawh chu ala tum lo nain,a chau deuh em si a,reivak lovah chuan a muhil ta mai a.

Zinga a han harh leh chuan Ben a kuah reng chung chuan alo la mu a,cje lovin nizana a chunga thil thleng kha a ngaihtuah let leh nauh nauh a.Ben lah chu ala muhil tuiin a pangti chu a lum țha thar thar hle a.

Khaw eng țan raih chuan inchhung pawh chu a rawn kap eng rii riai tawh a.China chuan alu che sawn lo pawhin a lemziak tar chu a hmu thei a,chu lemziak en reng chung chuan engtinnge a tih leh ang tih chu a ngaihtuah nauh nauh reng a.Aw hepa bula awm a,a kuah chu a nuamin a hahdam thlak siai siai hle ani.....!

Mahse amah vekin chu ngaihdan chu a paihthla leh thuai a,eng thil atthlak tak nge a ngaihtuah tak mai!? ani in enkawltu mai siin chutiangte a han ngaihtuah tak ni! Chu lo rengah hepa hi a bulukin,a nun a rawng si a,a duh lo hle ani lawm ni? Mahse nizanah a bana kuahin a bulah a mu zankhua si! Thil atthlak tak chu a ni; han nuih chhuah nghek mai a duh rilru rum rum a,mahse tihharh a hlau si a.Mahse a han che hlek khan a lo tiharh hman ta tho a,China chu nghet zetin a rawn kuah leh vat a.

China chuan fiah kel kawl hian alo en kiau mai a,Ben pawh chuan la men peih loh hmel tak chung chuan alo en ve a.China chuan engemaw han sawi chu a duh hle nain,han sawi mai tur erawh chu a hriatloh bakah a hrawk chu phuar ang tlat hian a awm si a.

China kuah reng chung chuan, "Good morning China," a han ti a,a thatchhiat hmel hle a.China erawh chu a ngawi reng a; zing thawha a nula mutpui țhinte laka a tihdan țhin em ni ang? Hmeichhia tih thiam tak a nih hmelin,a nulate chu tilungawi thei hle pawhin a ring bawk a.A hmui chu an petsawi zauh va,engtiziaa chutiang thil te chu ngaihtuah ta mai nge anih?

A ngawih reng avangin Ben chuan, "I lei an phuar elo? a ti ve hial a.

"I hriat angin ka hamhaih em ani," China pawh chuan a ti ve ta thlawt a. Ben chu a nui ta hawk hawk a.

China bawk chuan, "A nuihzatthlakna lai tur ka hre hauh lo," a lo ti leh nghauh a,a mit tak pawh chu a en ngam lova.A kuahna ațang chuan talchhuah a duh rilru ang reng hle a,mahse Ben lah chuan ala kuah tlat si a.

"I thophang hmel pawh a țha kher mai," ngaihtuah zui vak lo hmel tak chuan a han ti leh daih a.

China chuan, "Chu pawh chu ala nuihzatthlak chuang lo," a lo ti leh sap a,a ban tha chak zet mai chu a hneh der silo.

"Ani lo mai thei e.Zingah hian i țum a țha vak lo țhin em ni?" Ben chuan a han ti leh daih a,a hmui chuan a sam chu a nulsak vel a.

China chuan, "Engatinge nuihza siam nana mi hman a,engahnge mi kaltir mai zawk loh?" a han ti hlar a,a marphu lo rang ta sauh erawh chu haider hram a tum a.

Ben chuan a rilru tak niawm reng chuan, "Nuihza siam nan ka hmang lo che a,la pawm reng che hi nuam ka ti ani zawk," la nui pah reng chung chuan a lo tihsan mai a.

A ngei kher mai! A tham loh dan leh he thil hi fiamthua a ngai anih chuan.....! China chuan, "Ka hua che,min kaltir tawh rawh - tunah!" a han ti tuar a.

A taksa khawng leh a hmui chip hmak danah chuan a kalthui lu hret anih a inring a.

"I gheihnghilh ta mai em ni - Sweetheart? Nangmah ngeiin a nih kha heta kal tura min sawmtu chu," vawt ruih hian Ben chuan a ti ta a.

China chuan hlauh hmel tak hian a han en chho dak a, "Ni lo!" a ti zawi raih a.Ben chuan China lu ah chuan dawm betin,a hmui chuan China hmui chu a zawng ta ruai mai a.

A hmui a rawn zawn hmuh meuh chuan zei lutuk hian a rawn nawr kau a,dimna tel map lo chuan a fawp ta bawrh bawrh mai a,China ban pahnih te chu a kut lehlam lehlam chuan a dawmbehsak tlat bawk a.

China chu țang nasa ve teh mahse a chhungril tak erawh chuan Ben a fawhna chu nuam a ti vawng vawng hle lawi a.Second reiloteah Ben chuan a thlah leh a,lukham chu a delh leh nghal mai a.A kut chu a tukkhum lama suihin China chu a en a, "Hrep tak che hian China, min ti thinrim hle ani," ro hulh hian a ti ta a.

A hmui chu a khawih nauh nauh a, "Ka tum reng ani lo asin," tih pahin China chuan a sam darh niaih chu a huih mam a; chupa taksa lum thur thur chuan ala hnaih em reng si avang chuan a tirilah a la mur uai uai thei a.

Ben an a han fawh chiah khan ala hriat ngailoh a taksaah engemaw tak chu chawhthawhin a awm a,chu chuan a taksa pum mai chu a fan chhuak vek a,a thisen kalte chu lum deuh pap pap in a hre bawk a.A rilru tak chuan thlah mai lo khan kuah reng sela,mutpui hial sela a duh ani zawk si a!

A lu chu a thing nawk a,amah a lo la en reng tih pawh a hria a,a zakin a ngaihtuahna ngei pawh chuan a tihlau hial ani. "Ka ngaihtuah i hre thei em?" alo hre thei mai palh ang tih hlau rilru tak chuan a ti ta ngawt a.

"Ka hriat theih ka ring," nuihzat hmel takin Ben chuan alo ti mai a. "Ka rilru i hriat theih chuan ka duh che tih pawh i hre theiin ka ring," a han tih zawm leh zat a.

China chuan a ka ro halh leh thinphu dat dat chung chuan a en chho va, "Ka......i kal a țha zawk ang," a rawn tichhuak ta niah niah a.

Ben chu a nui sak a, "Ni e,ka kal ange," tiin khum ațang chuan a tho va,a chhuak nghal ta daih a.

Ben Galloway an a duh ani.Chu thu chu a thu hriat tawh zawng zawng zingah a la mak ber hial mai! A thinphu dawt dawt chu tihreh hram hram a tum a,chu pindan ruakah chuan ama hriat twwk lek hian, "Ka hua ani," a ti ta ringawt a.Mahse chu a thusawi chu ama beng ngei pawh chuan a awih thlawt lo mai! A dik reng a,mahse mi hausa leh ropui takin ani housekeeper mai mai chu nawmchen nan mai hman a duh ni lekah a ngai a,a chhungril tak chuan a duh chiang alawm!

                         Chapter - 5


Chumi ațanga ni thumnaah chuan, China chuan breakfast a siam laiin Ben chu alo kal a, "Vawiin hian mikhual pahnih kan thleng dawn a,engchen nge an cham dawn ka hre thei rih lova,i lo kep thei ang em?" tiin a rawn zawt a.

"Aw, thei tehreng mai," tih pah chuan a rilru chuan tute tak ni ang maw? China chuan a ti rilru nauh nauh a. "Pindan engzatnge ka lo buatsaih ang a,hetah zanriah an ei nghal ang em?" a han ti ve leh a.

"I ngaihtuah thui hle mai,double room pakhat a tawk thei maiin ka ring. Nia,zanriah pawh hetah an rawn ei nghal ang," Ben chuan a ti a.

"Awle," tih pah a chhuah nghal mai a tum laiin Ben chuan a banah a lo man sak a.

"I hah hmel hle mai - ka naute," a hmai dang del en pahin Ben chuan a han ti a.

China chuan, "Ka țha alawm" alo ti ve mai a.Zana a mut țhat theih loh thu erawh chu hrilh a tum hran bik lo. Ni reilote ațang khan hepa hi engtikawng zawng pawhin a duh lo lem lo tih a inhre chhuak a,a hmuh dan leh ngaihdante chu a danglam tawhin,khami zana a ban tha chak takin thlamuan tuma a kuahnate kha ala theihnghilh thei hauh bik lo.Chu thil chu zana amah chauhva a mutte hian alo ngaihtuah veng veng țhin ani si a.

Ben chu a sumdawnna thilah a hlawhtlingin,a hausa em em a,a thluak a țhain hna harsa pawh a thawk zung zung thei țhin a.A chakin amah a inring tawk a,a thu a duh thei hle bawk; mahse lehlamah chuan ngilnei leh zaidam awm fu hian a lang bawk si. A rilru leh pianphung chuan China ngaihtuahna chu a tibuai ani.

"Țha,mahse mahni tana țha pawh hre lo khawpa luhlul," China chuan a ti hmiah mai a.Chupa hmaah chuan langtlang vekin a inhria a, "Engatinge min kalsan mai loh?" a thil vei ruk reuh reuh chu a hriatpui ang tih hlauthawng tak chuan a han ti sap a.

Tichuan amah zawk chuan Hall lam chu a pansan ta a. Hepa bula a awm tawha a nervous viau zel mai chu mak a inti hle nghe nghe a. Kawngkhar lam chu panin a nam hawng a,pawnlam chu a thlir a; khua a vawtin,Ni chu no sar hian a lo eng raih a,huana thinghnahte chu silver rawngin a luan ta emaw tih mai tur hian an tle siau hlawm a.

He in ațang hian a kalchhuakin,reilote tal chu a vak harh ang a, Ben pawh a ngaihtuah lo hram tur ani ang.

A Fur jacket chu hain kutkawr lum leh boot a bun leh a,chutah Fortune chu a ko a,uite chu lo kal vatin a rawn zuan nghal tar tar a.

Chumi tuk zing boruak thiang nuam takah chuan China chu a pen chhuak ta a; khua chu a vawtin a harh vawk hian a inhria a,tichuan a tawmna ngaia a suangtuahna kual vel țhin pawh chu pawn boruak chuan a lapeng ve ta zawk a.Tukin zingah te khan hawihhawm teh mahse an inkar boruak chu siam hla thiam hlein a hria a.

Car thawm a han hriat chuan Ben a mikhual turte an nih ngei a ring a,amah Ben a ngeiin a lo hmuah chi ni zawkin a ring a.Mahse alo ring dik lovin, James kha alo ni zawk a.

China chuan hlim tih hriat tak hian alo nuih a,kawm a nuamin China pawhin a ngai hle ani. Car ațanga rawn zuang chhuakin, China kut chu a rawn vuan a,a biangah chuan a rawn fawp a.

"Hello, Love, engtinnge i hna te chu?"

"Ka țha e, ka hna pawh....."

James chu a nui hawk hawk a, "Ben chuan sal ang maiin a chhawr lo che maw? .......uuhuh!"

"Chutiang....." fiamthu deuhva chhan a tum lai chuan.....!

"Hrilh rawh China,ka lo enkawl dan che chu engtinnge i hrilh dawn? hriat ka chak viau ania!" a hnunglam ațangin Ben chuan a rawn ti ta thut mai a.

China hmai chu a sa ta hat hat mai a,a hmel a rawn hmu thei lo hlauh chu a lawm hle ringawt a. James erawh chuan a hmel sen țawn țawn a han hmuh chuan a meng zim sat a.

"Ben, kan inhmu chu a alawmawm hle mai - unaupa," China chu kalsanin James chuan a va chibai a.

"Engtika lo kir nge i nih?"

"Nihnih kalta khan." Ben a aw chu a hniamin,nuihzatna hi a lang tel a; a rawn en tih hriain China chuan a en duh lo lui ve ngat a.

"Ka lengkual vel a." Hrilh bik pawh nei chuang lo hian China chuan a han ti a.Fortune chu kovin an kal țan leh ta a.

Reiloteah James chuan a rawn um leh a, "Hey, min lo nghak teh," nui hawk hawk chung hian a rawn ti a.

China pawh chuan lo nghakin, "Ben a hmu tura lo kal i nih ka ring a?" a han ti a.

"Naupang â lutuk,nangmah hmu tura lo kal ka ni alawm," fiamthu titih hian a han ti a.

"Oh, a lo ni maw?" China chuan a ti ve mai a. "Nang i hna lamte,rim lutuk khan em ni i la thawh reng?" a han ti ve a.

James chu a nui a, "Chanchin lawmawm lutuk hrilh tur che ka neih vanga lo kal ka ni zawk. Ka țhian,Clare leh Paul inneih nia min rawn hruaitu kha ila hria em?" China chu alo bu nghat a. "Aw,khapa nen khan kan thawk dun dawn a,Athens ah Hotel kan lei a, chu chu kan enkawl dun dawn ani," phur tih hriat zet mai hian James chuan a rawn ti ta a.

China chuan makti hmel tak hian, "I hnathawh lai nen chuan a inpersan daih dawn tihna anih chu," a han ti a.

James chuan a dar chu a chhin ak a, "Pawisa lam tho Hotel ah chuan ka khawih dawn a, ni e,hnathawh han thlak ve hrim hrim pawh hi ka mamawh reng ani," a ti mai a.

"I ngaih ang mai aiin i pa chu i chhun a nih ka ring," China chuan a han ti a.

"Ani maithei.Ka hriat zawng chu - hamțhatna tur hlir ani tih hi ani; nunthar nen."

James chu nidang zawng aiin phur hmel zawkin a hria a,mak pawh a ti zawk hle a.Helaia awmhmun bengbel ve turah alo ngai ringawt kha ani si a; a chhan pawh a hnathawh ah chuan a ding chhuak țanin,in lah a nei țha a,chutiang han kalsan ngawt tura a lo rin loh vang ani. Mahse ani,fahrah dinhmun nen chuan khaikhin chi rual pawh a ni lo tih chu a ngaihtuah neuh neuh a.

"Engtikah nge i kal ang?" huphurh lawk takin China chuan a han zawt a.Chutianga țhianțha a han țhen mai tur chu hreawm a ti lawk a,mahse kawng lehlamah chuan a hna duhzawng tak anih avangin a lawmpui ang reng bawk ani.

"A theih hun hmasa berah,a ni tur chiah chu ka la hrechiang thei lo.Tukin khan Athens ațangin ka lo thlawk haw chiah a,chuvang chu ania ka rawn lan ngai loh. Helaia thil tih tur ka tihfel veleh ka kal nghal mai ang."

"Ka ngai ngawt ang che,ka tan chuan țhianțha tak i ni si a," China chuan ngui raih hian a han ti a.

"Chuti maw?" lawm tih hriat takin James chuan a han ti hau a. "Kei pawhin ka ngai ngawt ang che,ka bulah lo kal ve mai ta che,nang anga thil thiam ngah tan chuan hnathawh tur tam tak a awm thei zel mai ang chu," a han ti a.

China erawh chu a nui mai a.

James chuan, "Ka ti tak tak asin, duhtak, hna i duh phawt chuan lo kal ve mai rawh," titak hmel deuh hian a han ti leh a.

Mahse China chuan a lu a thinsan a, "Hna chu ka nei alawm," zangkhai vah hian alo tihsan leh mai a. Ben chu kalsan tur anga a han indah chhin ngawt pawhin a rilru chu a na nghal a,engemaw a awm tawh tlat mai!

"Anih leh le,i duh phawt chuan englai pawhin hna chu a awm thei reng ang. Ti ta daih ila Ben nen chuan in in mil em?"

China chuan, "In mil vak lo," meng khup deuh lap hian a han ti bauh a.

James chuan, "Engvangin maw?" ngaihven hmel tak chuan a han ti ve zat a.

Ani chuan a dar a chhin ak a, "Oh, ka hre lo, ka tithinrim reng niin a lang,a nelawm lohvin........" a tum loh deuh a a hrawka hnawhtu rawn awm awl awl avang chuan a sawi tum ang pawh chu a sawi zo thei ta lova. A mittui rawn tla tur dan tum chuan a mit a han khap sak sak a, "Oh, dear, pawi ka ti lutuk," a ti ta sap a.

Chuti taka a mittui tla hma lutuk leh James a han barakhaih ta chu a inhaw rum rum a,a mut tlem lutuk chu a chhan pakhat niah a ngai a, "Ka hah deuh vang mai ani e,ka tihrilhai viau che em?" a mittui hru malh malh chung chua a han ti leh a.

"Tihrilhhai lo ve," a ti nain a hmel ațang chuan dawt a sawi tih chu a hre thei mai a. Chutah James an fawh pangngaia fawh a tum ngai reng reng lo chu mak a ti deuh thut a,ințhianna bak engmah James lak ațang hian a beisei ngai lova,engtia hetiangte ngaihtuah ta nge maw ka nih le? Engpawhnise a tan chuan ka țha tawk lo ani phawt mai China chuan a ti rilru a. Ben a hmui lum hiamin a thinrim laia a han fawhte chu a ngaihtuah chhuak a,a thinphu chu a rang ta sauh mai a.

A inngaihtuah muk em avang chuan James a țawng mawlh mawlhin a sawi pawh chu alo hre reng reng lo mai a,inthiam lo hmel tak hian, "Pawi ka ti hle mai," zawt titih hian ti ta ngawt a.

"Haw tawh ila a țha ang,Fortune pawh a kal hla lutuk ang e, bakah Big Brother pawhin alo ngaihtuah lutuk ang che,ka bula i kal pawh hi a lawm vak lo mai thei ani."

"A pawiti hauh lovang," tiin James chu alo hnial a.Mahse Ben chanchin a hriatloh zia chu a inhria a.

Kut insuih rialin in lamah chuan an kir leh ta a,an țawng mawlh mawlh chu hrethiam lo tih hriat takin Fortune chuan a rawn zuanin a rawn chhaih vel țhin a.China pawh pawn boruak vawt thiang țha tak chuan tiharhin a hlim sawt a,leia hnahthel rau iar tla te chu a chhar khawm a.

Mi hmuh tur aneih thu sawiin,coffee intura China sawmna chu James chuan a lo hnial a.A kal liam hnu chuan a lut ve ta chauh va.

James sawi ang ngeiin Ben chu alo thinrim hle a, Hall a a Fur jacket a phelh mawlh mawlh lai chuan a va hmu a,ava nuih ringawt a,a kutkawr bun pawh phelh lo chuan a phar chhuak a, "En teh, heng hnah te hi mawi i ti ve em?" tiin a han zawt a.

Ani chuan thinur tih hriat tak hian a rawn melh a. "Maithei, mahse khang hnah lakhawm tur khan hlawh ka pe lo che," Ben chuan alo tihsan hmak a.

"Ka.....reilote ka va vak chhuak mai chauh alawm," hrethiam lo tak hian a han ti ve ngawt a.

"Study room ah Italian țawng tam tak Type tur a awm a, nangina reilote vahkual i tih ang vela hun khawhral hman tur ka nei ve lo - ka unaupa angin," meng thip khui chungin Ben chuan a han ti leh a.

A țawng dan chu a ngei bawk a,insum duh bik lovin, "I awmdan hi awmze nei lo niin ka hria Mr Galloway, zawlnei ka ni lo va,chutiangin note a awm ang tih pawh ka hre hek lo. Tin, ka hriatsual loh chuan office hun hi hunbi hmang ngai lo khan i insawi bawk a," a ti ve ta piap mai a.

"Hnathawh tur a awm chuan thawk turin ka beisei che ani," aw dam deuh zawk hian Ben chuan a han ti a.

"A țhat chu - Tunah ka țan nghal ang a,ka zawh hma loh chu ka thawk ang. Chu chubi duhtawk em? Nge ngaihdam dilin 'ka pu' ka han ti kher dawn em ni?" China chuan a han ti ve leh sak a.

A laka țawngkam țha a rawlh duh lo lutuk chuan a tithinrimin,a lo hlim ve na zawng zawngte chu a țawng chaltlai leh dengkhawng tak mai te chuan a tihchhiatsak leh zo ta vek si a. "Khawngaihna leh mi hriatthiamna i va han tlachham tehlul em!"

A țawng chu a la na bawk ani ang, Ben a kut tha chak zet mai chuan na fe hian a darah a rawn țham a,dimna a nei lo kher mai.

"Ramhuainu" thinrim zet hian Ben chuan a han ti tuar mai a,a lamah chuan a pawt hnai dawrh bawk a,rawng tak mai hian China hmuiah tak chuan a seh - fawh leh ta ngawr ngawr mai a, China ka chhunga thisen lum pap a rawn awm thleng chuan.

Hlau zet hian China chuan a taksa rit leh tha chak zet mai chu nem kian a han tum ngial a,mahse kulhbang ang tlut hian a nghet hle mai si a.


                        Chapter - 6

A ngaihtuahna kawm chuan minute sawmhnih dawn lai a țhutna ngaiah China chu a țhu a.Engtinnge Ben hi a hmangaih mai theih? A hriatna pawh a la rei lovin,a hun tam zawk phei chu amah huat nan a hmang kha a ni si a,a lo haw lutuk mah mah em ni zawk?

Thil chiang tak pakhat leh chu - Ben chuan a hmangaih lo ani,chu chuan a thinlung a vit na kher mai! Ka chhuahsan tur ani a han ti na a,an hawi kual vel leh meuh chuan a chhuahsan thei lo ani tih a inhre leh a,vei tak tak si lovin a thinlung chu a runsakin a hnehsak a,hnung leh hma, sir tawn tawnah a duh ang angin a vir kual tir vel a - Hrep tak a!

A thova,a malchunga Fortune muhil chu a bawmah a dah a,tuiluma inchiah vang vang chu a tum ta a. Tuiluma inchiah luau chung chuan zanriah ei huna a kawr hak tur chu a ngaihtuah a,nalh takin a inchei tur ani. Tichuan Olivia Daniel leh Ben pawh zam bik hauh lovin a hmachhawn ve thei tawh ang chu.

Tuilum tihrimtuia rei tawk a inchiah hnu chuan a lu su leh a,chutih chhung zawngte pawh chuan Ben chu a ngaihtuah lo thei lo.

A inbual zo,a rawn pen chhuak chuan lungawi vak lo hian a taksa ruak kung chu a han en vel a; Olivia inkhaithli thlarh mai chu a ngaihtuah a,ani ve zawng a hnute a lian lutuk a,avunte chu a var lutukin sen ve deuh se a duh hle ani.

Darthlalang hmaah a sam hnawng chiap chu a khuih malh malh a,nalh lo hlein a inhre thar leh ta a.

Inngaihtuah neuh neuh chungin sitting room meilum bulah chuan a sam chu a hem ro a; a inngaihtuah muk em avang chuan kawngkhar rawn kik ri pawh chu a lo hre hauh lova. Ben chu no pahnih keng hian a lo lut a,a chauh hmel hle hian alo hria a. A lo nuih sak a,a sam la ro chiang lo chu a hmai velah chuan a tla darh hniang a, "Hello" alo ti a.

Ben pawh chu a nui a, "Hi, coffee ka rawn ken che a,ka rawn zawm ve thei che angem?" no pek pah chuan a han ti sap a.

"Lawmluh i ni e,coffee min rawn pek avang pawh hian ka lawm e," tiin chair țha deuh ber chu meilum bulah chuan a hnuh hnaih sak nghal a.

Ben pawh chu a țhu ve nghal a,China sam khuih dalh dalh chu a lo thlir reng a,light eng sen pakhat chauh hi a inchhi a,an pahnih chuan an lang sen no raih mai nghe nghe a. Pindan dang chu a thim hlawm hle thung.

"Khawiahnge i mikhual te kha?" China chuan a ti a.

Ben chu a nui hawk a, "An pindanah an inhau a,lo inthiarfihlim san țha zawkin ka hria ani" a ti a.

"An chanchin min han hrilh teh,kum tam tak ațang khan ilo hre tawh em ni zawk?"

"Charles hi chu University ka kal lai ațanga ka hriat twh ani a,kan luh ni a inrualin, chuta țang chuan kan inkawm țan nghal a.Ka la hriat reng chu - Charles hian University a kal aiin Art College a kal duh zawk a,mahse a nu leh paten an phalsak lova; tunah hi chuan Architect a niin,a hlawh pawh a sang fu ani." A țhianpa chanchin a han sawi vel lai chuan Ben chu a hlim loh hmel riau a.

"Anih leh Olivia hi?" a aw chuba theih ang tawka pangngai thei ang berin China chuan a ti ve hram hram a.

"Kum li kaltaa Charles nen an inneih țumin Olivia hi chu ka hmu a.Model lar tak a niin,amah neih a remtih hma loh chu Charles hian a rim tlut tlut a," Ben chuan a ti mai a,engahmaha ngai lo hi a ang hle a.

China pawh chuan mak a lo ti deuh a,an chanchin vel sawi chu ning tawh niawm tak hian pindan vel chu a en kual a, "Tunhma ang lo takin he pindan chu i luah nuam hle mai,ka lo kal ve hi i pawiti lem lo vang chu maw?" a han ti chawt a.

"Ti lo ve le,i lo kal hi ka lawm zawk asin," a ti sap a, Ben a hmel a han en chuan khawhar leh mal riauva hriatna a nei ta thut a, "Ben......" a mit a han en chuan a ka chu a ro hulhin,sawi leh tur pawh chu a hriat zawm ta hauh lo mai.

An mit ve ve chu an la sawn thei lovin,a rilțamna chu China pawhin thup a tum tawh bik lo.Ben chuan a rawn hnaih ruak a,China hming lam reng chung chuan a rawn kuah ta chawt a.Vawi tam tak alo suangtuah lawk fo tawh țhin ang ngeia fawh rem taka a hmui lo dawh kau phat chu Ben chuan duhthawh zet mai hian a fawp ta vawng vawng a.

"Min kuah rawh China," Ben chuan a han ti sap a,a mamawh zia chu a hriat theih a,China pawh chuan nghet fe hian a kuah ve nghal chial a.

A biangah te,a mit leh ir no var hai maiah te chuan a fawp mawlh mawlh a; chutah zet zawngin China pawh a zauthauna leh phurna chu a chawhthawh sak chiang kher mai.A hmangaihin a mamawh takzet ani.

Ben an a hmui taka a han fawh leh takah phei chuan China thisen chu a lum zual ta pap pap a,a tirilah chuan a khur dar dar a, Ben a taksa lum tak chuan a taksa chu kng ham hamin a hre hial a.Chutah China hmai chu a kuai dak leh a, "I hmelțha kher mai China,ka mamawh takzet che a ni," a ti sap a.

Ben an a kawrfual a phelhsak lai te pawh chuan China chuan lo hnial emaw, țan lo khawh emaw pawh a tum tawh hek lo; Ben an a khawih ang ang chuan a lo inpe ve hmiah tawh mai ani. A mitmeng te chu hlimna leh phurnaa khatin a de sar sar tawh mai a.

"China,hmangaih che ka duh a ni,ka hmuh hmasak ber ni ațang che khan......"

A țawng lai chu China chuan a hmuiin a lo kharsak hmiah a,a dar pharh hlai țha deuh maite chu a kut chuan a chul ve riai riai a. Ben chu hmeichhe chinchang hre tak leh zei tak a ni tih pawh a khawih vel dan ațang chuan hai rual a ni lo. Ani China ve lah chuan mipa chinchang chu a hre lovin,a hmeichhe kawm țhinte nena Ben an a khaikhin dawnte a nih phei chuan tling lo leh zeilo a ti hle pawhin a inring a,mahse a rilru zawng zawngin a hmangaih si a.

Chutia phur tak leh zei tak,duhthawh tak maia Ben an a hrawm vel lai tak chuan phone a rawn ri ta ral ral tlat mai le!

"Ben....." China chuan a tisap a,kal lo zawk se a duhin,duh leh phone chu lo ri zankhua zak mai ang hmiang.

Ben chu a nui suk a,a mitmengte chu a dam thluam a.Mahse telephone lam pana a kal chu a lawm vak lo tih a men dur leh tak deuh dan ațang chuan a hriat theih a.

Reiloteah China bulah chuan alo kal leh a,a mitmeng chu a dur khui mai bawk a, "James" a ti sup a.

"Ben, khawngaihin......"

Ani chuan, "Pawi ka ti khawp mai China" a ti sup a,pindan ațang chuan a chhuak a,kawngkhar chu a khar ri pah bur a.

Khur dar dar chungin China pawh chu a thova,a kawrkilhte chu kut khur hlawk hlawk chung chuan a kilh ve leh ta malh malh a.A phurna sosang tak chuan a kiansanin,hnuchhawn leh mal ngawih ngawihin a inhria a. Oh, Ben! tia țah vawng vawng mai tak a chak a.

Nula chuan phur lo takin phone chu a la a,James erawh chu a phur hmelin,a aw chu a rawn zangkhai țha veh vawh hle thung a.A tuk zana zanriah eipui turin a rawn sawm hi a lo ni a,England a a awm chen tur a hriat loh avangin a sawmna chu pawm ngei tur pawhin a rawn ngen a.China chuan a aw ve mai nain, Ben rawn ve leh phawt a duhthu a hrilh a,kalbona a hria chu Ben chuan thawven thlak huaia a rin a ring nghal a.

A theih anga aw pangngaia James chu biak a duh hle nain,a hlawhchham titih a ni ber mai.James pawh chuan thildik lo a awm anih a ring nain, chulam phei chu engmah a rawn zawt duh bik lem lo a.

Muangchangin zanriah eitur chuan a insiam ta a. Kawr var thianghlim tak,a ruk taka pangpar pawl zam reih hi a ha a; silver țhi a awrh leh a,chutah sandal keartui sang pawdal lam hi a bun leh a,nidang zawng aiin make up pawh a hmang uar a.Darthlalang seipuia a han inen leh chuan amah pawh a lungawiin, Olivia Daniel han hmachhawn leh pawh chu a huphurh lo sawt tawh ani.

Choka lama a eitur siamte a endik leh hnu chuan dinning room lamah dawhkan rem turin a kal leh nghal a,sitting room a Olivia Daniel nui har har pawh chu a hre thei a, Ben a tihnuih vel a ni ngei ang chu.

A inpeih fel hnu chuan sikret a țan a,hip vang vang chungin tukverhah chuan a dak a,van thiang kuk maiah chuan thla pawh chu a bial teuh tawh hle a; thlasik rimte chu nam rum rumin a hria a. Enge ka tih tak ang? tiin a inngaihtuah neuh neuh a. Heta a awm a,a hmangaih dan pangngai renga Ben hi a hmangaih anih chuan ka thinlung a kehchhe vek ang, a ti nep nep a.

A dar kut hrawlpuiin a rawn vawn chuan a hawi chhuak nghal zawk a, a bul maiah Ben chu a lo ding reng a. "I țha maw?" aw dam thluam hian a rawn ti a,a lamah a kuai her a,muang zet hian a han en a.

China chuan ngawi rengin a en a, a țawngkam leh mitmeng ringawt pawhin a hneh theihzia a inhriat chuan mak pawh a ti zawk hle a. Hei aia nasa pawhin Ben chuan a ti thei si a.

Zanriah ei tur chuan a lo inthlak ve tawh a,a sam dumchhah tak chu a la hnawng chap a. Dinner jacket var leh kekawr rawng thim lampang deuh a ha a,a rawn hnaih em avangin a scent rim pawh a hre theiin, a lungphu chu a rang leh ta sawt a.

"Țha e, ka țha khawp mai,khatianga min han kuah vel khan kehchhe tak vek turah min ngai em ni?" a ti hmak a.

Chutah Ben a mitmeng ngilneihna chu a bo nghal vek a, "Ngai love,ka ngai hauh lo mai; i lak ațanga engmah beisei loh hi ka zir bawk," vawt ruih chuan a ti ve ngat a. A țawngdan chuan chemte ang maiin a khei na a. A dara a vawnna kut chu enin, "I kut hi lasawn rawh,min timur sung sung ania," a han ti leh a.

A thlah chuang hauh lo,vawt ruih hian a en a, "Chuti chu lemchan thiam tak inih chu,min lo chhanlet dan te kha a bu ang thlap a ni si a," a han ti leh a.

"I hre dik lo anih chu, ka hua che," China chuan a han ti ve leh hram a.

Ben chuan a dar a san uk a, "Ka hria,ka khawih i ngaithei lo tih pawh; i ka lum hiam maiin phur lutukin min lo chhawn ve tih loh chu - i pha thei bik lo vang China. Ka hriatnaah hian nemkai a ni tawh," a țawngkam tin mai chuan China chu a tizak hle mai.

"Ben.....ka.....i....." Ben a hmel rum tak a hmuh chuan a thusawi lai chu a tawp leh chawt a.

"I vun var no tak te kha chance ka neih lai khan lo hneh ngei tur che hi ka ni a," pehhel hmel deuh hian a han ti a.

"Chutiangin chance i nei hauh lo vang," a lo ti ve leh vat a.

Za lo tih hriat tak hian Ben chu a țhen sak a, "Min dang thei lo vang,ka duh nasat tluk zet chein min duh ve a ni darling," a lo tihsan hmiah a.

China chu a ngawi ta reng a,sawi leh tur a hre tawh lo ani. Deng na hle mahse Ben a sawi chu a dik tlat bawk si a. A vawnna chu thlahin sikret a țan a, dawhkan tlanga țhuin China chu a en run a, a thinrimna pawh chu reh tial tial hian a hria a.

China chuan thawha chhuahsan daih tur niin a hria a,mahse chutianga ti turin a chesawn thei hauh silo.Pâ tih hriat hliah hliaha mei a pak vel chu a lo thlir reng a,hmuhnawm a tih hmel hle a. Ben chuan a rawn nuih ta suk a, "A pawi hle mai,inhmuh apianga in hauh tak ziah mai hi, kan inkarah hian eng nge awm pawh ka hre lo. Naktuk zanah zanriah eiturin ka hruaichhuak thei ang che angem?" China mak ti lutuk hmel a han hmuh chuan, "Engmah hlauhtur a awm lovang Naute,zanriah ei chauh tak tak - bul țan țhat nan," a han tih zawm leh a.

'Aw' ti thei sela a duh kher mai. Bul țan țhat leh chu an mamawhin, an inkar boruak pawh a siamțha mai thei a ni. Mahse James a hnenah a lo aw diam tawh bawk si. "Ka thei lo vang tih ka hlau khawp mai," a ti ta zawk a.

"Engvangin maw? Min han hrilh teh China,ka hre ve ngei tur ani."

"James nen ei dun kan lo tum tawh ani," dul raih hian China chuan a han ti a.

"Ka hrethiam e," a aw chuan ngaihno a bei lo ta kher mai!

China chuan han sawifiah a,zan dangah te pawh a theih ang,tia han sawi a tum a,mahse bung vut hian Ben vek chuan, "Pathian hmingin,sawifiah a ngai lul lo mai," a ti hmak a,a chhuak nghal ta daih mai a.

An zanriah ei chu a tuihnai hle nain China chuan a ei tlem kher mai thung,a ril a țam lo tlat ani. Soup tlem a in ve tih mai loh chu,an mahni vilin a tho chhen ringawt a, mahse chu chu ei thei mang si lova țhut ve reng ai chuan nuam zawkin a hria ani.

A kawr dum hak,lunghlu leh rangkachaka cheimawi a hak chuan Olivia chu a tilang nalh lehzual hle a,a pasal awm ve pawh hre lo ang maiin Ben chu be bik deuh reng a. Ben a ngihsak a phutzia chu Ben a ep chiaha țhu China chuan mak alo ti hle a. Ben chu a nelawmin a hawihhawm hle na a,tilui a ang zawk mahin China chuan a hria a.

A nupui chetdan mawi lo tak lam pawha a rilru la peng hman lo lekin Charles leh China chu an lo ti ti tui ve hle a; sangha chanchin sawiin,Olivia țawng dengkhawng tak an hriat hma phei chuan an titi tui hle ani.

"Thawnthu ang mai lah ni - mahni rawih laite chaw han kilpui chuh! I rilru hi a zau lutuk ani, Ben my love."

An ngawi ta țhap a,China zak lutuk chu a sen ap ap bawk a, thla neiha thlawh chhuah daih hi a duh ber tawh ani. Ben chuan thildang daih ngaihtuah niawm tak hian a lo en reng a,a dawhkana thil thleng chu hria pawhin a lang lo.

"I lei kha veng țha rawh, Olivia!" hmai sen awp awp khawpa Charles an a rawn tih chu a ring duh kher mai.

Olivia chu za lem lo tak hian a nui hak a,a pasal lam chu hawiin, "Charles hi chuan a chan chhe lam apiang hi a țan zel mai țhin a ni," a ti duh lek a.

Charles hmai chu a sen nasa zual sauh a,thinrim insum tih hriat tak hian, "Ka hrilh nawn tawh lovang che Olivia," a rawn ti ve ta hmiah a.

"Oh, Charles, nuih i ti za em mai," Olivia chuan a han ti leh hram a.

China chuan a chaweina thirkut ken lai chu dawhkanah chuan a thlauh tawp a,kut khur hlak hlakin a ka chu a hup chawt a; a hmai te takte,zam hmel em em mai chu Ben chuan mit tizim san hian a rawn en a.

"Olivia, i room lamah kal mai la a țha ber ang," ban charh si, thupe aw tak bawk si hian Ben chuan a ti ta a.

Olivia lah chuan a rawn en vat a,a hmui sen hlar chuan a cho hmel kher mai! Mahse Ben hmel chu a rumin hnial hneh chi ni dawnin a hre ta lo va, Charles leh China chu rum zeta melh chung hian a chhuak ve ta a. Ri bur khawpin kawngkhar chu a rawn khar tau sawk a.

"Ben, sawi ngaihna pawh ka hre lo," China lam chu rawn hawi lehin, "Olivia nungchang mawi lo zeta ngaihdam dil mai loh chu," Charles chuan a ti ta vat a.

Charles hreawm ti hmel a hmuhin China chuan, "I thiamloh a ni hleinem," țhensak chung hian a lo ti a.

"Olivia tan coffee kensak la a țha ang," zaidam takin Ben chuan alo ti a.

Chu pindan chhuahsanna remchang a hmu chu a zuang tho ta vat a,a lawm hle a.

China chu a kun ngaih a, a coffee la sa țha tak chu a inlui ve hram hram a.

"China khawngaihthlakte, i zanriah tui tak chu a chhe leh ta," Ben chuan a ti a.

Tunah chuan a hmasa ber atan hmangaih a lo nei ve ta a,engtinnge a a sawi kha? Hmangaih neiha chan leh chu neih loh ai chuan a țha zawk! Ben chu a hloh a,mahse a damchhungin a hmangaih dawn a ni. Tunah tak hi chuan hloh leh chan lampang chu a rilruah a awm lo,a hlim ve em em ringawt mai ani. 'Ka rui a ni hial ang,' innuihzat rilru tak hian a han ti sap a, amah chauh chuan a nui hak a.

A hnu lawkah chuan dil kotlanga Ben a lo ding ve reng chu a va hmu ta thut a. Ani chuan thatchhiat hmel zet hian mei a lo petkawh a,a tuicheng lai chu a lo thlir reng niin! Ka â ta emaw a ti ngei ang,tun ang zana mahni chauha tuia chen a,han nuih tak hawk hawk chu, tiin a inngaihtuah a.

"Enge i rawn tih dawn?" tui beng per sak sak chung chuan a ham ti ngawt a.

"Huana ka leng velin i eng chhit hi ka hmu ani."

"Rawn cheng ve ta che."

"Mahni chauha awm i duh lo em ni?" nui chungin Ben chuan a han ti ve a.

"Duh hran lo ve,mahnia awm ka duh vanga kal ka ni hleinem,reilote han chen zawk ka duh vang mai ania,tui lah chu a lum nuam nasa mai si a," China chuan alo ti zung zung a.

Chutah rei pawh rial lovin Ben chu a rawn zuang lut ve ta a,tuichen thiam tak a niin, a taksa hrawlpui mai chu tuiah chuan a leu kual pawp pawp a.

"I hlim hmel hle mai," China bul a hleuh thlen chuan a han ti a.

China rilru chu a na zawk a, Ben a han en phei chuan a taksaa tui awm te chu lunghlu ang maiin an eng sar hlawm a. "Engmah ngaihtuah ka neih loh vangin ka hlim a ni," nui chung hian a lo ti ve mai a.

Ben chuan, "I vannei hle mai," amah en reng chung chuan a han ti a.Chutah awki hniam leh titak hmelpu zawk hian, "China, thu sawipui che ka duh a ni," a han ti leh a. China erawh chuan lehlam a lo hawisan vat thung a.

"Thutak viau teh suh - Ben, zanin chu ka tuar thei lovang," tih paha han kalsan mai hi a tum a. Mahse Ben chuan a banah manin, a lamah a pawt hnai ta sauh a.

"I tuar thei ngei ang."

"Ni lo."

"Anih leh min fawp rawh." A talchhuah theih loh nan Ben chuan a pawm bet tlat a,rilțam leh duhthawh zet chuan a fawp hmasa ta a,a kut chuan a taksa huh te chu a chul pah zel a. China pawh chuan insum thei bik lovin a lo kuah ve a,a fawp let ve ta a.

Mahse reiloteah China chu a inhre chhuak leh thut a, țan a han khawh leh hnuhnawh a.A rin loh deuhin Ben pawh chuan a kaltir ve leh ta mai a.

"Chuti lutuk chuan khirh viau reng teh suh Naute, i hmui khan min sawm tlat alawm. Naktukah Charles leh Olivia pawh an chhuak ang,helai an rawn tlawh chu tifuh an inti lo ngawtin ka ring; Olivia han tihdanah che khan Charles lahin hreawm a ti em em bawk si," a ti ta a.

"Engmah a pawi hleinem,i țhian a ni a,keimah avanga an chhuah chu ka duh lo asin," China chuan a lo ti vat a.

Ben chu a nui a, "Ka hria alawm, Charles tan chuan ngaihzawn i awl ngawt ang," a han ti ve a.

Hrethiam lo tih hriat tak hian China chu a meng phar ak a, "Ka hrethiam hauh lo mai," a han ti a.

"I hrethiam lo maw? Mipate i hipzia hi i inhre lo tak tak em ni?" Ben chuan alo ti hu a.

"Min nuihzat hle mai maw?" rilru na ang reng takin China chuan a han ti ve a.

"Oh, China, i inveng reng mai a," nui deuh chung hian a ti a. A hmai hliaha a sam rawn tla te chu a huihkian sak a, "Charles chuan a vawikhat ennaah che khan i hmelțhatna te,i ngilneihna te a hmu nghal vek a,a mit pawh a lasawn hleithei lo anih kha; ani tan chuan thlalera tui tlukin i hlu a ni," a ti ta duah a.

China chu a sen ap ap a, "I rilru a bawlhhlawh em mai," a aw control tum tak chung chuan a han ti bauh a.

"Chutiang a ni lo tih chu i hre chiang a ni, James a chanchin min han hrilh teh," aw pangngai tak hian a lo ti a.

An thusawi a thlak ta thut chu makti deuhin Ben a hmel chu a en a, James a chanchin hrilh tur reng a hre lo. A thinlung chu amah Ben a ngei chuan a luah vek si a.

"Ka ngaina khawp mai," a ti ta sap chauh a.

"Ngaina-! Thu i va han pehhel thiam awm ve mawle," awih lo tih hriat tak hian a han ti a. China chuan a ngei kher mai; a fimkhur thiam viau loh phei chuan amah a hmangaihna hi a sawi chhuahtir mai ang tih a hlau va,a fing ropui si.

"I lo inrawlhna tur anih pawh ka hre lo," a ti ta hmak a.

"I ring sual a nih chu,ka hna chu ka siam mai țhin. Min hrilh teh China,i mitmenga thil suangtuah nei tih hriat taka ka hmuh che hian James hi em ni i ngaihtuah țhin,nangmah chauhva i awm te hian?" a aw chu a hriamin a dar a vawnnate chu a hmer na zual sauh a.Chu October zan thla engah chuan thlifim a thaw heuh heuh a.

Chuti takin hriat a lo awlsam em ni? A hmangaih tih pawh hi a lo hre daih tawh ang a?

"Lo ni ta se, enge ni hmangaihna awmzia pawh i hre lo," a han ti ve sak a.

Ben chu a nui hawk hawk nain,ngaihthlatu tan chuan a hlimawm fahran lo hle a, "Thudik chu kan pawh ta nge nge maw? Ngaina tih ai chuan Hmangaih tih chu a dang deuh lo maw? I pawm zawng a ni em?"

A aw chu a changin,a thusawi chu a ngaisual tih a hria. James chu a hmangaih nia ngaiin,amah chu a in dah bo der ani.

"Min tina a nia," China chuan a han ti a. A dara a vawnna chu a na a tiin,a ruhte chu hmer tliah a tum ni hialin a hria a.

"Thah hial che ka duh a ni," Ben chuan a ti hmuk a,mahse a vawn chu a thlah ta tho va.

"Engvangin maw?" China chuan a ti ha a,a hlau deuh bawk a. "I â a ni," lu thing nar nar chung hian a han ti leh a.

"I ti dikin ka ring. Ti ta daih ila,naktuk hian ka kalbo dawn a,chawhnu lamah ka thlawk chhuak ang," Ben chuan a ti ta a.

A thu hriat chuan China chu a țhawng nasa kher mai a, a aw te chu a lai ta hial a.

"Kalbo i tum amaw - khawiah - engchen nge?"

"I va phu nasa ve! Min ngai hle dawn em ni China?" ngai thutak lo zet hian a lo tihsan mai a.

Chhiahhlawhin a pu a ngai ang maw? a harsa ngawt ang." A rilru tak a sawi chhuak ang tih hlauvin,fiamthua han chhan liam mai a tum ve na a,mahse a hlawhchhamin deusawhna lam a ang ta mah mah a.

A inhum khawng danah a thusawi chu a ngai haw hle tih a hriat mai a.Chiang zet hian a rawn en a, mahse engmah chu a sawi lo. Oh, chhuahsan lo tura ngen mai a va duh em! "I hna lam em ni?" a aw chu a zawiin a sin hle a.

"Ni e,i ngaihven ve anih chuan ka hrilh ang che,ka kalna tur chu Egypt ania. Tahchuan ram zau tak min zawrh a,lei ngei ka rilruk bawk,i lungawi tawk em?"

"I thang rei angem?"

"Thla khat emaw,a aia rei emaw pawh ni mai thei,engvanga min zawt nge i nih? Ka tukkhum lam hmuh chu i chak viau lawm ni? Nge ka kalbo hlana James nen in awmdan tur siamfel nghal i duh em ni zawk?" a ti a.

"Ka hriat duh chhan chu - phone chhan tur leh ei tur leh thildang."

"Lungngai suh,ka lo haw dawn chuan warning ka pe em em ang che, tichuan i bialpa pawh a lo insaseng hman anga, tin, phone lam kha chu ka kal hmain tihdan tur ka hnutchhiah dawn che nia," a ti a.Dil kotlang lam chu a pan ta nghal a.

China chu a chhing vang vang a,kal tir a duh lo ani. Hetia inrem lo taka an awm lai phei hi chuan. Ben a hming chu zawi te hian a lam sap a, Ben chu a rawn hawi let a, a hmel ngui tak chuan China thinlung chu a khawih hle nghe nghe a.

"Enge ni ta?" chang fal hian a rawn ti a.

"Engmah....! Min ngaidam rawh," a inher a. Ben a kal lohna lamah chuan a hleuh phei ta nghal a. An inkarah chuan thu inbat leh sawifel ngai a tam hle pawhin a hria ani. Ben nen chuan an sawifel hmasa ngei tur a ni. A awmna lam chu a va en a,a dak phei a,mahse, Ben reng hmuh tur a lo awm tawh si lo; a mittui chu a rawn far ta zawih zawih a.

A tuichen tawh hnu pawh chuan a rin ang rawk chuan a muhil thei ta mai chuang lo va,kar tam tak Ben a thangbo tur chuan a rilru a luah hneh lutuk a,awmngaihna pawh a hre lo hial ani. James a ngaizawng angin Ben khan a ngai a,nuihzatthlak zawk hle ten a hria a. Buai deuh nuaih chung chuan a muhil ve thei ta hram a.

Sana chiri vang vang chuan China chu dar sarihah a kaitho ta a,a nun chu a nguaiin,a inbual pawh chuan a tiharh hleithei chuang lo.A inchei peih hnu chuan choka lam chu a pan a,nizan lama a lo rem sa,Tray pahnih leh Ben a coffee tur leh a mikhual Olivia Charles a coffee turte nen chuan a siam a. Tray chu fimkhur tak chungin a chawi a, Fortune chu huan lamah a chhuah ve ta nghal a.

A coffee nghah chhung chuan a sam chu a țawn malh malh a,a jeans kekawr hlui lam tawh leh a sweater kawr da lam tawh chu a en vang vang a; mahse nalh zawka inchei pawh a engto thei tawh lo, Ben a kalbo ni tir a ni tawh miau si a.

Coffee chu jug pahniha dahin Olivia te nupa chu pek hmasak a tum a.

A Tray chu fimkhur taka chawi lehin inchung lam chu a pan ta a. Ben a room zawn a thlen phei chuan thawm a dim lehzual a; Ben a kawngkhar chu a inhawng a,a beisei loh lutukin pindan chhung ațang chuan Olivia Daniel ngei mai chu a rawn lang ta hlawl mai a,a rawn hmuh tirh chuan makti hmel a pu nain,a reilo kher mai. Hnehtu chanchang inti hmel fahran hian a nui deuh sawng a. "Ah, coffee......" tih pahin China kut ațang chuan a la a,lawmthu pawh sawi der eih lovin ama pindan lamah chuan a luhpui ta nghal hmiah a.

China chu damlo na tak ang mai hian a petek nghal dawrh a,thil awmdan chu hai rual a ni lo. Olivia Daniel chu Ben nen an riak dun a ni chiang mai! An piah lawkah a pasal ngei amah chauhva a mut laiin China in a lo rinhlelh rilruk ang ngeiin an inngaizawng chiang a lo ani.China chu a pum mai chuan a khur ta hlawk hlawk a.

Engtinnge nizanah te khan khatianga phur leh duhthawh tak khan a lo fawh theih? A bialnu nen an riakdun dawn tih hre reng chung lehnghalin?

Mittui nen China chu inhnuai lamah a tlan thla leh dawr dawr a,a thinlung chu a na ngawih ngawih a,heti khawpa khawngaihna nei lo mihring hi engtinnge a lo hmangaih mai theih?


                          Chapter - 7


Karthum hnuah chuan Athens thlawhna țumhmunah China chu a lo chhuak zan zan a, passengers dangte nen chuan Airport building lam chu an pan ho va.

James hmuh mai tum chuan a hawi vel ruai a,mahse a hmu mai ta hauh lo. Vawiina a lo thlen tur hi a theihnghilh em lovang chu maw a ti rilru nauh nauh a. Mahse passport endikna hmunlam a pan lai chuan James chu ava hmu ta a,a hmuh veleh chuan hlim takin a rawn nui var var a; China pawh chuan a lehkhate an endik a,an kaltir leh hnu chuan hlim takin a va pan a. James hlim hmel chuan a tihahdam sawng sawng a.

"I la hre reng maw?" nui hawk hawk chungin China chuan a han ti a.

"Aw, tehreng mai," tih pahin a biangah chuan a fawp zauh a, "I cher hle mai," a han tih zawm leh a.

"Min hmusual a nih chu," tiin a lo pha zaih a. Mahse tun ni reilote ațang khan a rihna a tlahniam hle tih chu a inhre ve reng a ni.

James chuan a dar a san ak a, "I thawmhna kha ka lo keng ange,tichuan Hotel chu ka entir dawn che nia," tih pahin China suitcase pahnih chu a khai ta a. Sport Car var inhawngsa lam chu a panpui a,a dahfel hnu chuan passenger țhutna lamah chuan hruai leh a,han chhaih fiam vel pawh a tum chuang lo.

"I țha maw James?" China chuan a ti a. Tunah chuan Airport building tlanpelin,kawngpuiah an tlan leh tawh a.

"Țha e,tunhma ai chuan țha chuang lo.Thu hrilh tur che ka nei asin - Ngaihzawng ka nei a...." hlim hmel tak hian a han ti a.China pawh chuan rawn en zawk pahin a kiai ve sak a.

China chuan mak a ti deuh nain, a lawmpui em em a, "Ka lawmpui hle mai che,ka hriat mi a ni angem? Greek mi em ni James?"

James chuan a lu a thing a, "Ni lo, Greek mi chu a ni lo,i hre mai thei ani,mahse tunah chuan ka hrilh vek thei lovang che. China,ka hrilh theih zawng che chu a hmelțha em em a,nang pawhin i ngaina ve em em ang tih hi a ni mai," a ti a.

"Ka ngaina ve ngei ang tih ka ring,tunah rih chuan ka dilchhut lo mai a ni ang chu; engtikah nge min hmuhtir theih ang?"

"Ka hre lo,a rei lo vang," tiin James chuan a lo chhang a.

"I lo țuanrang hle mai maw?" melh relh pahin China chuan a han ti a.

"Chutiangin min dawpchhuak mai mai lovang," nui hawk hawk chungin James chuan a lo ti ve a.

"Tu hnenah mah ka la sawi lova,i bulah ka la sawi mai mai chauh a nih chu. Nang engtinnge i awm zawk,i țha em? Kan inhmuh hnuhnun ber ațang khan thil awmdan engkim min han hrilh teh,engvanga dang leh cher em em nge i nih?"

A chhan theih loh tur thil tam tak a zawt a ni. "Ka țha e, han sawi vak tur thil engmah ka chungah thleng lo. Tin, ka cher leh dan thu min hrilh avang pawhin ka lawm e," rilru na ang reng tak chung chuan a ti ve ta bauh a.

"A pawi hle mai Love, ka ngaihtuah em che a ni. Engtinnge Ben kha?"

Ben a hming han lamrik mai pawh chuan a thinlung a tina a, "Ka hmu bik lo,a țha ang ka ring; Egypt ah a awm daih a...." a ti zung zung ringawt a.

"Engtinnge a ngaih i hna bansan chu?" aw pangngai tak hian a lo ti leh a.

China chu a sen ap ap a, James an a hmalam chauh a en chu a lawm rilru hle a.

"A lawm lo khawp mai,mahse tihtheih dang nei si hek lo," China chuan a ti ta ringawt a. Mahse Ben chuan a hna a bansan thu hi ala hre kher lo ang, James a han hrilh chu a tum bik lem lo a.A lehkha hnutchhiah kha a hmuh hunah a la hre tho dawn a.

Athen khaw chhung laili an thlen chuan kawngpui te deuh zawkah an peng a,kawngsira thingphun tlar țhut chu tlanpel zelin,reiloteah an ding ta a.

"Hei hi ania," tiin James chu a zuang chhuak a, China zawn kawngkhar chu a rawn hawnsak a.Hotel laihawl vel,changkang tak leh nawm hmel tak kawtah chuan an ding a. A hualvel chuan huan,nihliap lianpui pui zar leh a hnuaia chair inhung khapte hi a awm zel a.

James chuan a banah kaiin,inchhung lamah chuan a luhpui a, "A vai hian rawng kan hnawih țhain kan chei țha vek ani," chhuang hmel tak hian a han ti a. China pawhin nuam a ti hle nghe nghe a.

Mahse China chu a lo kalna khawlum nen,a chauvin a tuite a hal riau mai a,mahse James chu a hlimin a phur nasa si a,a sawichhuak hreh deuha ni.

Mahse a hmel a rawn en chuan a awmdan chu James chuan a rawn hrethiam ta a ni ang,a chal chu James chuan a han beng tlauh tlauh a, "Aw Pathian,ka chhaw lutuk! i tui a hal dawn tehreng nen,kei lah chuan țhu hman pawhin ka siam si lo che a!" pawiti tih hriat tak hian a han ti ta hluai a.

Inchung berah chuan hruaiin,țhutchawlhna pindan nuam zetah chuan an țhu chawl ta a.

"Enge i duh ang?" tiin a han zawt a.

"Khawngaihin thingpui leh sandwich min pe ta che," China chuan a lo ti ve vat a. Tukverh lam a pan lai te chuan a pum chu a ri raih raih a.

"I sawi te chu thupek tluk alawm,ka thang rei lovang,i in ang chiahin ngai rawh," China in a chhan ve hma chuan a chhuak a,a nui ta sak a.Ben nen chuan inang lo a ti kher mai.

Tukverha a dah lai chuan a chung zawnah thlawhna hi thawm ring zetin a lo thlawk a,khawchhung lamah a thlawk lut zel a. A en reng lai chuan China chuan mal riauva inhriatna hi a nei leh t thut a,enge hetah hian ka tih? tiin a inzawt a. Heng thleng thleng hian Ben a tlnchhiatsan tuma kal em ni a nih?

A inngaihtuah ding lutuk hman hmaa James a lo lut leh hman hlauh chu a lawm zawk kher mai. Ben a ngaihtuahna chuan a rilțamna hnawt hle mahse,thingpui leh sandwich chu a in lui hram hram a.

"Henglai hmun hmu tura Holiday i rawn hmang duh chu lawmawm ka ti kher mai,i rilru i siamfel hma chu i awm ve rih dawn nia," thingpui han thlitsak leh pah chuan a ti a.

"Kei tak ania,ka hmu leh thei che hi ka lawm tak tak a ni. Engtikahnge i haw leh theih ang," China chuan a lo ti ve sauh sauh a.

"Thlakhat hnuah chuan kan haw leh thei mai ang. Ka partner Paul kha State ah a awm rih a,karhnih hnuah a lo haw theih ka ring a; tichuan kan pahnihin karhnih vel endik lehna hun kan nei bawk anga,nang pawhin i rilru siam fel nan hun tam tak i nei a nih chu," James chuan a ti a.

China chu a nui sak a,Helaia hnathawhna awm thei chu a țha mai thei a ni,mahse thutlukna han siam nghal mai chu țhain a hre rih lo va. Muangchangin a thova, "James,reilo deuh han chawlh rih rem i tih chuan ka zinnaah ka chau deuh riau mai," a ti ta a.

James chu a bu nghat a,a tho ve ta nghal a, "I pindan tur ka entir ang che," tiin a pindan tur ruatsak lamah chuan a hruai ta a. Zanriah ei huna hmuh leh intiamin a kalsan ta rih a.

China chuan a bedroom a pan nghal a,tuivawtin a inbual a,harh phah sawng sawngin a inhria a. England a a awm lai kha chuan vawt tiin a khur lo chauh kha a ni si a. Khuma muzal chung chuan Aspenmere Hall lam chu a ngaihtuah leh ta vang vang a.

Ben a pindan ațanga Olivia lo chhuak a hmuh ațang kha chuan awmreng thei a ni lo tih a inhre nghal a,tichuan coat a hmuh hmasak ber chu la in,ramhuaiin an rawn um ta emaw tih tur khawpa chakin in chu a chhuahsan ta vang vang a.

Huan chhungah chuan lutin,thing sang pui karah chuan a ding a,a mittui chu dan rual lohvin a far nghal zung zung a. A rilru na lutuk chu thi thei dawn hialin a inhria a,darkar tam tak thing bulah chuan țhuin a inngaihtuah nauh nauh a,hun lam reng a ngaihtuah chang lo. Chhum a rawn zin tak chuai chuai ah chuan hreh zet chungin a haw ve leh ta a.


Egypt a Ben a zin hma:
-------------------------------------

Ben an a lo hmuh chuan a thinrim kher mai; dar sawm pahnih a pel tawhin, Olivia leh Charles pawh an lo haw tawh a. "Khawiahnge i tawmbo daih?" thinrim zetin China khur zaih zaih chu a en reng a.

China chuan, "Ka chhuak zawk," ti chauhvin a chhang ve mai a.

"Ka mamawh huna heta awm hian hlawh pek i ni, Mrs Stephenson lo kal hlauh lo phei sela chuan....."hachang țhial rawp rawpin Ben chuan a han ti leh a.

"I lungawi lo a nih chuan engatinge min ban mai loh?" China chuan alo ti ve hmak a.

A banah chuan a rawn vuan a,a.pangti vawt thler mai a han khawih chuan, "Engatinge,i dam lo em ni?" a ti a.

"I hmel hian min ti dam lo a ni. Engatinge min kalsan mai loh? Chhuak tura min duh chuan ka chhuak ang,i rilru siam fel vat rawh," China chuan a ti hmak a.

Ben pawh chuan a vawn chu a thlah a,engmah a zawt chhuak dawn chuang lo tih a inhria pawh a ni mahna. China chu a roomah a inkalh hnan ta hmiah a.

Tun thleng hian mahni țhianțha ber te nupui mutpui duh turin Ben chu ala ring thei lo. Mahse mipa dang Signor Cencelli te ang lek a lo ni.Mi danglam tak turah a lo ngaiin,engtik niah emaw chuan a hmangaih ve te pawh a lo beisei ve kha ani a. Nuihzatthlakin!

Airport a a kal hmain Ben chu a hmu zawk a,a pindana a tawmbo reng chuan a rilru thlakin a kalbo leh lo mai ang tih a hlau a ni; a dam lo pawh chu a thil ei dik loh vang mai mai anih a rinthute a hrilh a.

Ben pawh chuan a lo awihsak ve mai a. Tihtur te hrilhin rawn phone pawh a tiam a. China chuan nui chungin a be bawrh bawrh a,a pangngai zia lantir chu a tum ber a. Mahse a hmu leh dawn tawh lo tih hriain a thinlung chu a na takzet a,a rum chhuak lo chauh a ni. A chhan chu Egypt ațanga Ben lo kir leh hun chuan he Aspenmere Hall a lo awm hi a tum tawh lo a ni.

Ben chuan pawma fawh a duh tih a hria,mahse tawh hlek pawh a tum tawh si lo. Ben a hmui chu a chip hmak a,an inbiakna pawh a tawiin a bung thei hle a. Tichuan thinrim tih hriat zet hian a kalsan ta a. A car tlan liam tur a han hmuh phei chuan China chuan a thinlung chu kehsawm hialin a hria a; James nena zanriah eitur pawh chu a țhulh a,khumah a mu nileng ta ringawt a ni.

Aspenmere Hall chhuahsan pawh a rin loh takin a awlsam hle a,Ben a kal hnu lawkah James chu Athens ah a kal ve a,China chuan a phone nghal a; hman deuhva hna a sawi hmuh kha engtinnge tih a zawt a ni. James chuan hlim tak leh engmah pawh zawt buai si se lovin,chawlh hman paha enthlithlai turin a lo sawm zui nghal mai a.

A bungraw neih ang ang te chu tel felin,a thilneih țhenkhat leh Fortune chu a lo kir leh hma atan lo enkawl rih turin Mrs Stephenson kutah chuan a dah a. Aspenmere Hall hi a lo ngaina hmanin,sulhnu engmah hnutchhiah nei lova a chhaahsan ngawt tur chuan a tilungngai ve hial reng a ni.

Ben awm loh hlana lo chhuah daih mai pawh chu dawihzep thlak hlein a hre na a,mahse ti lo thei niin a inhre tawh si lo. Ben a hmangaihna chuan amah pawh a tihlau a ni. Ani lah chuan a hmangaih lova,Olivia Daniel a hmangaih zawk a ni si a. Hetiang reng chunga in khata awm a,nitina inhmuh chu a thei lo a ni. Mahse tuna Athen a a awm hnu pawh hian,mel sang tam dan nimahse theihnghilh hmak zawng a har a ni.

Chaw chu chak lo teh mahse, James a zah vang chauhin zanriah eitur chuan a inthlak a,kawr hringdal leh a chawih tur tak jacket a ha a,a sam chu athlah tawp ringawt a,a bek tawn tawnah hian sang deuh vahin a kilh bet a.

Chumi tlai boruak chu a lum nuamin,tukverha a va dah chuan chu khawpui chu a che țan ve dawn chauh emaw tih mai turin mihring chu an phu nuaih nuaih a, "Helaiah zawng nun pawh a hlimawm deuh vang chu," a ti sap a.

James nen chuan lift ah an intawk a,khawpui chhung Restaurant lam panin zanriah chu an va ei ta a. An coffee chu a tui hle bawk mai.

A hmaa a rilțam loh aiin China chuan a ei hnem zek a,ouzo an in chuan a pui deuh pawh a ni maithei.James lah chuan tihnuih a tum deuh reng mai a,ouzo chu a thlum tui em avangin a chak tir zia lam pawh China chuan a ngaihtuah lovin a in ve hmiah mai a. Mahse James a thusawiin a nuih a tihzat tak em zel avang chuan rui khawpin a in a ni tih a inhre chhuak ta chauh a.

James chuan Hotel a plan dan vel chu phur takin a sawi bawrh bawrh a, China chuan ngun takin a lo ngaihthla ve thung bawk a.

"Hna chu lo thawk dawn ta ni ila a eng ber nge ka thawh ang?" a lo ti a; Athen a hnathawh chu a phur ve sawt hle a.

James chu a nui hak hak a, "zawh awm tak ani,hnathawh tur chu a tam ang; Secretary han lam te, Supervisor hna te,booking te leh hotel enkawlna lam thil zawng zawngte a huam vek ang," a ti a.

"Hna pui tak a nih dawn chu" alo ti a,a coffee chu tui ti takin a inkhalh khalh a.

"Aw ni e,bul țan tur ka nih avangin,thawhrim pawh a ngai hle ang a,mahse hlawh țha tak pek i niin,chhawng chung bera appartment pakhat khi i luah nghal ang a. Mi taima tak,ka rin ngam tuemaw ka mamawh a,nang ang țhian țha tak hi ka mamawh tak pawh a ni," nelawm taka nui chung hian a ti a.

"Ngun takin ka lo inngaihtuah ange," tiin China chuan a tiam a,a thawh chi tak ni dawn pawhin a hria a. Buai taka a awm chuan Ben ngaihtuahna hun pawh a nei lo thei deuh zawk ang a,chu tak chu a mamawh a ni si a. Engvanga chu hna chu la pawm mai lo nge a nih zawk?

An haw veleh chuan a mu nghal hmiah a,a mu fel hman chauh tih ah chuan tui em em maiin a muhil nghal bawrh bawrh mai a. A manga motor thawm ring tak a hriat chuan zingah a kaiharh ta chauh a.

Pawn lama thawm ri nuaih nuaih a hriat chuan mak a tiin a ngaihna a hre lo hle mai a. Ben a inah kha chuan thawm a rehin,zinga an thawm hriat ve pawh sava hram nak nak leh thinghnah ri sung sung te an ni mai si a.

Thawh pawh tum chuang lovin khumah chuan a mu meng kar reng a. Nizana a mumang chuan a rilru a luah hnehin Ben a hlir mai chu a lo hmu a,a hmu reng mai dawn ava nih mai hmel ve!

A han maimitchhin leh chuan a mitthlaah Ben chu chiang takin a lo lang a,a hmel paa tak, meng de sar mai te,a kareh kual mawi tak, athinrim changa han chip leh hmak țhinte kha - â,a taksa pum mai chuan......! Ben hming chu a lam sep sep a,lukhamah a hmai chu a phum ta ringawt a.

A tawpah chuan a tho ta nge nge a,a inbual leh phawt a,coffee in turin a chhuak ta a,make up pawh a hmang buai vel peih si se tawh lo.

A lo thlen tirha an țhutnaah khan James chuan breakfast ei chungin phone ah mi a lo be mek a. A rawn hmuh veleh chuan zaizirin a bula tray chu a lo kawhhmuh a,a mi biak chu a be pah reng tho va.

China chuan coffee chu a inthlit ve nghal a. A in zawh chuan bowl a theite chu lain chemte chuan a vel malh malh a. James pawh chuan phone chu dahin a rawn nuih sak a, "Nizan i mu țha em?" tiin coffee chu a rawn thli leh a.

"Umn,ka mu hlum lo chauh mawle, ouzo kan in vang kha a nih ka ring," nui hak hak chung hian a lo ti ve a. James hmel hlim reng chu hmuh hahdamthlak a tiin,chutiang țhian a nei hlauh chu a lawm ru veng veng mai a ni.

"Vawiinah enge i tih ang?" a theite ei lai en reng chungin James chuan a han ti a.

"Ka hre lo,ka lo ngaihtuah lem lo va,hetah hian lo puih theihna che ka nei ang em?" tiin a ngilneihna chu rulh ve theih a duh hle a.

"Chawlh hmang i nih kha," nui chungin James chuan a han ti hak hak a.

"Ka hria alawm,mahse ka theihna zawngah chuan ka pui hreh......"

"Awle,dik tak chuan lehkha sawmthum vel chhut ngai ka nei a,dar sawm hian Assistant Interview tur ka nei bawk a; tin,........"

"A tawk, a tawk, ka hrethiam e; puih che chu ka chak zawng tak alawm," James a inthiam lo hmel chu nuih var var chungin China chuan alo ti ve vat a.

James pawh chuan lawm hmel tak chungin type writer leh a țul tur thildangte chu an rawn chhawp chhuak ta nghal a. A hnathawhna tur chu Ni chuan a rawn chhun raih mai nghe nghe a.

A thawh tak tak hmain coffee a han in thlit leh tete phawt a,in pah chuan a hnuaia Hotel swimming pool mihang pahnihin an tikhat lai chu a en a. Hnathawk reng chung chuan a chang leh an zai dun a,a chang leh inhau niawm takin an rawl an rin leh hluai țhin a. Chutah China chu rawn hmuin, Greek țawnga chiar nawk nawk chung hian an kutin an rawn hui a; chuveleh China pawh chuan hnathawh a hun tih hriain a kalsawn ve ta nghal a.

Chhun chaw ei hun chuan James chuan a rawn hruai chhuak leh a; thawmhnaw nalh tak tak leh lunghlu an zawrh tiar tuar te chu makti takin China chuan a thlir a,han awh em em chu a nei hran lo nain, hmuh nuam a ti ve hle ani.

Nite chu a lo ral zel a,karkhat lai Athenah chuan alo awm ve reng ta mai a. A rilru pawh a nghet ve țanin a nundan pangngai thlak chu a mamawh tak ni pawhin a hria a. Dan pangngaiin James an hna a neih chuan chawhma lamah a pui ziah a,chawhnu lamah erawh hun a neih chuan Beach velah te a inpho ve țhin a. A chang chuan dawrte fang kualin, khawpuiah chuan intihtlangnel a tum pah ve ani.

Chawhnu vawikhat chu kawtthlera a kal laiin Ben a hmu tlat hian a inhria a, mahse Ni a sat em avangin a mitvai emaw, Ben a ang tak mi tuemaw a hmu a nih a ring ta zawk a.

Chupa chu motor kian hun nghakin kea kalna tura an siamah chuan a ding a; amah pawh a palianin Ben a hak țhin ang suit rawng thim lam deuh a ha ve in,a sam pawh a dum ve chiah bawk a.

Ben a a lo nih hlauh takin tih thuah China chuan a va pan hnai a,a thaw te chu a rangin a mumal lo nghal nuaih a. Mahse a rawn lehhawi meuh chuan Ben a awzawng a lo ni lo va; an hmaifang pawh a inang lovin, Ben a anga ngaihnobeina reng a nei bawk lo.

Rilru hnual rawih chungin chupa chu a kalpel leh ta a,chupa chuan a rawn en duh hle tih pawh a hre hauh lo. Chu thil chuan a thin a tițhawngin,Ben a a thlauhthlak theih loh zia chu a ngaihtuah zui neuh neuh a.

Tuk khat chu breakfast ei tura James a pan laiin Bena chanchin a hre ta a. Coffee inthlita James a hmaa țhuthmun a rem lai chuan mitmeng danglam deuh hian James chuan a lo en reng a.

"Tukin chu i inhmuam up hle mai,chanchin țha lo i hria chu a ni em lovang chu maw?" nui chung hian a han ti a.

"Ni lo ve,chutiang lam a ni lo. Tukin khan Ben an min rawn phone a," țhen deuh sak chung hian a ti ta a. A sawi dan chu a pangngai hle nain China tan chuan bomb thlak tluk zetin a ring a,a coffee in lai pawh chu a hak țhelhin,kut khur dar dar chungin a no chu dawhkanah chuan a nghat a.

"Egypt ațangin maw?"

"Ni lo, England ah a lo kir leh tawh,i awmna chin a hriat loh avangin a â țhelh ani. Tichuan keiin heta i awm thu ka lo hrilh a,pawi i ti lovang chu maw?"

"Ti lo,pawi ka ti lo," China chuan a ti ve sap a.

James chuan a endan pangngai khan a lo la en reng a, China chu a thaw halh a, James lo ngawichawi viau pawh a chhan hre tain a inhria a.

"Thudik tak ka lo hrilh lo che a,pawi ka ti khawp mai,mahse Aspenmere Hall chhuahsan kha thil hreawm tak a nih avangin mittui seng lo chuan ka sawi thei tlat lo a ni," a hriatthiam beisei tak chuan a ti ta a.

James chuan akut chu a vawn sak a, "Ka hrethiamin ka hria China, i hmangaih a ni tiraw?" a ti ta phawng mai a. China mengphawk tak a hmuh chuan a nui sak a, "Nia rawn hmu tur che a zinga ka lo kal pawh khan ka hre tawh a,kei chuan i lakah awmzia ka nei lo tih pawh ka hria a ni. Mahse min rawn phone a, i awmna min han zawh meuh chuan min tiphu chiang kher mai." a ti a.

China chu a ngawi reng a, Ben a duhna a lo tilang viau chuan a tihamhaih zawk hle a. Chutiang taka a lo ngaihven pawh chu awih harsa a ti a, James chuan a uar deuh mah mah a nih pawh a ring deuh rum rum a.

"Engtinnge a awm?" tiin rilru na tak chung chuan James chu a han zawt leh bauh a.

James chu a țhen sak a, "Nidang ang bawk. Egypt a ahna chu rin aiin a tifel hma thei a,a aw ațang chuan lawm awm phei chuan a lang lo; Ben hi chu mi danglam tak a ni a,chu chu nang pawhin i hria anga?" a han ti a.

China chu a lo bu ve nghat a, "In in pawh em?" a chanchin chu hriat zawm zel chak tak hian a lo ti zauh a. Hun rei tak a hmu tawh lovin,a hming lam rik pawh a hre ngai tawh lova, James an a han sawi chhuah leh takah chuan hriat chaknain a khat leh ta a ni.

"Kan naupan lai chuan inpawh tehreng mai,mahse Ben hi chu mahnia khawsak ngaina mi a niin, hriatchian pawh a harsa,mi chak tlemte zinga mi angin.University kan chhuah ațangin kan kawngzawh a hrang nghal a; Ben chuan khawvel hmun hrang hrang a tlawh kualin,kumthum zet kan inhmu lo va - A, kan inpawh lutuk lo a nih ka ring zawk. Engatinge?"

"In danglam em a,mak ka ti deuh mai ania,"China chuan a lo ti ve mai a.

"Lawm tur anih leh nih loh pawh ka hre lo ve," James chuan a tisap a. A tho va,a sana an en chuan, "Tun minute sawm chhung hian mi hmuh tur ka nei a,ka thlawhchhuah a ngai hial tawh ang," a ti ta hluai a.

A jacket leh car chahbi a lak lai chuan, "Vawiina lo tihsak tur che a awm em?" China chuan a lo ti a.

James chu a han inngaihtuah zawk a, "Ka hre mai lo,tukin zing chu lo awl mai rawh,i phu tawk bawk a,Holiday hmanglai i ni bawk nen," kiai sak chung chuan a han ti a,a chhuak ta nghal a.

China chuan muangchangin breakfast chu a ei zawm a,dawr vela len kual mai mai a rilruk ta a. Nidanga a phur țhin tehlul nen,tukin chu a khua a har ru riau a, Ben a chanchin an sawi vak khan a tinguai anih a ring ta ber a.

Darkar khat leh a chanve hnuah chuan Hotel chu a chhuahsan leh ta a; James a kekawr jean leh T shirt pawl ban bul tai mai chu a ha a, a bag chu a darah bat liamin ala fan loh lam khawpui chhung chu a pan leh ta a.

A tih ber sawi tur bik pawh awm lem lo chuan zing lam hun chu hlim ang reng tak chuan a hmang zo ve leh ta mai a. Kawtthler chu a lunin a bengchheng hle a,hnathawk tura an vei suau suau te chu hmuhnawm ti tak hian a lo thlir reng a.

Chawhnu lamah chuan a chauvin, lum a ti tawh hle a,kawngsir maia cafe ah chuan a lut a; chair ah chuan a țhu hnawk a,a ke kham ut ut pawh chu reiloteah areh ta huai huai a.

Sandwich leh theitui vawt tak a han chah a,palian takin a dawhkan lam a rawn pan pawh chu a lo hmu lo reng reng a. Chupa chuan a bul arawn thlen chuan aen vung vung a, "Rawn zawm ve che ila pawi i ti angem?" aw thum takin a rawn tih takah chuan China tan chuan hai chi rual a ni ta lo. A rawn dak chhuak a,chutah khawvela hmuh a lo inbeisei loh ber mai Ben Galloway chu a hmu ta tlat mai le!

                           Chapter - 8


Chutihlaia a thidang mai lo chu China chuan mak a inti hial zawk a,a sandwich ei lai chu thlauhvin dawhkan chu a hmer ta ngawt ngawt ringawt a.

A chhanna pawh nghak chuang lovin Ben chuan chair dang chu a pawt hnai ve nghal a,waiter lo kal hnenah chuan coffee a chah nghal bawk a. China chuan thinphu dawt dawt chungin a lo en ran a.

"Thlarau hmu ni awm tak ini!" China hmel dang del mai en reng chungin Ben chuan a han ti leh tawng a.

"Engtinnge.....engtikahnge i lo thlen?" makti tih hriat ngawih ngawihin China chuan a han ti ve ta sap sap a. Ben hmel chu a lang pawrin,mu țha thei vak lo hi a ang hle lehnghal a.

"Tukin zing khan ka lo thleng," awlsam deuh hian a lo ti ve mai a.

"Engvangin maw?" China chuan a lo ti vat a. A hmel a hmuh leh meuh phei chuan a duhawmzia leh ngaihawmzia chu a hre thar lehin,a hmangaih ve dawn lo tih inhre mahse ani hi chuan a hmangaih lo thei lo a ni.

James rawn hmu tur leh Hotel hmu ve turin, ka chan ve tur rawn enfiah turin a ni mai ang chu."

Nangmah hmu tura lo kal ka ni han ti mai sela! Thil awm lo lutuk chu a ni. Mahse a chhanna chuan a rilru a tina si a.

"Enge ni 'ka chan ve tur' i tih awmzia chu,Hotel hi James leh Paul te ta a ni si a?" tiin China chuan a han zawt leh hau a. Khatiang hrep hnua țawngkam pangngai taka an han inbe leh thei chu mak a ti zawk hle a,an in zawmna chah tawh zia lantirtu ni zawk awm hialin a hria a ni.

"James an a chanchin zawng zawng a hrilh lo che em ni?"

"Chanchin a?"

"Ni e, he Hotel senso tur hi ka pawisa ka puktir a,chuvangin za a sawmhnih leh panga hi chu ka chan ve tur a ni," a lo ti mai si a. Mak a tih em avangin China chuan chhan leh ngaihna pawh a hre mai lova; engatinge James pawh chu a lo hrilh tel ve loh ni? Ben bawk chuan, "I hre lo em ni?" a rawn ti leh a.

China chuan a lu a lo thing mai a. An han ngawih leh deuh hnuah Ben chuan, "Engvanga min tlanbo san mai nge i nih?" thinrim thar leh ta ang mai hian a rawn ti thut ta mai a.

"Lehkha in ka sawi vek tawh kha."

"Kha lehkha tenawm zet khan engmah min hrilh lo."

A țawngkam chuan China chu a deng na kher mai! naupang chhia ang maiin hlauhna chuan a rawn man leh țan ta a. A tihnat tluk zeta han tihnat let ve chu a chak ta a. "A langtlang chiang ngawt ang," a han ti ve leh hmak a.

"Eng chu maw? Pathian hmingin eng chu nge langtlang chiang tur chu?" a han ti leh tuar a,an bula mite chuan an en duh hle tih lam pawh a ngaihtuah lo.

"Min tihțhaih chu tum duh ting suh,a sawt chuang lovang," vawt raihin China chuan a ti ta a. A tho va, "Min lo hrethiam la....." a han ti zui sap a.

A kal pah chuan rin ai daiha a inthunun thei chu a lawm rilru hle a. Oh, hremhmunah liam daih rawh se,tia anchhia lawh rilru chung chuan kalna tur bik pawh hre chuang lovin a kal hmak hmak a; a mitmu lian takah chuan mittui a tling piau a. Engvanga lo kal kher nge a nih? Aspenmere Hall kalsan chu alo har ngang a nih hi.

Kawng kan tura motor a nghah lai chuan a bulah car dum phek duai hi a rawn ding chawt a; Ben chu lo chhuakin Passenger țhutna kawngkhar chu a hawng nghal a.

"Lut rawh!" a aw chu a nelawm loh kher mai.

"Hremhmunah kal rawh," tih nghauh pahin China chuan lehlam a hawi daih thung a.

"Lut rawh China, tunah," Ben chuan a han ti leh țhawt a,a luh ve mai loh chuan engtin emaw tak a ti duh ang tih a aw ațang chuan a ring ta a.Chutah Bena sirah chuan a lut ve ta nge nge a,a kawngkhar chu a khar tau țhuai a.

Ngawi rengin Ben a a ngeizia tihlan nan a hlat thei tur ber chuan a țhu a, Ben chuan a rawn en ve zawk na a,mahse engmah a sawi tawh lo. Motor tlan nguah nguah karah a car dum lian zet chu hnehsawh zet hian a khalh pur pur a.

A tawpah chuan kawng reh lai takah car chu a ding ta hlawl a, Ben chu a en vat a,ani lah chuan hmalam chu a lo en vung vung mai si a.

Muangchangin Ben chuan sikret tlawn hnih a han țan a,pakhat chu a rawn pe ve a; a chezia chuan China chu a tithinur kher mai. Engtia sikret a duh han ring eingawt nge maw a nih? Lak a, tukverha paihchhuah daih mai chu a duh a,mahse a kut khur thup nan leh naupanchhiatthlak em a a hriat avangin a insum leh hram zawk a.

"Tumahin.....nang ang hian min la tithinur ngai lo,i tum loh thil pawh ni se," a ti ta nghut a.

"Chu zawng nangma mimal thil a nih chu," pawiti awm lo fe hian a han ti ve nghauh a.

"Nang pawh i tel a ni," rawn en run chungin Ben chuan a han ti leh a.

"Ben, engatinge kan intihbuai reng?" China chuan a ti ta ringawt a, Ben a nunrawnna chuan a tihah hluah hluah tawh a ni.

"Engahnge kawngkhar ka pel fel chauh tihin min tlansan daih mai?"

Thudik han hrilh nghal phawng mai chu a duh hle nain, a huaisenna chuan a tlin ngang si lo va, "Ka awm thei tawh ngang lo a ni, James an hna....."

China sawi mek mek lai chuan, "James a teivet hi,a lo inrawlh ve ziah mai - ni lawm ni?" a lo ti hmuk a,a sikret ken chu a paih nghal daih a.

An inbiakna chu a tawp chu a ni leh ta der a. China chuan a nghenchhan chu a ngheng ar ar a, Ben a a hmangaih thu a sawi chhuak lo thei chu a lawm hle a ni.

Minute sawmhnih hnuah chuan a chenna Hotel kawtah Car chu a ding leh ta a. Ben an engmah a sawi hman hmain China chu a zuang chhuak vat a,inchhungah chuan a lut ta vat a. A room ah lut nghalin a țap ta zawih zawih a.

A mittui tla tur a awm loh thleng rakin a țap a,Ben a a hmangaihna chu la pung deuh deuh te chuan a la hre ta lehnghal a.Darkar khat lwh a chanve hnuah chuan a kawchhung so but but a a hriat pawh ziaawm ta deuhin a inhria a,mahse a nat hian a na vawng vawng thung a ni. Bathroom darthlalanga a hmel a va en chuan a mitte chu a buiin a sen deuh arh a,tuivawtah chuan a chiah vang vang a. A sam chu a khuih leh nawk nawk a,balcony lamah chuan a chuang chhuak ta a.

A sikret țan chu hmuhnawm ti niawm tak hian a thlir vang vang reng a,Ben a lak ațanga zalen tawha a lo inhriat vei nen; chu Hotel hmun lia țhena hmun khat chu a ta a lo la ni cheu mai si! Thawh a lo tum rilrukna ngei chu!

Chhuahsan lehnghal mai chu a himna zawk tur niin a hre ta a. Mahse lehlamah chuan James, amah ring em em tu leh a puihna mamawh ve em em chu a thlauhthlak a țul a ni dawn bawk si. Awm ve turin a beisei em em tih pawh a hria a,Ben nena an inkar thil a hre lo bawk a.

Lehlam lehlamah chuan buai deuh nuaih in a inhria a,a chunga ngilnei tak James han kalsan chu a hrehin,lehlamah lah Ben a hnuai bawka thawk leh tur han nih chu thih hreh takin a hreh tawh bawk si. Amah a hmangaih tih Ben chuan a hre lovin, James zawk emaw a hmangaih a ti tlat reng si a,a tan chuan khawimah kalna tur a awm lo,engatinge maw Ben a lak ațanga tlanbo hi a tum reng mai le?

Hmun hrang hrangah hna a neih avangin Athen ah hi chuan a cham rei pawh a ring lova,chubakah a inpui chu England ah daih a awm bawk si. Aspenmere a han hriatchhuah ringawt pawh chuan a rilru chu a na vawng vawng a.

Athen a a awm chhung hi chuan țha tak leh hawihhawm takin lo kawm ta sela,engkim a țha zawk mai thei a ni. A hmel hmuh hian a rilru tina țhin mahse,hmuha biaka a țawng ngaihthlak ringawt pawh hi a kham zo lo tih a inhre reng bawk si. A vei ve mawlh lo tih han hriat chu hremhmun tluk zet a ni.

Chutia a lo ngaihtuah mek lai chuan a kawngkhar chu an rawn kik ri dat dat a. Chhuahsan mai chu țha zawka a hriat avangin James a hnena sawi dan tur la ngaihtuah reng chung chuan, "Lo lut rawh," a han ti ve a.

Reiloteah chuan a bulah Ben a ngei mai chu a rawn ding leh ta reng mai a. James a turah hlir a lo ngaih avangin makti tak chuan a en ta reng a,a nui deuh hmel pawh chu a reh ta hmak a.

Ben a sam chu a la huhin,a thawmhnaw pawh a lo thlak tawh a,Denim jean kekawr leh kawr dum ban bul hi a rawn ha a.

"Enge i duh?" a mit laksawn pah chuan a han ti ngawt a. Amah a hnaihna chuan a tirilah engtin emaw tak hian a rawn țham leh ta seng seng a,a ka te chu ro deuh hulh hian a hria a.

"I hriat ka ring," Ben chuan a lo ti mai a.

China chu a sen awp awp a,kal leh vat sela a duh tehlul nen,a hma siahah chuan a rawn ding ta lehnghal a! Chiang zet hian China hmel leh taksa chu a han en a,a mit sen ram leh a taksa cher leh dawldang takte chu a hmuh hmaih hmel loh kher mai. China chuan thawh lawka a hmuh phak loh tura tlan chhuah daih mai chu a chak et et a.

"Thu sawi dun a hun ta in ka hria," a mit la sawn chuang hauh lovin Ben chuan a han ti leh nghut a.

"Sawi dun tur kan neih ka hre hauh lo mai," kun reng chungin China chuan a lo ti ve niah niah a.

"I nei lo amaw? Sawi sen loh kan nei zawk emaw ka lo ti mai asin - hrep tak chuan! China,titi tluangtlam tawite pawh kan sawi dun thei lo em ni?" a han ti leh a.

"A chhan chu i thin butut vang vek a ni," China chuan a lo ti leh hmak a.

"Ni e,ka hria,i tel venaah lek phei chuan ka pha hauh lo; tin,nang pawh nu zaidam thliam chu i ni bik hauh lo alawm," thinrim insum tih hriat tak chuan a lo ti ve leh ngat a.

China chu khur hlawk hlawk chung hian a tho va, "I țawng huatthlalaawm deuh ngaithla tur hian ka awm dawn lo," tih paha kal mai hi a han tum a.

Ben chuan a lo man chawt a,a lamah a kuai her nghal lawp a, "Tih thinrim ka tum lo che - Naupang â te," a ti sup a,a mitmeng pawh chu a dam hle a. "I leng kual mai mai ang hmiang,engemaw entir tur che ka nei ania," a ti ta duam a.

Bumna a ni thei ang em? ti rilru chungin Ben a hmel chu a han en a; a nui hmel deuh a han hmuh phei chuan a lungphu chu a rangin, khawvela duhawmna zawng zawng hi Ben a hmelah chuan a kim biai ta mai emaw a ti hial a.

A ngaihtuahna chu hriatsak niawm takin, "Engmah bumna lam a awm lovang,ka tiam a che," Ben vek chuan a rawn ti leh nghal a.

"Awle," China chuan a ti ve ta nge nge a.

Hotel ațang chuan chhuakin, Ben a car lam chu an pan dun leh ta a. Ben chuan a kut chu a rawn vawn sak a,China chuan a rilruin,min hmu apiang chuan inngaizawng emaw min ti ngei awm si a, aw...han dik tak tak hlauh zawk sela aw..! a ti rilru neuh neuh a. A tumah mah chu an țawng lo nain,inhrethiam dun tak hi an ang hle a.

Darkar chanve dawn an tlan hnu chuan lawngchawlhna hmun lian vak lo hi an thleng ta a. Ni a sain,khua a lum hle a, Car ațanga an han chhuak pawh chu nisa chuan a rawn em sar mai a.

"Engtizia nge?" tiin China chal dawm chu Ben chuan a han zawt vat a.

"A sa lutuk deuh em ani," nui chung hian a lo ti a.

"Tah hian lo awm rawh...!" China in a chhan leh hma chuan a kalsan zui nghal vut a. Reiloteah lukhum parh hlaipui mai hi kengin Ben chu a rawn let leh thuai a, China mit ang maia dumpawl raih mai,ribbon hi a insuih bawk a.

A mit hliah țhelh khawpa kun lap hian Ben chuan a rawn khumtir nghal a.

"Ka lawm e," China chuan a lo ti ve sap a. "Enge helaiah hian min entir tur i neih?" a han ti zui zat a.

Ben chuan a bana kaiin Yatch awmna lam chu a panpui ta a; China in a han hmuh meuh chuan a thaw a chham lo chauh hi a ni mai. "I ta maw..?" a chhanna tur hresa reng chung hian a han ti halh a.

"I duhzawng a ni em?" Ben chuan a lo tihsan mai a.

"A nalh kher mai,lawng hi chu ka ngaina ve reng reng a," nui hawk hawk chung chuan a ti ve ta chul a.

                         Chapter - 9

Vawiin zet chu thin phut zawk zawkna ni a nih ber mai hi mawle! China chuan a tirilru neuh neuh a,a rilru a nuam lo kher mai! James an intur s duh leh duh loh a zawh pawh chu a hre mumal ta tlat lo!

"Min ngaidam rawh!" chi ai tak James en chungin China chuan a ti ta ngawt a.

"In tur i duh em?" nui sak chungin James chuan a han ti leh a.

Olivia Daniel en reng chung ve thung chuan, "Sherry ka lo in ange," a han ti ve leh bauh a.

James chuan a mitmei chu chhuiin, Olivia leh Ben hian zanriah min kilpui dawn a,pawi i ti lo ang chu maw? a han ti a.

China chuan, "Pawi ti lo ve," a lo ti sap a, engdangin nge a chhan chuan ang? Thudik lah chu a sawi ngam der si lo. Ben an a lo en reng tih chu a haider lui tlat a, Tukina Ben a hmuh te khan amah maiin Athen ah hian a lo kal lo vang tihte chu lo hriat nghal awm!

James chuan no rawn pek pah hian, "China, Olivia hi i hriat tawh ka ring?" a han ti a.

"Aw ni e,kan inhmu tawh," nui lui hram hian a han ti ve bauh a.

Olivia chuan chiang zeta rawn en chung hian, "I vak kual vel a ni maw - my dear?" a han ti a,nuihzat niawm tak hian a han nui zui har har a.

China chuan henu laka hawihhawm chhuah reng pawh hi țulin a hre tawh bik lo va,chuvang chuan Olivia aw ang vela nem si hian, "Nang zawk pawh chu,vawiina lo kal em ni i nih?" a han ti let ve ngat a.

"Nia, Ben a ruala zin ve hi ka ngen a,mimal thlawhnaa zin hi nuam berin ka hria a ni."

China awih zawng tak a ni! Ben chuan ama pualin thlawhna a nei tih pawh a hria; mahse Athen kal nana a rawn hmang chu mak a ti deuh a,a hmanhmawh viau em ni ang le?

Biak zui zel a chak lo tih hriat takin Olivia chu James lam hawi chuan a be nghal sawt sawt a, China chuan ala en reng a. A tlailam kawrfual hak hringduk chu a nalhin a inhmeh kher mai a; model nge nge chuan a inhmeh tur rawng pawh a hre hlein China chuan a hria a. Ben tan pawh han iai phal chi rual a ni lo! Chu rilru chuan a chhun na kher mai a, a hawisan ve ta nghat a.

"Bravo - my love," Ben chuan a bul maia dingin a lo ti sup a. China chuan thaw dep dep chung hian a enchho vat a,velvet jacket dum leh kekawr dum a hak chuan a tilang thim lehzualin, thunei hmel hi a pu hliah hliah a. A scent rim nam ram ram a han hriat phei chuan hip veng veng hian a inhria a.

"Khawiahnge Charles?" a han ti bauh a.

"London ah a nih ka ring, Olivia nen hi chuan an cheng dun tawh lo. Olivia lo kal ve chhan chu......" a tawp leh chawt a. "Ka rawn thlit sak leh ang che aw?" a ti ta daih a.

Duh tawh lem lo mahse a kalsan chhung zawk pawha lo inngaihtuah a duh avangin a bu ta nghat a.

A sawi zawh tak loh kha chu - 'Ka bula awm ve turin' tih chauh niin a ngai thlarawk a. Chuvang chuan vawiin chawhnua Ben a nena an awmdan te kha hreawm a tih phah lehzual sauh a. Engtinnge Olivia nena lo thleng dun chauhvin, a bula khatiang khan a khawsak leh theih?

A kianga Ben landan chu rinawm, fing, ngilnei, zahawm, heng zawng zawng hi a pianpui ang hialin a lo hmu țhin a. Chu chu nise engtinnge hetiang leka a khawsak leh si? Hmeichhia hi a duh tak tak lo a ni ang,tia a ngaihtuah rual chuan niin a hre leh thei bawk si lo. Hmeichhe pakhat chauh chu a duhtawk lo pawh a ni mai thei- mahse chu pawh chu a ring thei chiah bawk si lo! Nupui la nei lo nimahse a hmangaih tawh vek vek lakah chuan rinawm tlut mi niin a hre bawk si.

A bul a lo thlen leh chuan, "Zanin chu i duhawm kher mai," sherry han pek leh pah chuan a han ti sup a. "China, vawiin chwwhnu......"

"Khawngaihin Ben, chutiang sawi ka duh lo,tunah hi chuan," tiin China chuan a lo dang vat a.

Chiang zeta a rawn en chuan a rilru zawng zawng pawh a hmu tlang vekin a rinawm hial mai! "Anih leh naktukah kan sawi dun ang?" China chuan a chhang lo.

Kha thil sawi dun leh kha a țulna a hre lovin, han hnial erawh chu sawtin a ring chuang bawk hek lo va.

An kalna Restaurant chu a lianin, a hautak hmel kher mai. Dawhkan lian ber chu an kil a, waiter engemaw zat hian an vil țaih a.

China chuan wine chu tlem tete hian a in a,thawklehkhatah damlo ta thuta inhriain,a thil ei chakna zawng zawng pawh chu a bo ta duak a. An bul vela dawhkan kil ve te chu Greek hausa hmel pui pui an niin, American pawh tlem a zawng an awm ve a.

American hmeichhe pakhat chuan a duh tih hai rual lohvin Ben chu a rawn en reng a, China in Ben hmel a han en ve thung chuan a hre lo nge, ngaihsak hmel lah a pu der si lo va. James nen chuan Hotel account vel sawiin an ti ti bawrh bawrh a; Olivia chu an inkara țhu a ni bawk a, an thusawi chu ngaihven hmel zet hian a thle tawn chhen mai bawk a.

China thung chuan a ngaihven peih lovin salad hlang ringawt chu a lo chah veleh a. "Thildang i ei tel dawn nange?" makti hmel takin James chuan a lo ti ha a.

"Aih, a ngai lo, ka ril a țam lo em a ni," China chuan a lo ti mai a. A awmdan chu danglam riau hian a hria a; a hmai chu a dangin, Olive rim a hriat te chuan a tidam lo lehzualin a hria a. A salad pawh chu ei si lovin a khal a khal ringawt a; hmeichhe room ah va inphih harh phawt se a ziaawm deuh a inring a.

Inthiam lo rilru tak chung hian a tho a,kal mai a han tum a. Mahse a kete chu rit ta riau hian a hria a, ke lem vuah niawm tak hian a inhria a; țap lek lek chung hian, "Oh,Pathian, hetah chuan min damloh tir lul suh, a rapthlak dawn em mai," a ti buai niaih a.

A lo kal tih pawh a hriat hauh lovin Ben chu a bulah a rawn ding a, dawm din tum hian a rawn vuan vat a; China pawh chuan a lo dawm ve vat bawk a.

Olivia chuan makti tak leh thinrimna inpawlh nawk hian a rawn en a,engemaw inbumna thil tel ni ngei hian a lo hria a. James thung chu hamhaih tak leh tihtur pawh hre lo hian a lo awm ve thung a.

"Hotelah ka hruai haw ang che," Ben chuan a ti a.

Chu zawng a duh vak lo, "Mahse, i chaw ei tur...." ti niah niah chungin China chuan a pum a dawm ran a.

"Chaw te mai mai, i kal thei ang em?"

"Ka thei lo mai thei..... Oh, ava rapthlak em!" a ti sap a; an bul vela miten an en țhap tih pawh a hria a.

Head waiter pawh chu,puih an ngaih leh ngaih loh zawt pahin a rawn kal vat a, mahse Ben chuan ama mawhphurhna a nih thuin a lo chhang mai a. Nui chungin China biang chu a khawih a, "I pui thei lovang," a ti sup a. Chutah naute ang mai hian a pawm ta lawp a.

"China hi ka va hruai haw ange, nangni chuan tikhan lo ei zawm zel rawh u," James rawn ding uaih hnenah chuan a han ti zung zung a.

"Nia.....khawngaih takin....." China chuan a lo ti ve hram a. Ben an a hawpui tur mah tih nakalaiin, James leh Olivia han tihbuai leh zel chu ni theiin a hre lo ve a ni.

Ben chuan pawnah a pawm chhuak ta a. China chuan, "Taxi ka la mai ang," a han ti leh a.

"Aa aa teh suh," Ben chuan a lo tihsan hmiah a, A car awmna an thlen chuan dimte hian a nghat a, Hotel panin an tlan zui ta nghal a.

China hnialna chu pawisa lovin, a room an panna ah pawh chuan a pawm zel a, a khumah China chu a nghat ta a.

"I dam mai lo dawn hmel em?"

"Ka hre lo le," China chuan a lo ti ve mai a. A pumna lutuk chuan a mittui a titla țep ta mai a; harsa ti taka thawh a tum chu Ben chuan alo pui vat a, a thawmhnaw vel chu a phelhsak țan ta a.

China chuan lo hnial chu a duh hle nain,hnial hlei thei ni pawh chuan a inhre si lo.Bing chuk chuk chung hian a kawrfual a phelhsak chu a lo dawh ve ringawt a; Ben pawh chuan rang tak leh dim tak si hian a phelh zo ta thuai a. A mutkawr chu haktir turin khuma țhu tur chuan a hrilh a, a sam kilh khawmna pin pawh chu a phawisak nghal a. A hmelah chuan amah duhna emaw, itna emaw a awm hauh lo niin China chuan a hria a. A haktir zawh pawh chuan khumah muttirin, puan a sintir leh thliam a.

"Doctor kan phone ang a, min lo mamawh i nih chuan min rawn ko dawn nia," tih pah chuan a chhuahsan zui ta nghal a.

Darkar khat leh a chanve hnua Doctor lo thleng chu pa te deuh, nui hmel pu reng mai hi a ni a, zei tak maiin China chu a en ta zung zung a. Beisei loh deuhin, a chaw ei a Tur tel avang leh khawlum lutuk tuar lo niin Ben chu Doctor chuan a hrilh ta tlat mai! Khuma muttir reng tur leh chaw eitir rih miah lo turin a hrilh bawk a. A en zawh chuan damdawi lei turte ziakin a hawsan leh ta a, Ben chuan a va thlah a.

China chuan engtia a chaw eia tur lo tel thei nge tih chu mu chung chuan a ngaihtuah ta vang vang a. Chutah zinglama cafe naran taka sandwich a ei kha a han hrechhuak a,kha chiah kha niin a hre ta a.

Reiloteah Ben chu a lo lut leh a,thleng kum hian tui a rawn chawi lut a, a jacket leh tie chu a phelh tawh a, a kamis hma chu a rawn hawng huai bawk a. China hmai chu tuivawt chuan a phihsak ta a - Oh, zanin tlai phei chu a ngaihsakin a duat si a, a va han hmangaih tehlul em!

"Muthilh tum rawh le Naute," a hmai hrukhul pah chuan a ti a, thleng kum chu a khum bul dawhkanah chuan a dah nghal a.

"Ben, reilote tal min awmpui thei lawm ni?" tiin China chuan a han ngen a. Hriat ngai loh rama han damloh zet chu a hlauthawngin, mal riauvin a inhria a ni.

A rawn en zawk a, "Aw le, i duhdan a nih chuan," tih pahin khum bula chair chu Ben chuan a pawt hnai a, a țhu ta nghal a.

China chuan Restaurant a Ben a chaw ei zawh hman tak loh kha a han hrechhuak thut a, "Oh! i zanriah kha - i kir leh zawk tur a ni.......Olivia" a rawn tichhuak ta phawng mai a.

Ben chuan, "Hetah ka awm zawk tur a ni,chubakah ka ril a țam lo reng reng," a lo ti ve mai si a. Chutah țhu hle hle thei lo ni awm tak hian a tho leh vut a,tukverh lam chu panin a va hawng a,khawpui chu a thlir vung vung a; China pawh chuan a chezia chu a lo thlir ve reng a.

Hausain thil tithei hle mahse, a chhungrilah chuan khawhar leh mal ve riauva hriatna China chuan a nei ta tlat a; mahse James thusawi kha hrechhuak lehin, Ben chu chak tak, hriatthiam har tak a ni a tih kha. Chutiang tak chuan tuna a ngaihtuahna pawh hi a hriatpui hauh lo reng a.

Tunah chuan a pumna pawh a reh țanin, dam leh mai dawnin China chu a inhria a. "Eng chen nge Athen ah hian i cham ang?" tiin Ben chu a zawt a, a haw leh hun tur chu a lo huphurh lawk em em a ni.

Ben chuan a rawn en a, "Min hnawhbo i chak tawh deuh em ni?" a lo ti nghut thung a.

"Teuh lo mai, ka ngaihtuah vel mai mai....." tiin China chuan a chhang ta niah niah a.

"Ka hre chiah lo,heta țanga hmarlam, Thessalonika ah hna ka nei a,chu chu ka haw hmaa chinfel ka duh deuh. Tin, Hotel hawn huna awm ve nghal pawh ka duh bawk a,nang zawk hi - China tereuhte, Athen ah hian engchen nge cham i tum?"

A chhang nghal mai thei lo; a la cham rih tur chuan a tilawmin, a lehlamah thung chuan a tilungngai bawk si. Chutah, "James a min mamawh hun chhung chu a ni mai ang," a ti ta ngawt a.

Chuveleh Ben hmel chu a ruhin, thinrim hmel hi a pu ta thut mai a. "I va rinawm awm ve! Anih heti taka i rinawm hian enge i hlawhchhuah dawn - inneih em ni?" a ti ta vut a.

A tihdan chu a haw kher mai a, "Chu zawng nanga lo hriat ve tur a awm lo," a ti ve ta hmak a.

"James hi ka unaupa a ni a,ka hriat ve chu a thiang a ni," a ti vawt ta ruih a.

"I lo inrawlh ve chu James chuan a duh hauh lovang. Chubakah nangma thil buaipui tur pawh i ngahin ka ring," Ben a aw ang vela nelawm loh chuan a han ti veleh ngat a.

"Enge i sawi awmzia?" aw chang fein Ben chuan a han ti leh ngat a.

"A awmzia chu - Olivia Daniel," China chuan a ti ta hmiah a.

Makti tih hriat takin Ben chuan a mitko chu a san awk a, "Mrs Daniel lakah hian ka inhnamhnawih i lo ring a ni maw?" a ti ta hu a.

China chuan, "Ka ngaihtuah hrep lo ve," a lo ti hlar a, Ben a nui hmel te chu a ngei hle a. Chutah a pum chu engtin emaw rawn awm leh nghulhin a hria a, a tho va, bualin lam a pan nghal vat a. Ben chuan a rawn zui vat a,chawhtawlh chunga a kun khur ngar ngar chu a lo en reng a.

A tithangtlawm riauva hriain, "Engatinge min kalsan mai loh?" tuivawta a hmai phih bawrh bawrh chung chuan a han ti a.A damlo a vil reng pawh chu a duh tawh lo tlat mai!

Ben lah chuan, "Awmpui rih turin nangmahin min ngen a nih kha, chubakah Doctor pawh khan lo mitmei rih tur chein min chah a ni," a lo ti awlsam theuh si a.

Khum lamah chuan a hruai leh a,a kut vawt thler te chu a kut pahnih chuan a hum lum sak thur thur a.

China chu a chau hle nain,Ben a awm ve chuan a ruk tak chuan a tithlamuang takzet a ni. "Ka mut a chhuak hle mai," a han ti a.

"Chuti chu muhil ta che," nui chungin Ben chuan a lo ti vat a.China chu a maimitchhing a,thlamuang tak chuan a muhil zui ta bam a.

A rawn harh chuan zanlai a lo ni tawhin, a luak a rawn chhuak leh ta hle a; a bul chair a Ben lo muhil ve chu light a in on en iar sa avangin a hmu nghal mai a. Tichuan a tho a,bualin lam chu a pan a, a va luak bawrh bawrh a; a inphihfai leh hnu chuan a khum lam chu a rawn pan leh ta a.Ben a hmel a han en leh chuan tawhkhirh leh rorum hmel tak kha a bovin, zaidam leh nelawm tak awm hian a lang a.

Chutihlai chuan a rawn harh ve hlawl a, China chu makti hmel zet hian a en a, "Engtizia nge?" a rawn ti chhuak hlawl a.

"Ani chuan, "Ka dam lo leh deuh a," a ti mai a.

"Naute, khawngaihthlak," a ti sup a; "Eng hun nge ni tawh?" a han tih zawm leh a.

A khum sira sana chu enin, "Dar li," a lo ti a.

"Coffee kan siam ange, i lo țha zel ang tiraw?"

"Țha ang ka ring."

A chhuah hnu chuan light chu a tithim a, Ben chu a ngaihtuah zui leh ta veng veng a, a nui deuh seih a. A lo luh leh lai chuan a lo maimitchhing siar siar a, a bula Ben rawn țhu leh chu light eng rii riai hnuaiah chuan a han en a, a kut phar chhuah chu Ben chuan lo chelhsakin, a nuai sak nar nar a.

Mutchhuak hmel taka meng diar diar chung hian, "Min fawp dawn em Ben?" a han ti sap a,ama aw ngei pawh chu hla taka ri ang mai niin a hria a.

Ben chu a che ve vat a, a hmuiah tak chuan dimte hian a zuk fawp a, a hmui chu a lum thar thar a.

Nui seih chungin China chuan a en chho va, Ben thaw dap dap pawh chu a hria a, "Dam ver vawr ila ka duh hle mai," a han ti leh niah niah a. Ben chuan pawm reng mai se a duh a ni.

"Kei tak hian asin duh," tih pahin China biang chu duat tak hian a han fawp leh a. A hmel chu han en lehin, "Aw Pathian, ka duh che a ni - ka hriat theih chinah nang tluka duh ka la nei ngai lo," a ti a, a aw chu a hniamin a thawp sut a, a țawng apiang chuan China hmel chu a en run zel a.

Ben a awmdan chu a hria, a chhan pawh a duh em a ni - Oh, a va han duh tehlul em! Mahse a hrilh ngai lovang, Ben chuan a taksa a duh em em laiin, a hmangaih thu vawikhatte pawh a la sawi lovin, China hmangaih pawh chu a duh lovang.

Ben han thaw huai chu a hria a, khum bula țhutmutna chair ah chuan a țhu leh ta daih a.

"Mei zu ila pawi i ti em?" a aw chu a changin, a nelawm loh em em mai a.

"Pawi lo ve," zawitein China chuan a lo ti sep a.

Ben a hmu thei lo zawng chuan a inlet thawk a,rilru na leh khur der der chungin lukham chuan a hmai chu a hup ta tlat a. Ben a lighter hmeh rik khauh khauh chu a thil hriat hnuhnung ber a ni tain, tui zet hian a muhil ta sek sek a.

Zing a han harh chuan a lo tlai tawhin, Ben pawh chu a lo awm tawh lo va. A ke chu tlemin a la zawi deuh tih lovah chuan na pawh a nei tawh lovin, a harh hle tawh a, a tuihal em avang chuan a tho va, tui in tur chuan a chhuak ta a.

                       Chapter - 10

Bualthlengah China chu a inchiah vang vang a,sahbon phuan buaha innuai chung chuan eng kawr nge a hak ang tih a ngaihtuah neuh neuh a. Tui chu a lum nuamin a rimtui hle nghe nghe a. Hun a neih loh țhin em avangin tunlai chu inleih tlen zawk chauh hi a tihdan ber a ni a, tuna muangchanga inbualna huna nei thei chu a lawm hle a.

Zanin phei chu an Hotel hawn zan tur a niin, nalh taka inchei a tum ve a, a sam chu shampoo in uluk takin a su a, nidang ang lo takin curl kir ve deuh pawh a tum a. Bualthleng ațanga chhuakin a sana chu a han en zawk a,hun a la nei tam hle in a inhria a.

Vawiin zet chu buai runpui a țet hi a ni ringawt a, James a puiin a buai nileng țhak a ni. Hotel chu a nalh thei ang bera lantir an duh avangin khawih tur apui a tam em em a,an pangpar khawi ringawt pawh chuan hna a titam hle ani.

James a partner Saul pawh an chhunchaw ei laiin a lo thleng a. Amah chu tawi deuh, sațha lampang, hang leh ngawichawi zet hi a ni a. James an hmelhriattirna a han neih chuan China chu ngaisang awm deuh hian a en ha a, China pawh chuan a ngaina ve nghal mai a.

Darkar khat leh a chanve vel chauh Hotel ah chuan a awm ve hman ang tihin, Saul chu Banker ho hmu turin a thawkchhuak lehnghal a; China chuan a hmu leh ta lo.

James chu a hahin, a zam deuh tih a hmel ațang chuan a hrethei a, a kalna apiangah lo bawr tawk an awm reng bawk si a.

Olivia leh Ben hmel chu a la lang hauh lo. Ben chu khawpui lehlamah bungrua buaipuiin a kal a.

Ni hnih ni thum vel ațang khan Ben nena an inkar pawh a tluang ve tawh hle a,an inhnial tawh mang lo a ni. A hawihhawmin, a ngilnei em em a, inkawp rem tak pawh an ang tawh hle mai.

China chuan a sam chu khuih rovin a set malh malh a. A wardrobe chu hawngin,lungawi lo fe hian a thawmhnaw vel chu a en kual dan dan a. Kawr nalh danglam deuh tak hak pawh a duh ve hle nain,chutiang ang chi lah chu a nei hauh si lo. Olivia zawng el phak rual lohvin a rawn nalh leh hle pek awm si a; a tluk dawn lo tih chu inhre reng mahse, han inchhin ve reng reng chu a duh a ni.

Chutah hman lawka Clare in a kawr a hawhtir kha a han hrechhuak thut a, a suitcase ah a dah reng tak kha. Tum loh deuhin a thawmhnaw dang zingah chuan a lo tel ve a, Athen ah hian a rawn keng tel hlauh a ni.

Wardrobe chunga a suitcase dah chu pawt chhuakin a hawng nghal a, a han hai nauh nauh a, a rawn phawrh ve ta hlawl a. Duhthusam a ji ringawt mai! Kawr zahawm tak chu a ni hauh lo nain, pianphung zawng a tilang ve thei chiang alawm. Bawkbawn rawng anga sen pawl muk raih mai, taksa rem tawk chiaha țhui, nghawng leh ban nei lo, hnute chung chiaha hak theih mai chi hi a ni a.

A kawr chu hain darthlalangah chuan a han in en a,ama tan chuan hetiang ang kawr hi chu a lei hauh lo vang; khuh loh lai a ngah em mai. Mahse zanin atan chuan a duh ang chiah a ni ve tlat thung.

A hmai chu uluk takin a chei a, a complexion chu a nalhin a tai deuh tek a; han hnawih belh vak ngaihna a hriat loh avangin a mit lam chu a ngun ta thung a. Ruahsur bur bur ni, Italy ațanga a haw hlima Clare in a zirtir ang ngei chuan eye shadow leh mascara nen uluk takin a chei ta a.

A inchei zawh meuh chuan a nalh ngei mai! A hmai ngo paw heu maiah chuan tuipui dumpawl ruih ang mai hian a mit chu a paw raih bawk a. A hmuia lip gloss tlem a tah leh hnu chuan darthlalangah a han inen a, a landan chuan a tilawm ve hle mai.

A sam curl na chu phelhin a han khuih a,inchhawk nghawlh tawk chauhvin a darah chuan a invaw tle suau mai a. Chutah a kawr chu ha țhain, a zipper te chu a endik leh a.

Darthlalang hmaa a han din leh chuan a lungawi kher mai. A kawr hak chuan a dar ruak var hai mai chu a tilang chiang hle mai a; a hnunglam darthlalang ațanga hmeichhe nalh takin a rawn en reng pawh chu a hre hauh lo. A tlereuh inbel dang zawngte chu dahin, Ben an silver ngun a pek chauh chu a bun a, chutah high heel pheikhawk a bun leh ta a.

Minute sawm zet ala awm tih chuan a inpeih ta der a,inhnuai lamah han chhuk nghal mai dawn se, vawiin James mood a fuh loh em avangin a lo țim hrep ang tih a hlau si.

Chuvang chuan a balcony lam chu panin Athen tlai boruak thiang tak mai chu a dawng ta rih zawk a. Pot a pangpar khawi, rimtui tam tak te chu a hre vang vang a. Chumi tlai boruak chu a nuamin, van thiang kuk maiah chuan thla pawh a rawn chhuak țan tawh a. A dinhmunin zir lo teh mahse he khawpui hi a ngaina țan tawh hle a ni.

Thawm ri a hriat avang chuan a hawisawn vat a, a piah lam balcony a Ben a lo țhu reng chu a va hmu ta a. Ben chuan sikret a lo țan mek a,chair hniam taka țhu chung hian a hnuai lama khawpui chu a thlir vang vang a, duhdah fein a sikret chu a zu a.

A rawn hmu ve lo. Hmuh chian deuh tum chuan China chu a tawlhhnung hret a, a taksa lian leh chak hmel zetah chuan a ruka khawharna leh mal ngawih ngawiha inhriatna hi hmu tlatin a inhre ta a. Va pan a, va hnem theih nise a duh kher mai. Aw, hlim taka siam theitu ni ila ka va duh tak em! a ti rilru neuh neuh a. A hmangaihna hi dawngsawng duh chu nise thildang zawngte chu a theihnghilhtir thei hial tur a!

A kawngkhar bula pen thawm a hriat takah chuan a lut ve ta a; Ben an a rawn hmu lo hlauh chu a lawm hle a. James chu kawngkhar bulah a lo awm a, a rawn hmuh veleh chuan a faifuk raih a.

"I nalh kher mai, i nalh takzet a ni!" nui var var chung hian a rawn ti a.

"Ka lawm e," nui chung vekin China chuan a chhang let a, a fakna chuan a tilawm hle nghe nghe a ni.

"Vawiina khati taka ka chhawr hah che avang khan ngaihdam ka dil duh che a ni, chhuanlam tur ka nei lo, pawi ka ti hle a ni," Mipa naupang ang mai a ni - China chuan a biangah a fawp zauh a, a ngaidam nghal a ni.

Inhnuai lamah chuan an chhuk dun ta nghal a, mi pawh an lo thleng țan tawhin, James leh China pawh chu an ințhen zui ve nghal a. Hah hmel tak, mahse tum lui tih hriat takin lo thleng thar apiangte chu James chuan a lo lawmin a lo ti ti pui luam zel a.

Minute nga hnuah chuan Ben pawh a bulah chuan a lo kal ve ta a; ngun zeta a thawmhnaw inbel a en hnu chuan a hmai tereuhte chu a han en leh a. "I nalh kher mai!" a aw chu a hniamin a hul hak a. China chuan a wine in lai han dawt hlak pahin a lo nuih sak a, amah ang bawkin Ben mitmeng pawh chu a de ve sar a.

"Ka thawmhnaw hi i duhzawng a ni em? Clare ta ka hawh ania," China chuan a han ti a; chutah a zam ta deuh thut ni hian a inhria a.

"Thawk a tichham thei mai dawn alawm," tia chhan pahin China dar ruak kung lam chu a han melh a.A aw chu hniam deuha a hriat avangin Ben a hmel chu China chuan a rawn melh vat a, mahse engmah a lang chuang lo.

Zanina a dinner jacket var hak phei chu a nalhin a inhmeh lehzual a, kekawr dum, thawl hek hawk a hak nen phei chuan Paa hliah hliahin China chuan a hria a, engvangin nge maw a hmangaih ve mai loh le?

Pindan chhung chu a han enkual a, tun maia lo thleng, Olivia leh James chu a han hmu a. Silk var nalh zet, lace a cheimawi a hak chu Olivia chuan a nalhpui ngei mai! a tilangsar zual hle hian a hriat a.

"A nalh tak zet ani," amah leh amah inhrilh niawm takin China chuan a tisap a.

"Tu maw?" a țawng chu Ben chuan a lo hria a.

China chuan, "Olivia..," a ti chuai raih a.

"Ni e," Ben chuan a lo ti mawl ve tawp a. James nena an chamchin hi a hre tawh ang em? A lo hre reng tawh em ni ang?

China chu a thaw halh a, hetianga inbumna leh inthlim kual velna hi a kham hluah hluah tawh a. Ben a a hmangaihna thianghlim leh mawl tak si hian ani hi chu a ti aa a; Olivia te ang thil chinchang hre tawh han che kual vel hi chu a ngei hluah hluah mai a ni. Chhuanlam siamin hmeichhe roomah chuan a lut ta ngawt a.

A lo kir leh chuan Ben chuan Olivia a lo lampui mek a, Olivia lah chuan zak hauh lovin Ben chu a kuah hle hle a, no em em hian a melh vel a. China rilru chu chemtea vih ang maiin a na vawng vawng a, mahse a tilang tur a ni lo.

Hlim hmel em em hian mite chu a biain, a kawm ve bawrh bawrh reng tho va, nui hawk hawk chungin James leh Saul pawh a lampui a, wine a in khan a tiphur deuh bawk a.

An party chu a hlawhtling kher mai; darkar khat a han ral leh meuh phei chuan China chu biak a nuamin, a nui sen sen reng a, a bik takin mipaho chuan an bawr buai hle a ni. Ben an a rawn en reng țhin chu a haider ve tlat a, amah hlat thei ang bera awm chu a tum tlat a ni.

Zan rei tawh lama a va inthiar zo lo lut leh tur chu James a American țhian, rui zet mai chuan a lo dang ta tlat a. China chu rawn pan hnaiin, a hmai sen țul mai leh a mitmeng sen rum mai chuan a en run mai a, an awmna lah chu corridor zim lai tak berkher chu a ni lehnghal a.

Hnawhkian awlsam tak anih beiseiin China chuan nui deuh chung hian, "Min lo hrethiam la, Mister....." a han ti țan a.

"Andy, tiin min ko rawh - hmelțha," chupa chuan a lo tihkhalh vat a. A aw te chu a ngeiawmin, kalsawn a tum loh hmel kher mai.

"Khawngaihin min kaltir ta che Andy," hlau rilru tak chungin China chuan a han ti leh a.

An awmna lah chu an party na ațang chuan a hlain, țanpuitu han au dawn mahse, music leh țawng ri nuaih nuaih karah tumahin an hriat theih a ring si lo. Hepa hrep hian a rawn zui ru a ni ngei ang, tiin a inngaihtuah a.

"A theih loh - Baby, he hun hi ka lo nghak ngar ngar ani; ka thil hmuh hi ka duhzawng tak a ni si a. Engtinnge ni ang, nang leh kei hian hun kan hmang nuam thei fu lawng maw?" a ti ta mai a.

A rawn hnaih sauh va, a thaw rimchhe zet mai lah chuan a ur huam huam mai bawk si a.

"Min kal tir rawh," tih pahin China chuan tlansan a han tum a. Mahse chupa chuan bang kilah nambetin, che thei lovin a dang ta hmiah a.

Chupa chu ring zet hian a nui ta kuah kuah a, China hlau lutuk lah chu a var pap tawh mai a.

"I fing kher mai, mahse a sawt chuang lo vang, i kawr hak hian a zir tlat alawm," tih pahin fawh nghal a tum ta mai a. China rilru ah chuan Signor Cencelli kha rawn lang ta thutin, hlau chung chung chuan chupa chu a tlawh ve ta țhuai mai a.

Zurui pa lah chuan a ngaihpawimawh loh hmel nasa mai si a. "Min kaltir vat loh chuan ka au vak dawn ania," China chuan a han ti ve leh ngawt a.

Hlauh avanga khur leh maimitchhing chungin, China chu a theihtawp tak meuha ring hian a au ta rawng rawng mai a. Reilote hnua a han men leh chuan - rin loh deuh maiin, mumang ang mai zawkin Ben a hmel dur khup chu a hmu ta a. A mitmeng hlauhawm zeta zuruipa chu melhin, a kut chak zet mai chuan a țham kang ta lawp a, a vawikhat khawih pawh chu tuar lovin a thal ta der a.

China chu a inher a, Ben a kohna pawh chu ngaihsak zui tawh chuang lovin a tlan ta vak a. Hotel ațang chuan a tlan chhuak a,kawtthler thim tak lam chu a pan a, reilote tal midang han inthiarfihlimsan chu a duh a ni- Ben pawh tiamin. Khawiahnge a kal tak ang? Ben a Yatch kha a han hrechhuak ta thut a, Taxi in a kal mai anga, tumahin chulai hmuna a awm chu an ring hauh lovang.

Vanneihthlak takin Hotel kawtah chuan Taxi a lo awm remchang hlauh a, hmanhmawh takin a lo hnai berah chuan a lut ta a. Ben a Yatch dahna hmun pawh kha a la chhinchhiah kiau a, darkar chanve pawh tling lovah an thleng thei mai dawn a ni.

Ben a Yatch chu a hmu ta thuai a, lawng chhuatah chuan a pheikhawk sang bun nen chuan a kal ri ta khauh khauh mai a.

A mittuiin a hmai chu a lo bual huh vek tih pawh a inhre hauh lo va, harsa ti tak chungin cabin lian ber chu a thleng ta hlawl a. Eng a inchhi lo nain, chuti lutuka thim chu a lo ni lo va, a bul vel lawnglenga an eng chhit chuan a rawn en ve raih a. Nui ri leh music ri te pawh a hriat theih a - an Party ve a ni ngei ang.

Dawhkana sikret awm chu China chuan a țan a, ngaiawh tum tak hian a hip vang vang a. Bawp kawkalh nalhin chair dupah chuan a țhu a, engmah hmu si lovin thimtham lam chu a en reng a.

Party naah khan a che buai hle tih zawng a inhria, mahse a boruak khan a tihlauvin, Italy a a awm lai kha ang riauvin a hria a, inthunun thei lovin a tlanbo ta mai a ni. Mahni chauhva helai Yatch a awm hi a him ber - tumahin an khawih phak si lo va ni.

THE END